Read Karang Mbete Fe laɓna Tempuki 28 Bible Online

Mbete Fe laɓna Tempuki 28 - Karang bible

Mbete Fe laɓna Tempuki 28

¹Nah ka̧h tusiɓa ɓa suki dara mí nah lah riŋ tusiɓa ké na haŋsekle mahmbih ra ɓa Malta.

²Nzuk puh-uri ya̧ na gbam ɓa suki. Tel voh mbamba ɓay mbam ké ƴo tona. Ku gaŋ hɔrɔ hi̧ na, mí nah nu̧h.

³Pɔl si fa̧h kpuh mah fe gi ku̧ hɔrɔ bale, soy ti̧h te ndɔk ye hak sa sa ri.

⁴Nzuk puhri ko soy ké te ni hak sa sa ri bale, ku ɓahri : « Ma̧yɓay ta-a. Gunwo̧ro-ay ɓa nzuk-i hul gaŋ. Ke ya̧ mun ye ké ɓil mahmbih kara, záh-dal baa nzukri ta poŋ ni kaɓ tukala ya. »

⁵Pɔl kpoh soy ra wa̧y vbu ɓil hɔrɔ. A ye ba, ke lah sena a hani ya.

⁶Ku ker ɓahri, ndɔk ye ɓay mbah-u ya le, ke líh gba̧y ɓa hul. Ku geŋ doro-u kpu̧y le, ku ko fe a hani laɓ ni ya pi, mí ku el ɓah ɓay a ɓoru ɓáy ɓahri, nzukay ɓa záh.

⁷Kerpuh ŋgernzuk tusiɓa-aw ɗih ya ke gel ké nah ƴo ri. Riŋ ye ɓa Piɓliyo. Ke mgba na gahru ndɔk seɗe laɓ nam say.

⁸Bah ye na sena mun zaŋna ke zɔke sem pi. Pɔl rih si tul bah Piɓliyo goŋ Ŋgerzah. Ke ɓaŋ ndɔk kan tul nzuk sena ra, mí ke gah ni.

⁹Bol falu bale, tɔr nzuk senari ké na tusiɓa ké haŋsekle mahmbih-aw gi ta̧w Pɔl, mí ku ziŋ mun gahna.

¹⁰Nzuk tusiɓa-awri dim na mbamba. Kumbon a hani, riŋu ɓa Záh-hore, ur ke Aleksandere. Ku ŋga̧h kumbonu na ɓel sew tusiɓa ké haŋsekle mahmbih ra ɓayu ké few sayaw mahful sí gahru tul mbih ta-a. Few say ra kal bale, nah hil kumbon ra ɓay tɔrna. Ku hi̧ na feri ké mah so na tul ful gahru wah.

¹²Nah tɔr si ka̧h Sirakus, mí nah kaɓ ri nam say.

¹³Nah ur ké ri, nah gaɓ ke ɓel tusiɓa Sisili si ka̧h Regiyoŋ ké tusiɓa Itali. Tipele, kuna ɓel ɓil seh a fál lakna titil ku-u, mí nah gaɓ ke ɓel tusiɓa-aw nam seɗe dara mí nah ka̧h gel-dah kumbon ké Puzol.

¹⁴Nah ziŋ nzuk yi̧n ɓil Ŋgermbayri ké ri. Ku goŋ na, mí nah kaɓ ziŋ niri dimasi mbew. Kandɔkaw mí nah ka̧h keni Rɔm.

¹⁵Nzuk yi̧n ɓil Ŋgermbayri ké Rɔm lah ɓay sina wah ma Rɔm, mí ku nzɔh nun wah gi ka̧h lumu Apiyus ziŋ na ké ri. Nzuk a ɓoruri ka̧h puh ké riŋu ɓa Vulgahrusay. Pɔl ko niri kaŋ bale, ke yih soko hi̧ Ŋgerzah, ke ziŋ ŋgerna.

¹⁶Ka̧hna wah ké Rɔm, ku hi̧ Pɔl na vul gahru ye ɓoɗ ke soze-kɔr ni.

