Read Karang Mbete Fe laɓna Tempuki 3 Bible Online

Mbete Fe laɓna Tempuki 3 - Karang bible

Mbete Fe laɓna Tempuki 3

¹Sa̧wseh say bɔklew ɓa sa̧wseh-goŋ Ŋgerzah ziɓri[18], mí Piyer ke Za̧h ƴo hil ma vul kani Ŋgerzah.

²Gɔm a hani mbew ƴo ri. Ku mbuŋ ni gbirkitik. Namri riw, ku suk ni si kan nzakful ila vul kani Ŋgerzah a hani ɓay goŋ fe ké ta̧w nzukri ké ƴo rih ma ɓil ila vul kani ra. Riŋ nzakful ra ɓa Ful Su Kona.

³Ke ko Piyer ke Za̧h ƴo rihna bale, ke rah ndɔk goŋ niri fe.

⁴Piyer ke Za̧h ko ni ɗekeh, mí Piyer ɓah hi̧ ni ɓahri : « Mú ko kona ma nun wah-ay. »

⁵Gɔm ra ko niri gbak gbak, ke ker ɓahri, ke zíŋ fe.

⁶Dale Piyer ɓah hi̧ ni ɓahri : « Mi ta ke fe hani ya, mí fe ké mi ƴo keni ba, mi hí̧ mu. Ur síɓa, mú si sina ke riŋ Ŋgermbay Zezu ké Nasareɗ. »

⁷Piyer mgba ndɔk ye, ke ɔr ni ƴo síɓa. Sa gelu-aw mí, bɔk ye kpuh kpaŋ kpaŋ.

⁸Ke zo, ke si sina. Ke rih ziŋ niri si ɓil ila vul kani Ŋgerzah pi. Ke si sina, ke zo zakra zakra, ke pir Ŋgerzah pi.

⁹Ziɓri gbam ko ni si sina, ku ko ni ké-e pir Ŋgerzah.

¹⁰Mí ku tu ni ɓa nzuk ké kaɓ nzakful kú-u ɗi ɓa Ful Su Kona ɓay goŋ fe munu. Bale ku kaɓ yer. Fe-u na niri ɓa saŋ.

¹¹Ké-e poŋ fal Piyer ke Za̧h ya ra, ku ɗuk yir si ta̧w woyri ké huh tem[19] ké riŋu ɓa tem Salomoŋ mbay a luki[20]. Fe saŋaw ti̧h tem mun woyri kereŋ.

¹²Piyer ko nzukri ké ɗuk yir gi, mí ke ɓah hi̧ niri ɓahri : « Yi̧n biri, gun Izarayelri, a fe mí na wuri ɓa saŋ le wo ? Ɓay fe mí i ko na yi̧m kaŋaw le ? I ker ɓahri, gɔmay si sina ke ŋgerna wah mini ɓay hȩkna ké nah ƴo hȩk Ŋgerzah le wo ?

¹³Ŋgerzah ké zih wah Abaraham, Isak, Zakoɓ dim ra, ke hi̧ riŋ ɗina gun-laɓ pihna ye[21] Zezu mgbe. A ye ké i saŋ wuri ni, i mgba ni ndoh ndɔk guvener Pilaɗ. Pilaɗ ba, yih ɓay poŋ ni, mí i sa-a.

¹⁴I poŋ nzuk ké Ŋgerzah lu ni ɓa nzuku a ye, nzuk ké ɓay mgba tul ye ya[22]. I goŋ Pilaɗ hi̧ sel Bar-Abba nzuk-i hul ma mí hi̧ wuri.

¹⁵Kaŋ mí i i nzuk sa̧w ɔkna, mí Ŋgerzah hi̧ ni ti̧h ke puh záh ke pa̧ymun a foyu. A wah, nah ɓa nzuk-ɓah tehɓay ti̧hna ye.

¹⁶Gɔmay ké i ko ni, i tu ni ra, ɓay tul riŋ Zezu ké nah kan law sa tulu mí riŋ ye gah bɔk gɔmay hi̧ ni ke si sina. Kandɔk ké nah kan law sa tul ye ra, mí ke gah keni gɔmay kew kew.

¹⁷Aŋay, yi̧n biri, fe ké i laɓ ziŋ Zezu-aw, mi tu ɓahri, fe-u i laɓ va̧h dan kerɓay, a woiri ke ŋgernzuk puh woiri pi.

¹⁸Mí Ŋgerzah laɓ kandɔk ké-e sɔk pol sa̧ hi̧ gun nzak pihna yeri gbam. Ke ɓahri, Ŋgermbay ké-e ɓay pih ni ra ɓay ko seh mbamba. Mí ɓay ɓahna ye laɓ ƴo gelu.

¹⁹Kaŋ dale í mbi law woiri ké tul fe laɓna suya woiri ra ma fal, í el gi ta̧w Ŋgerzah ɓay ké sel salɓay ké tul woiri ma fal,

²⁰í mbi law woiri el gi ta̧w Ŋgerzah ɓay hi̧ Gaŋ wah ɓá ya̧ wuri ké ɓil koseh hi̧ law woiri ɓá voh, í mbi law woiri, í el gi ta̧w Ŋgerzah ɓay hi̧ ké pih Ŋgermbay Zezu, a ye ké Ŋgerzah mbi ni pol sa̧ ɓa mbay woiri, ké gi ƴo ziŋ wuri.

²¹A ye, Zezu ra, mah ɓay ké ƴo nunmbam ba, mí feri riw ké Ŋgerzah lek ke titilu da̧y kandɔk ké gun nzak pihna yeri ɓah ɓayu ra ɓay el lek ɔh gaŋ ba[23].

²²Moyiz, gun nzak pihna Ŋgerzah ɓah hi̧ na lewsa̧ ɓahri se, Gaŋ wah Ŋgerzah ɓay lu nzuk ké haŋsekle wah gun Izarayelri ɓa gun nzak pihna ye. Ŋgerzah ɓay pih ni kandɔk ké-e pih Moyiz[24]. Náh te suk wah lah ɓayri riw ké-e ɓah hi̧ na.

²³Nzuk a suŋ suŋ ké sa lah nzak gun nzak pihna-aw ya le, Ŋgerzah ɓay ten ni ké sakra sa̧wnzuk ye ma kala. Ke ɓay ziŋ ɓeɓna wu̧m[25].

²⁴Moyiz ke gun nzak pihna Ŋgerzah a lewsa̧ri riw ɓah ɓay gina Ŋgermbay. Ur ke Samuyel ka̧h tul gun nzak pihna Ŋgerzah a ɓoruri ké toŋ ni ɓah ɓay sew ké nah ƴo ri guri-ay.

²⁵A woiri mí Ŋgerzah pih gun nzak pihna yeri pol sa̧ hi̧ zih woiri, nzak pihna-u na ɓay woiri, i ɓa gun zih gun nzak pihnari-aw. Ke wahɓay lewsa̧ ziŋ zih wah Abaraham ɓahri : Mi̧hri wo ɓay na ɓa sa̧w mgbɔkɔ-ku̧ tul sa̧wnzuk a ɓoruri riw pi[26]. Mí ke ŋga̧h tul ɓayu ziŋ zih wah.

²⁶Ɓay woiri mí Ŋgerzah pih gun-laɓ pihna ye, mí ke hi̧ wuri ni ke titilu. Mgbɔkɔ ye ké na tul ye ku̧ tul woiri le, í sɔɓ law woiri ké tul fe laɓna a pipiri-u woiri-aw ma fal. »