Read Karang Mbete Fe laɓna Tempuki 27 Bible Online

Mbete Fe laɓna Tempuki 27 - Karang bible

Mbete Fe laɓna Tempuki 27

¹Kandɔk kú-u lek ɓay hi̧ nah si Rɔm ké tusiɓa Itali ke kumbon, ku poŋ Pɔl ke mgbal a ɓoruri ku̧ ndɔk kumandah a hani ke soze yeri. Riŋ kumandah ra ɓa Zul. A ye ke soze yeri, ku ɓa soze mbay a luki.

²Nah hil kumbon ké ur ke Adaramiti ɓay ka̧h Sidoŋ. Kumbon ra gaɓ ké ɓil mahmbih ɓa ɗih-u tɔɓ ke ɓel sew. Ku dah kumbon puh ke puh ké tusiɓa Azi. Tɔrna wah-aw, Arisitar nzuk Tesaloni ké tusiɓa Maseduwan si ziŋ na pi.

³Tipele-u, nah ka̧h Sidoŋ. Ya̧h Pɔlri ƴo ri. Law Zul rih ni ké tul Pɔl, mí ke hi̧ ni ful si ta̧w woyri. Ku mgba ni ɓa suki.

⁴Ké gelaw, nah ur. Nah gaɓ ke ɓel tusiɓa Siper ɓayu ké kuna nzɔh nun wah ke ŋgere.

⁵Nah kal ɓil mahmbih ɓel tusiɓa Silisi ke Pamfili, mí nah ka̧h Mira ké tusiɓa Lisi.

⁶Ké gelaw, kumandah ziŋ kumbon ké ur ke Aleksandere ƴo si ma Itali. Mí ke fa̧h na ku̧ ɓilu.

⁷Nah si ɗaka ɗaka ɓay kuna ké nzɔh nun wah laɓ namri ɓa ŋgi̧-u. Nah kah rohna dara mí nah ka̧h Kinidi. Kuna ké nzɔh nun wah ra, nah si ɓa ndaru ya, nah ra̧h ti̧h ɓel Salmoneh ké tusiɓa Kereɗ.

⁸Nah si ke ɓel Kereɗ kpu̧ru kpu̧ru mí nah ka̧h gel-dah kumbon ké puh a hani ké riŋu ɓa Gel-dahna a suki. Puh-u na ɗih ya ke puh a ɓoru ké riŋu ɓa Lase.

⁹Nah laɓ nam ŋgi̧-ŋgi̧ ké tul mahmbih. Nam saŋ mbih-lu suya ziɓri kara, kal da. Fal namaw, mahful sí gahru ké tul mbih ta-a, ɓay kuna ké ku mbamba. Mí Pɔl hew niri ɓahri : « Nzukayri, mi ko ɓahri, sina wah-ay ɓay kpuh mbamba. Fe suknari ke kumbon mbɔk ɓay ɓeɓu. Mí ta ɓa feri-aw kaŋto ya. Le a wah kara, nah zíŋ ɓeɓna pi. »

¹¹Mí kumandah ya̧ ɓay nzuk-hehre kumbon ke ɓay nzuk kumbon poŋ ɓay Pɔl.

¹²Gel-dah kumbon ra mah ɓaŋ kumbon kan ri ke few kuna a yi̧ŋ mbamba ya. Ŋgi̧na nzukri ké ɓil kumbonaw lek ɓay tɔr si Fenik, gelke mahful ƴo ri ɓay kaɓ ri few kuna a yi̧ŋu-aw. Puh-u ɓa gel-dah kumbon a hani ké tusiɓa Kereɗ ké nzaku sɔɓ ma fál ɓel ɓil seh a fál ndɔk kperu nzuku a riŋ seh ke fál ndɔk lakna nzuku a riŋ seh.

¹³Kuna ur ke ɓel ɓil seh a fál lakna ku feehl bale, ku ker ɓahri, lekɓay woyri laɓ da. Ku sel kumbon, mí ku gaɓ ke ɓel tusiɓa Kereɗ.

