Read Karang Mbete Fe laɓna Tempuki 5 Bible Online

Mbete Fe laɓna Tempuki 5 - Karang bible

Mbete Fe laɓna Tempuki 5

¹Nzuk a ɓoru ɓáy ƴo ri. Riŋ ye ɓa Ananiya ke wu̧y ye Safira. Ku ɗam waka woyri yeh.

²Ku lek ɓay ke wu̧y ye, ku kehr lari-u mu̧h dara mí Ananiya gi ke tɔru ku̧ ndɔk gun nzak pihna Ŋgermbayri ɓáy ɓahri, lari waka ra, gbam munu.

³Dale Piyer ɓah hi̧ ni ɓahri : « Ananiya, ɓay fe mú-u lah nzak mbay záh tukala hi̧ mú-u kuŋ ɓay hi̧ Tempuki ? Mu kehr lari waka wo mu̧h.

⁴Waka-aw, mu yeh ya kara, ɓa waka wo. Mú-u yeh da kara, lari-u ɓa nzuku a wo ɓay mú laɓ keni fe ké law wo yih, kaŋ ya le ? Ani mú-u lah nzak mbay záh tukala, mú-u mgba ɓayu kan ɓil law wo le ? Ɓa Ŋgerzah gaŋ mú-u kuŋ ɓay hi̧ ni-aw[30]. Le ta ɓa nzuk pirmatulri ya. »

⁵Ananiya ɓá lah ɓayaw kaŋ bale, ke lih gbirik ɓa hul. Hȩkme a bawu laɓ nzukri riw ké lah ɓayu.

⁶Gun sekeri gi pɔr hul ye, mí ku mbi si gɔr.

⁷Sa̧wseh say kal, mí wu̧y ye gi ta̧w gun nzak pihnari. Ke tu fe ké kal ké tul wah ye ya.

⁸Piyer vbi ni ɓahri : « Mú sɔk mi, mí lah. Suy lari waka woiri ké i yeh ra gaŋ mí na-ay le ? » Wu̧y ra ɓahri : « Gelu gaŋ munu. »

⁹Wara mí Piyer ɓah hi̧ ni ɓahri : « Ani mí a wo ke wah wo, i lek ɓay mbew ɓay fah keni Tem Gaŋ tul feri riw le ? Mú lah tiri bɔk nzukri ké si gɔr wah wo ké kala-aw, ku ƴo gina. Ku ɓay mbi hul wo kaŋ pi. »

¹⁰Bale wu̧y ra lih guɓ mbuka ɓa hul ké pol Piyer. Gun sekeri ra el gi ka̧h, ku ndukru hul ye, mí ku mbi si gɔr ké ɓel wah ye.

¹¹Hȩkme ɓa ŋgi̧-u laɓ sa̧w nzuk Ŋgermbayri gbam ke nzuk a ɓoruri ké lah ɓayu pi.

¹²Tempuki hi̧ gun nzak pihna Ŋgermbayri laɓ fe saŋri ɓoɗ ɓoɗ ɓa ŋgi̧-u ké sakra nzukri. Nzuk-kan law sa tul Ŋgermbayri ƴo mbu̧h hani kpatara ke law mbew ké huh tem Salomoŋ mbay a luki ké na ɓil ila vul kani Ŋgerzah[31].

¹³Ké sakra nzuk a ɓoruri-aw, nzuk mbew ké lu hȩkme ké nun ye ɓay mbu̧h ziŋ niri ta-a. Mí keni-aw kara, ku pir niri ma pol pol.

¹⁴Nam ke nam, wo̧rori ke wu̧yri ɓa ŋgi̧-u kan law woyri sa tul Ŋgermbay dɔɓ tul nzuk a polri.

¹⁵Ku fa̧h nzuk senari ke hih nam woyri gi keni ɓɔk ɓel mgboŋ ɓay hi̧ Piyer ƴo kalna le, tem ye ɓá kal ké tul nzuk sena a haniri.

