Read Karang Mbete Fe laɓna Tempuki 4 Bible Online

Mbete Fe laɓna Tempuki 4 - Karang bible

Mbete Fe laɓna Tempuki 4

¹Piyer ke Za̧h ƴo sɔk ɓay riŋ ɗina Ŋgermbay Zezu hi̧ sa̧w nzuk woyri ma pol bale, nzuk fe puhna woyri ke mbay soze-kɔr vul kani Ŋgerzah ke sadusiri gi ho̧ɗ ho̧ɗ ma ta̧w woyri.

²Law woyri fa̧h tuh tuh ɓay tul fe sɔkna kú-u sɔk gun Izarayelri ɓahri, tumbɔl Zezu mí nzukri ɓay ti̧h ke puh záh ke pa̧ymun a foyu ziŋ ni.

³Kaŋ mí ku mgba niri mbih ké vul mgbal kpu̧ru teh tipele ɓayu ké seh riŋ da.

⁴Mí keni-aw kara, daɓa nzukri ké lah ɓay ɓahna woyri ra, kan law tulu. Ŋgi̧na wo̧rori dɔɓ tul nzuk a polri laɓ sɔɗ sɔɗ boh gel ndiɓi (5.000).

⁵Tipele teh bale, ŋgernzuk fe puhna, ŋgernzuk puhri ke nzuk-sɔk mbete bolkusol Ŋgerzahri ké Zurusalem mbu̧h hani ké gel-kuŋ salɓay.

⁶Ŋgernzuk fe puhnari-aw titilu ke tul Anasi dara mí Kayif, Za̧h[27], Aleksander ke sa̧w nzuk fe puhna a hani-uri pi.

⁷Ku ten Piyer ke Za̧h gi ƴo haŋsekle woyri. Ku vbi niri ɓay ɓahri : « A woiri-ay ra wa, ke ŋgerna ge ke riŋ ge mí i gah keni gɔmay le ? »

⁸Piyer ra Tempuki ya̧ mun ye gbam, mí ke yih nzak woyri ɓahri : « A woiri mbayri ké puh wah gun Izarayelri ke ŋgernzuk puhri,

⁹kandɔk ké i vbi na guri-ay sa̧wɓay suki ké gɔmay ziŋ keni mun gahna ra,

¹⁰su-su ɓay hi̧ a woiri ke gun Izarayelri gbam, í tu ɓa teh-u ɓahri, a ye Ŋgermbay Zezu ké Nasareɗ ké i ɓar ni ké tul kpuh vbatay, ké Ŋgerzah hi̧ ni ti̧h ke puh záh ke pa̧ymun a foyu ra, tumbɔl riŋ ye mí gɔmay ƴo keni pol woiri ɓa suki-ay.

¹¹Kasaw ké a woiri nzuk-mboh vul kani Ŋgerzahri, i poŋ kan kpah ra, kasawu mí el ti̧h ɓa mah kasaw-mboh diŋ vul Ŋgerzah[28].

¹²A ye ke hȩk ye mí ke mah ya̧ nzukri ɓay fe le, nzuk a ɓoru mbew ké Ŋgerzah pih ké mah ya̧ na ta-a. »

¹³Nzuk-kuŋ salɓayri ko Piyer ke Za̧h kú-u ƴo ɓah ɓay ɓa teh-u le, ku kaɓ yer ke kerɓay. Ku ɓahri, a woyri-ay, ku ɓa nzuk a garu, ku laɓ likol mbete Ŋgerzah ya, mí ku tu niri ɓa bɔh sina Zezu ba,

¹⁴ku ko gɔm ra ké ƴo ɓel woyri ke mun gahna pi, mí ɓah ɓay a ɓoru mba niri.

¹⁵Ku ten niri ké gel-kuŋ salɓay si ƴo kala. Nzuk-kuŋ salɓayri lek ɓay ké sakra woyri ɓahri :

¹⁶« A fe mí nah láɓ ziŋ nzukri-aw le ? Fe saŋ a luki kú-u laɓ gah keni gɔmay, nzuk Zurusalemri gbam ko ɓa teh-u. A wah, nah mah ɓay ma̧y ɓayu ya.

¹⁷Rɔkɔ ɓayu ɓá seh ma pol pol ké sakra sa̧w wah le, náh hah niri ɓáh ɓay ke riŋ nzukaw hi̧ nzukri. »

¹⁸Ku el ɗi niri ra ɓáy, mí ku bak niri, ku kɔklɔ suk woyri ɓahri : « Ko-ko. Í sɔk fe ke riŋ nzukaw mba. Í ɗakla ɓay mbew kara ke riŋ ye mba pi. »

¹⁹Bale Piyer ke Za̧h el ke ɓay ɓahri : « A woiri ke mun woiri, í kuŋ salɓayay, náh lah. A fe mí su ɓay náh laɓ ké pol Ŋgerzah, hȩk bolkusol woiri mini hȩk bolkusol Ŋgerzah le ?

