Read Karang Mbete Fe laɓna Tempuki 7 Bible Online

Mbete Fe laɓna Tempuki 7 - Karang bible

Mbete Fe laɓna Tempuki 7

¹Mí ŋgernzuk fe puhna Ŋgerzah vbi Eten ɓahri : « Mú ɓah ɓay wo, náh lah. Ɓayri kú-u ɓaŋ ku̧ tul wo-ay ra wa, ɓa ketina gaŋ le ? »

²Wara mí Eten yih nzak woyri ɓahri : « Bah biri ke yi̧n biri, í lah ɓay bi-ay ɓa teh-u. Ŋgerzah nzuk riŋ ɗina ti̧h nun zih wah Abaraham ke sew ké-e kaɓ tusiɓa Mezopotami, dara mí ke loh si na ké Haraŋ ɓáy[34].

³Ŋgerzah ɓah hi̧ Abaraham ɓahri : Mú poŋ tusiɓa wo ke sa̧w nzuk wori. Mú tɔr si tusiɓa ké mi ɓay sɔk mu.

⁴Bale Abaraham poŋ nzuk Kalderi ké Mezopotami. Ke tɔr si na Haraŋ. Fal hul bah ye bale, Ŋgerzah hi̧ ni ke loh gi na tusiɓa Kana ké nah na ri-ay.

⁵Mí Ŋgerzah wahɓay hi̧ ni tusiɓa-ay ɓa nzuku a ye ke gun zih yeri. Sewu-aw, ke mbuŋ gun ya ɓáy. Kana ɓa tusiɓa ye ya pi. Gel to-tom kara, ke ta keni ya.

⁶Ŋgerzah ɓah ɓay a ɓoru ɓahri : Sa̧wnzuk wori ɓay si na tusiɓa a ɓoru mbihmbam sɔɗ sɔɗ niŋ ɓa nzuk a gi-uri. Nzuk tusiɓa-awri ɓay laɓ niri ɓa mgbal. Ku ɓay sɔk nun seh woyri ɓa ŋgi̧-u pi[35].

⁷Mí Ŋgerzah el ɓahri : Mi kúŋ salɓay kan tul sa̧wnzuk ké mgba niri ɓa mgbalaw. Falu le, mi tén niri ke puh mgbal. Ku él gi kaɓ tusiɓa-ay ɓay dim mi ké ri.

⁸Kaŋ mí Ŋgerzah wahɓay ziŋ Abaraham. Ke ŋga̧h tul ɓayu ke bolkusol-kuŋ ndi̧w[36]. Abaraham mbuŋ Isak mí ke kuŋ ndi̧w ye ke nam a toŋndɔk seɗe-u[37]. Isak laɓ kaŋ ziŋ Zakoɓ[38]. Zakoɓ[39] kara laɓ kaŋ ziŋ gun yeri ké boh falu seɗe pi. Sa̧w zih wahri mí ɓa gun Zakoɓri[40].

⁹Zih wahri ra laɓ sere ziŋ toŋnafal woyri Zezeɓ. Ku mgba ni, mí ku yeh ni ɓa mgbal. Nzuk-yeh ni si ziŋ ni ké tusiɓa Eziɓte. Mí Ŋgerzah ƴo ziŋ ni kpatara[41].

¹⁰Ke ten ni ke ɓil koseh yeri riw. Ŋgerzah hi̧ law faroŋ mbay Eziɓte rih ni tul Zezeɓ. Ŋgerzah el hi̧ Zezeɓ ru̧na pi. Mí faroŋ mbi ni ɓa gɔŋrɔŋ ye ké tusiɓa Eziɓte. Ke ƴo ko kerpuh mbay faroŋ pi[42].

¹¹Sewu-aw ra, ɗaka bahpihya laɓ nzukri koseh kal ŋgoŋ ké tusiɓa Eziɓte ke tusiɓa Kana pi. Zih wahri kara ziŋ fe kú-u ɓay hɔl keni mun woyri ya[43].

¹²Bah woyri Zakoɓ lah ɓay fe su̧na ké Eziɓte bale, ke pih gun yeri si ri ɓa a titilu.

¹³Sina woyri a bɔk seɗe-u, Zezeɓ sɔk mun ye hi̧ yi̧n yeri tu ni. Mí faroŋ tu keni sa̧w in Zezeɓ.

¹⁴Wara mí Zezeɓ pih si ɗi bah ye Zakoɓ ke nzuk in ye a ɓoruri riw gi. Ŋgi̧na woyri gbam laɓ bon toŋndɔk say falu ndiɓi[44].

¹⁵A woyri gbam, ku si ɗeh puh ké Eziɓte. Zakoɓ hu ké ri. Zih wahri-aw kara, hu ké ri pi.

¹⁶Mí ku suk hul woyri el si mbek ké Sikem[45] ké hoh kasaw-mbek hul ké Abaraham yeh ké ta̧w gun Hamor-ri.

¹⁷Mí wahɓay ké Ŋgerzah wah ziŋ Abaraham ƴo laɓ wara. Sa̧w wah seh ma pol pol ké Eziɓte kpu̧ru ka̧h sew ké mbay a ɓoru lak mbay ké Eziɓte. A ye, ke tu ɓay Zezeɓ mba.