¹⁴Zah bale, kuna a bawu ur bivbiɗ ké ɓel ɓil seh a fál ndɔk kperu nzuku a fál tí̧h seh ku bivbiɗ bivbiɗ sɔkrɔ kumbon ɓa ɗih-u ke tusiɓa. Ku ɗi sam kuna-u ɓa Urakuloŋ. Nzuk-hehre kumbonri ta̧h vana hi̧ nzak ho̧k kumbon ɓá nzɔh nun kuna kpu̧y, mí ku poŋ kuna sɔkrɔ kumbon kandɔk ké-e yih.

¹⁶Mí nah kal ké ɓel tusiɓa a hani ké haŋsekle mahmbih ké riŋu ɓa Koda. Tusiɓa-aw kuŋ kuna ndi̧, gun kumbon ké baw kumbon kɔklɔ dih fal ye-aw zɔklɔ fe. Kaŋ mí nah ruh mun wah ɓa ŋgi̧-u, nah kɔklɔ gun kumbon hak síɓa ké ɓel baw kumbon.

¹⁷Mí nah ŋga̧h ɓa suki. Nzuk kumbonri kahra fál diŋ kumbon a bawu, ku ŋga̧h baw kumbon ɓa kpuh-u kparaŋ kparaŋ rɔkɔ ɓá ɓeɓ. Ku laɓ hȩkme si gɔ́r ké gel sikɔkre haŋsekle mbih kú-u ɗi ɓa Sirti ɓel tusiɓa Libi. Kuna ƴo zɔklɔ fe pihna kumbon ké ƴo síɓa, mí ku ɗer kan ɓil kumbon. Kuna ƴo sɔkrɔ kumbon kaŋ.

¹⁸Kuna a bawu ra toŋ laŋ na baŋlaŋ baŋlaŋ. Tipele-u, ku vbuk fe sukna a hani-uri ku̧ mbih rɔkɔ kumbon ɓá riŋ.

¹⁹Nam a sayu, nah vbuk fe pihna kumbon a hani-uri ke ndɔk wah ku̧ mbih.

²⁰Nam ro-ro ké nah ko nun seh ya, nah ko gunwu̧y nunmbam ya pi. Kuna a bawu ba, toŋ ku ke ŋgerna hi̧ kerɓay yá̧ mun wah a ndi̧ ké toŋ kara, lu ƴoɗ.

²¹Laɓ nam ro-ro nzukri ké ɓil kumbon su̧ fe ya, wara mí Pɔl ur ƴo pol woyri. Ke ɓahri se : « Ya̧h biri, titilu mi sɔk wuri ɓahri, náh ur wuri ké Kereɗ ya. I ya̧ ra wuri ɓay bi le, feri ké zi ke ɓeɓna a bawu-ay ta ziŋ nari ya.

²²Mí aŋay, mi ƴo sɔk wuri ɓahri se, í su̧h law woiri. Nzuk mbew ké ɓay ziŋ ɓeɓna ta-a. Sa ɓa kumbon kaŋto mí ɓay ɓeɓu.

²³Ŋgerzah bi ké mi ƴo dim ni pih tem nzak pihna ye gi ta̧w bi ke suŋay ɓah hi̧ mi ɓahri, mí laɓ hȩkme ya. Mi ƴó pol sezar ɓay lu lakna ɓay Ŋgermbay gaŋ. Mí ko, tumbɔl lawsuki Ŋgerzah, nzukri riw ké kaɓ ɓil kumbon ziŋ mi-ay, ke yá̧ niri ɓay bi.

²⁵Kaŋ dale ya̧h biri, í su̧h law woiri. Mi kan law bi sa tul Ŋgerzah. Fe-u ɓay laɓ kandɔk ké-e sɔk mi.

²⁶Mí nah ɓay gɔr ké ɓel tusiɓa a hani ké haŋsekle mahmbih-ay. » Pɔl ɓah kaŋ.

²⁷Kuna toŋ sɔkrɔ kumbon kal ɓil mahmbih suŋ boh falu niŋ. Riŋ mbih-u ké ɓil mahmbih ra ɓa Adiri. Haŋgel laɓ, mí fe na nzuk kumbonri kandɔk kú-u ɗih ya ke tusiɓa.