¹⁷Nam say bale, Pɔl ɗi ŋgernzuk ziɓri ké kaɓ Rɔm. Ku mbu̧h hani, mí ke ɓah hi̧ niri ɓahri : « Yi̧n biri, mi laɓ fe a hani ziŋ yi̧n wahri ya, mi ɓeɓ sa̧w fe laɓna zih wahri ya pi, mí ku mgba mi ké Zurusalem. Ku ɓaŋ mi ndoh ndɔk Rɔmri.

¹⁸Bol falu, ku fakla ɓay bi, mí ɓay a hani ké mah i mi ta-a. Ku yih poŋ mi.

¹⁹Mí ziɓri sa-a. Sa̧wu mí fe zɔklɔ-u sɔkrɔ mi ɓay mí ɓahri, ɓayay ɓá si ma ta̧w sezar. Mí a bi ba, kerɓay sek yi̧n biri ta law bi ya.

²⁰Mí ku ŋga̧h mi ke sal lari-ay ɓay lák mbay Ŋgermbay ké mi te-teh ɓayu hi̧ gun Izarayelri kandɔk kú-u ɓaŋ law woyri geŋ namu. Sa̧wu mí-i yih ko wuri ɓayu. »

²¹Ku ɓah hi̧ ni ɓahri : « Yi̧n wahri ké tusiɓa Zude pih mbete sɔk na ɓay wo ya. Nzuk a hani kara, gi gelay mbi riŋ wo hi̧ na ɓa nani ya pi.

²²Mí nah ko su-su ɓay náh lah kerɓay wo ké tul ɓay ziɓri ké dih fal Zezu nzuk Nasareɗ ra. Nah lah ɓahri, ké gelri gbam, ku sa ya̧ ɓay ye ya. »

²³Ku wah ɓay el gi nam a ɓoru ɓay lah ɓay Pɔl, mí ku gi ɓa daɓa mbu̧h ké gel nam ye. Pɔl mbi ɓayri ɓil mbete Moyiz ke ɓil mbete vbehna gun nzak pihna Ŋgerzah a lewsa̧ri mí ƴo te-teh ɓay hi̧ niri ɓay lak mbay Ŋgerzah. Ke lu mberem Zezu hi̧ niri, ku ƴo lah-u ke fulu fulu ur ke tipele kpu̧ru ka̧h suŋ.

²⁴Ziɓ a haniri ya̧ ɓay ké Pɔl sɔk. A ɓoruri ba, sa-a.

²⁵Fahɓay ur ké haŋsekle woyri. Dara kú gbakra hani le, Pɔl ɔh ɓay ye kandɔkay : « Ɓay ké Tempuki ɓaŋ ndoh nzak Ezay gun nzak pihna Ŋgerzah a lewsa̧ sɔk ziihri ra ɓa ketina.

²⁶Ke ɓahri : Mú si sɔk nzukri-aw : I lah ke suk woiri la-lah, mí ɓayu guh law woiri ya. I ko ke nun woiri ko-ko, mí i ko da̧h. Nzukri-aw, ku hi̧ law woyri kpuh. Ku mbih suk woyri liɓ liɓ rɔkɔ kú lah. Ku u̧m nun woyri si̧h si̧h rɔkɔ kú ko le, law woyri ɓá guh hi̧ ku el gi ta̧w bi ɓay mí gah niri. »

²⁸Pɔl el ɓah ra ɓáy ɓahri : « Mah ɓay í tu ɓa teh-u, sa̧wnzuk a ɓoruri mí Ŋgerzah pih nzak pihna hi̧ niri ɓay kú ti̧h ɓa gun puh lakna ye. A woyri-aw, ku yá̧ ɓayu. »

³⁰Laɓ mbihmbam seɗe Pɔl kaɓ ké Rɔm ɓil vul ké-e ƴo puh lari-u. Ke ya̧ nzukri gbam ké gi ko ni ɓa suki.

³¹Ke ka-kah ɓay lak mbay Ŋgerzah hi̧ niri. Ke sɔk niri ɓay Ŋgermbay Zezu Gaŋ tul feri riw ɓa teh-u dan fe zɔklɔ.