²⁰A wah le, nah ta poŋ ɓah ɓay fe ké nah ko ke nun wah ke fe ké nah lah ke suk wah ra ya. »

²¹Nzuk-kuŋ salɓayri hah niri le, el hah niri ra ɓáy dara ku poŋ niri tɔr. Ku ziŋ ful vba̧ niri ya ɓayu ké nzukri riw ƴo dim Ŋgerzah ɓay tul fe saŋ ké kalay.

²²Gɔm ké ziŋ mun gahna ɓa saŋ ra, mbihmbam ye kal bon niŋ.

²³Ku poŋ Piyer ke Za̧h tɔr. Ku si mbu̧h hani ke mbaŋ woyri. Ku ndazi ɓayri ké ŋgernzuk fe puhna ke ŋgernzuk puhri ɓah hi̧ niri.

²⁴Ku lah ɓayu kaŋ bale, ku goŋ Ŋgerzah ke law mbew ɓahri : « Gaŋ wah, a wo mú-u laɓ nunmbam, tusiɓa, mahmbih ke feri riw ké ƴo ɓilu.

²⁵Mu pih Tempuki gi ɓaŋ ɓay kan nzak zih wah Daviɗ mbay a luki gun wo, mí ke ɓahri : Ani mí gun Izarayelri su̧h ɓay ŋgur ŋgur ndikpo, sa̧wnzuk a ɓoruri mbu̧h nzak mbew ke ɓay goɗi goɗi kaŋ le ? Mbay tusiɓari fah Miƴori, mbay puhri kara ɓar day mbew ziŋ niri ɓay ruh ŋgermu ke Miƴori ke mbay ké-e mbi ni [29] !

²⁷Ketina, ké Zurusalemay, ku mbu̧h hani lek ɓay i gun-laɓ pihna ké mu lu ni ɓa nzuku a wo, a ye Zezu ké mu mbi ni ɓa Ŋgermbay. Mu tu lewsa̧ ɓahri, mbay Eroɗ ke guvener Ponsi Pilaɗ ɓay mbu̧h hani ke sa̧wnzukri ɓoɗ ɓoɗ ke gun Izarayelri pi, mí hul ye-aw laɓ kandɔk ké mu lek ɓayu ke mun wo.

²⁹Mí aŋay, Gaŋ wah, mú ko ani mí ku hah na. Kaŋ le mú lek ful hi̧ na, a wah mgbal wori, náh ka-kah ɓay wo ma pol pol ɓa teh-u.

³⁰Mú ndar ndɔk wo, mú gah nzuk senari, mú laɓ fe saŋri ɓoɗ ɓoɗ, mú laɓ feri riw ke riŋ Zezu ké mu lu ni ɓa gun-laɓ pihna wo. »

³¹Nzuk-kan law sa tul Ŋgermbayri ɔh goŋ Ŋgerzah bale, gel kú-u mbu̧h ri hani laŋ yik yik. Mí Tempuki ra ya̧ mun woyri gbam, ku titil ka-kah ɓay Ŋgerzah ɓa teh-u.

³²Gbam woyri, law woyri mah hani mbew. Nzuk a a̧y ké ɓahri, fe ziŋna bi ɓa nzuku a bi ke hȩk, ta-a. Ku ko fe ziŋna woyri ɓa fe woyri riw.

³³Ke ŋgerna a bawu, gun nzak pihnari te-teh ɓay ti̧hna Zezu ke puh záh, a ye Gaŋ tul feri riw. Lawsuki a luki ƴo ziŋ nzuk-kan law sa tul Ŋgermbayri riw.

³⁴Nzuk mbew ké sakra woyri ké si seh fe ta-a ɓayu ké nzuk a a̧yri ké ƴo ke waka mini ƴo ke puh le, yeh el ke lari-u gi keni ku̧ ndɔk gun nzak pihnari. A woyri ku wal lari-u hi̧ nzuk a suŋ suŋ mah gel fe zɔklɔ ké ziŋ ni ziŋ ni.

³⁶Nzuk a hani ƴo ri. Riŋ ye ɓa Zezeɓ. Gun nzak pihnari ɗi ni ɓa Barnabas. Riŋu sɔk ɓahri, nzuk-voh law nzukri. Ke ɓa mi̧hri Levi. Ku mbuŋ ni ké tusiɓa Siper.

³⁷Ke mbi waka ye yeh, mí ke el ke lari-u gi keni ku̧ ndɔk gun nzak pihna Ŋgermbayri.