²⁸Ku vbu sal-leh ɗihna mbih le, ku ziŋ ɗihna mbih ɓa metere bon say falu toŋndɔk say. Nah si tɔɓ ma pol ɓáy, ku vbu le, ku ziŋ metere bon seɗe falu toŋndɔk seɗe wara.

²⁹Ku laɓ hȩkme ɓay rɔkɔ kuna ɓá sɔkrɔ kumbon si vba̧ haŋ kasaw gba̧y, mí ku vbuk kura niŋ ké ɓa yih-u yih-u, ké na fá-fal kumbon ɓay tuŋ diŋ mbih hi̧ kumbon ɓá dah tul mbih. Ku ƴo goŋ záh woyri ɓay hi̧ tipele ɓá teh gah, ku kó tusiɓa.

³⁰Nzuk kumbonri yih ɓay ƴahra-u. Ku sel gun kumbon ra ɗer kan tul mbih. Ku laɓ mun woyri kandɔk kú-u yih ɓay vbuk kurari a fál pol kumbon.

³¹Mí Pɔl ɓah hi̧ kumandah ke soze yeri ɓahri : « Nzukri-aw kaɓ ɓil kumbonay ya le, mahful yá̧ mun woiri ɓay ta-a. »

³²Bale sozeri kuŋ sal gun kumbon ra hi̧ mbih kal keni yoroŋ.

³³Gel fa̧h hoh, mí Pɔl goŋ niri ɓay kú su̧ fe. Ke ɓahri : « Laɓ nam boh falu niŋ mí na-ay i ƴo tul bɔk woiri dan su̧ fe.

³⁴Sa̧wu mí-i goŋ wuri, í su̧ fe. I zíŋ keni ŋgerna yá̧ mun woiri. Pirmatul nzuk mbew kara, ta zi ya. »

³⁵Ke ɓah kaŋ bale, ke mbi peŋ, ke yih soko hi̧ Ŋgerzah ké pol woyri gbam, ke gɔh, mí ke titil su̧-u.

³⁶Bale law woyri gbam voh, mí ku su̧ fe.

³⁷Tul wah laɓ sɔɗ sɔɗ seɗe ke bon toŋndɔk say falu tɔtɔklɔ (276) ké ɓil kumbonaw.

³⁸Ku su̧ fe mah gel ɗaka woyri, mí ku fa̧h naŋ farin vbuk ku̧ mahmbih rɔkɔ sukna ɓá yih kumbon.

³⁹Tipele teh bale, nzuk kumbonri ko tusiɓa, mí ku tu ɓa tusiɓa a suŋ ya. Ku ƴo ko gel ké ɓel sew ɓay kú tu fál a suŋ mí mah hi̧ kumbon ɓá gɔr ké ri bale, ku ziŋ gel sikɔkre a hani-u.

⁴⁰Mí ku sel sal kurari ké niŋaw. Ku poŋ ma ɓil mahmbih. Ku el sel fe-hehre kumbon kú-u ŋga̧h. Ku ɔr gar a ah-u ké fál pol kumbon hi̧ kuna sɔkrɔ kumbon. Nzuk-hehre kumbon hi̧ kumbon si ma gel sikɔkre ra.

⁴¹Bale kumbon ka̧h gel a hani ɓil mahmbih ké mbih uh fál seɗe dɔh sikɔkre gaŋ tul hani ndur, mí nzak ho̧k kumbon gɔr ɓil sikɔkre maŋ. Mbih su gbɔksɔ gbɔksɔ ra, toŋ vbar fal kumbon.

⁴²Sozeri lek ɓay i mgbalri rɔkɔ ku uh mbih le, kú ɗuk.

⁴³Mí kumandah yih ɓay ya̧ Pɔl. Ke gboh niri laɓ fe kú-u lekaw. Ke hi̧ nzuk a a̧yri ké tu uh mbih tu zo toh mbih pol. Ku uh mbih, ku ka̧h tusiɓa dara mí tɔr nzuk a ɓoruri gi fal ɓáy. Nzuk a haniri mgba palaŋse. A ɓoruri ba, mgba kpuh kumbon ké haw. Kaŋ mí gbam wah, nah ka̧h keni tusiɓa ɓa suki.