¹⁸

¹⁹Mbay ra mba nzuk wahri riw ke ru̧na. Ke mgba zih wahri ra ke ŋgere hi̧ niri ku fa̧h gun a peŋuri kú-u mbuŋ ɓa gun wo̧rori ku̧ kpah ɓay duh niri[46].

²⁰Ke sewu-aw mí, ku mbuŋ Moyiz. Ke ɓa gun pol tehna. Ku suk ni laɓ few say ké ɓil kerpuh bah ye[47].

²¹Nam kú-u mbi ni mu̧h ɓil suy ké ɓel mbih dale, gun faroŋ a wu̧yu si fi̧h ni, mí ke mbi ni el hɔl ni ɓa gun ɓil ye.

²²Ku sɔk Moyiz goso ru̧na nzuk Eziɓteri riw. Moyiz ra ti̧h ɓa nzuk gosoɓay ke goso pihnari, mí ke ŋger ɓilu.

²³Ke laɓ mbihmbam bon niŋ bale, kerɓay rih law ye ɓahri, ke sí ta̧w yi̧n ye, gun Izarayelri ɓay hekre niri ko.

²⁴Ka̧hna ye le, ke ziŋ nzuk Eziɓte a hani ƴo vba̧ yi̧n ye ɓa gɔɓrɔ. Ke si yih tul yi̧n ye. Mí ke vba̧ nzuk Eziɓte ra lih gbimgbiŋ ɓa hul. Ke dal baa yi̧n ye.

²⁵Moyiz ker ɓahri se, nzuk yeri ɓay tu ɓahri, Ŋgerzah lu ni ɓay ten niri ké ɓil mgbal, mí fe-u guh law woyri ya dih.

²⁶Tipele-u, ke el si ta̧w yi̧n yeri ra ɓáy le, ke ziŋ nzukri seɗe ƴo vba̧ hani. Ke yih ɓay kehr niri ɓay gɔl niri, mí ke ɓahri : A woiri i ɓa yi̧nri ba, ɓay fe mí i ƴo laɓ hani se kaŋay le ?

²⁷Mí nzuk ké ƴo gɔɓrɔ mbaŋ ye ra sɔkrɔ Moyiz ɓahri : A ge mí mbi mu ɓa mbay mini nzuk-kuŋ salɓay nzuk wahri le ?

²⁸Mu yih ɓay i mi kandɔk nzuk Eziɓte ké mu i kelew ra le ?

²⁹Moyiz ɓá lah ɓayaw gak dale, ke ɗuk si na Madyaŋ puh sa̧wnzuk a ɓoruri. Ke mbuŋ gun wo̧rori seɗe ké ri.

³⁰Bol falu laɓ mbihmbam bon niŋ dale, tem nzak pihna Ŋgerzah ti̧h nun ye ɓil lawkɔr ké ɓel kasaw Sinay. Ke ti̧h nun ye ké ɓil rim hɔrɔ ké gay kpuh, mí hɔrɔ-u se gay kpuh ya.

³¹Moyiz ko kaŋ, fe-u na ni yer ɓa fe saŋ. Ke loh ma ta̧wu ɗih ya ɓay ko sa̧wu ɓa teh-u bale, ke lah kusol Miƴori ɓahri :

³²A bi, mi ɓa Ŋgerzah, záh zih wori Abaraham, Isak, Zakoɓ. Bale hȩkme laɓ Moyiz. Mun ye to kpak kpak. Ke sa ko kona ma ma ri mba.

³³Gaŋ tul feri riw ɓah hi̧ ni ɓahri : Mú lu sabɔk wo ɓayu ké gel ƴona wo-ay ɓa gel ké mi ƴo ri.

³⁴Ketina, mi ko koseh nzuk biri ké Eziɓte ko. Mi lah vuhna woyri, mí-i ɗer gi yá̧ niri. Aŋay, namu ka̧h da. Mú gi. Mi píh mu si Eziɓte.

³⁵Moyiz ké yi̧n yeri sa ɓay ye ya, ku ɓahri se, a ge mí mbi mu ɓa mbay mini nzuk-kuŋ salɓay nzuk wahri ra, a ye gaŋ mí Ŋgerzah mbi ni ɓa mbay. Ke pih ni si ten yi̧n ye gun Izarayelri ké ɓil mgbal. Ŋgerzah pih ni ke ŋgerna tem nzak pihna ké sɔk mun ɓil rim hɔrɔ ké na gay kpuh ra.

³⁶Moyiz ra ten niri. Ke nda pol woyri. Ke laɓ fe saŋri ɓoɗ ɓoɗ ké ɓil tusiɓa Eziɓte pi, ké ɓil mahmbih a si̧h-u pi, ké ɓil lawkɔr mbihmbam bon niŋ pi[48].

³⁷Ɓa Moyiz gaŋ mí ɓah hi̧ gun Izarayelri ɓahri, Ŋgerzah ɓay lu gun nzak pihna a ɓoru ké sakra woyri eŋ mi Moyiz kaŋ[49].

³⁸A ye ké-e ƴo ziŋ zih wahri ɓil lawkