Read Karang Mbete Fe laɓna Tempuki 6 Bible Online

Mbete Fe laɓna Tempuki 6 - Karang bible

Mbete Fe laɓna Tempuki 6

¹Ke seh-aw ra, ziɓri ɓa ŋgi̧-u ti̧h ɓa nzuk-dih fal Zezu, mí tul woyri ro ma pol pol. Ziɓ a ɓah nzak gerekri kú-u gi Zurusalem sa̧w puh woyri, ku vuh mun woyri ɓay tul ziɓ a ɓah sa̧w nzak woyri ebere. Ku su̧h ɓay ɓahri, sa̧wseh-wal fe su̧na le, ku yȩkre tul wu̧y seh ziɓ a gi-uri yȩ-yȩkre kpatara.

²Wara mí gun nzak pihnari ké boh falu seɗe ra ɗi mbu̧hna ke nzuk-dih fal Ŋgermbayri, mí ku ɓahri : « Yi̧n wahri, náh poŋ nzak pihna Ŋgerzah ɓay náh wal fe su̧na le, gelu ya.

³Kaŋ dale su ɓay í lu wo̧rori toŋndɔk say ké sakra woiri ké nzukri lu lakna ɓay woyri. Sa̧w siŋ sina woyri ɓa Tempuki, ku ru̧-ru̧ pi le, nah ɓáŋ pihna-ay kan ndɔk woyri.

⁴A wah ba, nah ƴó tul goŋ Ŋgerzah, nah ka-kah ɓay ye hi̧ nzukri lah. »

⁵Ɓayay ra rih law nzuk-dih fal Ŋgermbayri riw. Bale ku lu Eten, a ye ké sa̧w siŋ sina ye ɓa Tempuki. Ɓay Ŋgermbay kara ɓar sa̧w ké ɓil law ye pi. Ku lu Filiɓ, Porokor, Nikanor, Timu, Parmenas ke Nikola nzuk Antiyos a hani ké sɔɓ mun ye ɓa ziɓ pi.

⁶Ku fa̧h niri si sɔk gun nzak pihnari. Gun nzak pihnari goŋ Ŋgerzah, mí ku ɓaŋ ndɔk ku̧ tul woyri ɓaŋ pihna-ay kan ndɔk woyri.

⁷Ɓay Ŋgerzah ya̧ gel ké Zurusalem, ɓayu mgba law nzukri hi̧ ku dih fal Ŋgermbay. Ŋgi̧na woyri seh ma pol pol. Nzuk fe puhna Ŋgerzahri ŋgi̧-ŋgi̧ mí ya̧ ɓay Ŋgermbay Zezu ké haŋsekle woyri pi.

⁸Eten ra, lawsuki Ŋgermbay ke ŋgerna Tempuki mbah law ye hi̧ ni ke laɓ fe saŋri ɓa ŋgi̧-u ké pol yi̧n ye ziɓri.

⁹Ziɓ a ɓah nzak gerekri ƴo ri. Ku si misoŋ ziɓri ké riŋu sɔk sa̧w woyri ɓa mgbalri ké ti̧h ke ɓil mgbal da. A woyri-aw, ku ur ke tusiɓa Siren ke puh a luki Aleksandere. A ɓoruri ur ke tusiɓa Silisi ke Azi mbu̧h ziŋ niri pi. Ku ur ke fahɓay ziŋ Eten.

¹⁰Mí ku ta̧h vana mba ni ke ɓay kpu̧y ɓay nun ru̧na ké Tempuki hi̧ ni ke ɓah keni ɓay.

¹¹Wara mí ziɓri ké fahɓay ziŋ Eten ra, ku ɓaŋ ɓay ndoh ɓil law nzuk a haniri ɓay kú laɓ ɓay ziŋ Eten ɓahri : « Nah lah ɓay ɓahna ye gbur bolkusol Moyiz pi, ɓeɓ riŋ Ŋgerzah pi. »

¹²Sam ɓay ɓahna woyri kaŋaw mí, zaŋ law ziɓri ke law ŋgernzuk puh woyri ke law nzuk-sɔk mbete bolkusol Ŋgerzahri. Mí ku mgba Eten si keni gel-kuŋ salɓay.

¹³Bale ku gi ke nzukri kú-u ɓaŋ ɓay ndoh ɓil law woyri ra, mí kuŋ ɓay ku̧ nzak ye ɓahri : « Gunwo̧ro-ay, namri gbam, ke ƴo ɓeɓ vul ké su ɓay ƴona Ŋgerzah, ke ƴo ɓeɓ bolkusol Moyiz pi.

¹⁴Nah lah ɓay ɓahna ye ɓahri se, Zezu nzuk Nasareɗ ɓay dir vul kani-aw wuruk wuruk pi, ke él sɔɓ sa̧w fe laɓna Ŋgerzah ké Moyiz sɔk zih wahri ra pi. »

¹⁵Bale nzuk-kuŋ salɓayri gbam ko gel yi̧m ma tul Eten. Nun ye ndu̧y kandɔk nun tem nzak pihna Ŋgerzah kaŋ.