¹⁶Daɓa nzukri ra ɓáy ur ke puhri ké ɗoŋ Zurusalem. Ku fa̧h nzuk senari ke nzuk a a̧yri ké záh ƴo tul woyri gi dɔɓ tul nzuk sena a Zurusalemri pi. Mí ku ziŋ mun gahna kew kew. Kandɔkaw mí Tempuki hi̧ gun nzak pihna Ŋgermbayri laɓ fe saŋri ɓoɗ ɓoɗ.

¹⁷Wara mí ŋgernzuk fe puhna Ŋgerzah ke nzuk fal ŋgaŋ ye sadusiri, sere mbah ɓil law woyri tuɓ tuɓ.

¹⁸Mí ku mgba gun nzak pihnari si ku̧ vul mgbal ŋgomna.

¹⁹Suŋ sih bale, tem nzak pihna Ŋgermbay gi mgbur nzak vul mgbal ké sozeri ƴo kɔru. Ke ten gun nzak pihnari, mí ke ɓah hi̧ niri ɓahri : « Í tɔr si ɓil ila vul kani Ŋgerzah, í sɔk gun Izarayelri riw ɓay ɔkna ké Ŋgerzah lek ɓay tul nzukri, kú lah. »

²¹Gun nzak pihnari laɓ kaŋ. Gel fa̧h hoh, mí ku tɔr si ɓil ila vul kani Ŋgerzah. Ku ƴo sɔk nzukri ɓay ɔkna ra. Ŋgernzuk fe puhna Ŋgerzah ke nzuk yeri ba, ɗi ŋgernzuk Izarayelri, ku mbu̧h hani a woyri nzuk-kuŋ salɓayri. Ku pih sozeri si vul mgbal ɓay kú ten gun nzak pihnari gi keni.

²²Sozeri ra si ka̧h vul mgbal le, ku ziŋ niri ké ri ya. Ku el gi sɔk ɓayu hi̧ nzuk-kuŋ salɓayri ɓahri :

²³« Nah si le, nah ziŋ nzak vul ke gel tuh-u. Soze-kɔr mgbalri kara, ƴo nzakful ra kȩk pi. Mí nah mgbur ful le, nah ziŋ nzuk mbew ké ɓil vul ya. »

²⁴Kumandah soze-kɔr vul kani ke ŋgernzuk fe puhna lah ɓayaw kaŋ bale, ku mgba̧m ɓay ɓa ŋgi̧-u ké tul gun nzak pihnari ɓay tul feri ké ɓay gi-u.

²⁵Wara mí nzuk a hani gi ɓah hi̧ niri ɓahri : « Í lah. Nzukri ké i mgba niri ku̧ vul mgbal ra, ku ƴo ɓil ila vul kani Ŋgerzah ƴo sɔk ɓay hi̧ nzukri. »

²⁶Kumandah ur ke soze yeri si ri. Ku si maŋ gun nzak pihnari gi keni. Ku mgba niri ke ŋgere ya. Sozeri laɓ hȩkme nzukri. Ku ker ɓahri : « Nzukri ɓay vbuk na ke kasaw i na. »

²⁷Ku ka̧h gel kuŋ salɓay, mí sozeri hi̧ niri ku ƴo pol nzuk-kuŋ salɓayri bale, ŋgernzuk fe puhna ɓah ɓay hi̧ niri ɓahri :

²⁸« Pol sa̧ ra, nah bak wuri bak ɓahri se, í sɔk fe ke riŋ nzukaw ra ya. Mí a woiri ra, fe sɔkna woiri ya̧ gel ké Zurusalemay riw riw dara mí i yih ɓay hi̧ ɓay hul nzukaw ɓá mgba tul wah munu. »

²⁹Gun nzak pihnari poŋ ɓay hi̧ Piyer, mí ke ɓahri : « Ƴó tul ɓay Ŋgerzah mí su mba ƴó tul ɓay nzukri.

³⁰Ŋgerzah, a ye záh zih wahri, pih Zezu ɓa Ŋgermbay hi̧ wuri, mí i el poŋ ni hi̧ nzukri i ni ɓa hul nazi ké tul kpuh[32], mí Ŋgerzah hi̧ ni ke ti̧h ke puh záh ke pa̧ymun a foyu[33].

³¹A ye mí Ŋgerzah mbi ni ɓa ndɔk lakna ye, ke ɓa nzuk-ya̧ nzukri. Kaŋ le ke hi̧ gun Izarayelri ɓá mbi law ké tul fe laɓna woyri ma fal el gi kan law tul Ŋgermbay ɓay hi̧ salɓay ɓá lu ké tul woyri.

³²A wahri, nah ɓa nzuk-ɓah tehɓay ye ke Tempuki ké Ŋgerzah hi̧ na ke nzukri ké hȩk ni pi. »

³³Nzuk-kuŋ salɓayri lah ɓayaw kaŋ bale, ɓayu zɔr law woyri zɔr, mí ku ker ɓay i gun nzak pihnari.

³⁴Wara mí nzuk a hani-u mbew ké haŋsekle nzuk-kuŋ salɓayri, riŋ ye ɓa Gamalyel, ke ɓa farizi, ke ɓa nzuk goso fe tuna mbete Ŋgerzah pi. Nzukri riw tu ni ɓa nzuk riŋ ɗina. Ke ur síɓa ké haŋsekle nzuk-kuŋ salɓayri, mí ke hi̧ ku ten gun nzak pihnari si kala ndi̧ dara ɓáy.

³⁵Bale ke bak mbaŋ yeri ɓahri : « Yi̧n biri, gun Izarayelri, í ru̧ ke mun woiri ké tul fe ké i yih ɓay laɓ ziŋ nzukri-aw.

³⁶Sew a hani, Tedas ti̧h. Ke ɗi mun ye ɓa nzuk a luki. Ke fa̧h nzukri sɔɗ sɔɗ niŋ ku̧ fal ye. Ŋgomna i ni. Gunbɔk pihna yeri gbakra hani bale, ɓay ye zi.

³⁷Bol falu, Zuda, nzuk Galile, ti̧h ke sew ké ŋgomna pih bolkusol ɓay vbeh riŋ nzukri. Nzukri ŋgi̧-ŋgi̧ dih fal ye. A ye kara, ku i ni bale, nzuk yeri zikri keni pi.

³⁸Kandɔkaw mí-i ƴo ɓah hi̧ wuri ɓahri se, í poŋ fal woyri, kú si. Fe laɓna woyri-aw, sa̧wu ur ké ta̧w nzuk le, ɓayu ɓay zi-u.

³⁹Mí sa̧w fe laɓna-aw ur ké ta̧w Ŋgerzah le, i ta ɓeɓ ɓay woyri ya. Í ru̧ ke mun woiri. I ko ya le, ɓa Ŋgerzah mí i ƴo ruh ŋgermu ziŋ ni-aw. » Bale riw woyri ku ya̧ ɓay Gamalyel.

⁴⁰Ku ɗi gun nzak pihnari el gi, ku vba̧ niri ɓa se-u, mí ku el hah niri ɓáh ɓay hi̧ nzukri ke riŋ Zezu. Mí ku poŋ niri tɔr.

⁴¹Gun nzak pihnari laɓ law rihna ti̧h keni ké pol nzuk-kuŋ salɓayri ɓay fe le, Ŋgerzah ko niri ɓa nzukri ké mah hi̧ nzuk a ɓoruri ɓá laɓ fe-se su̧hru ziŋ niri ɓay tul riŋ Zezu seeh.

⁴²Nam ke nam ké ɓil ila vul kani Ŋgerzah, ké ɓil kerpuh nzukri pi, ku toŋ ka-kah, ku toŋ sɔk ɓaysuki ɓahri, Zezu ɓa Ŋgermbay, hi̧ nzukri lah.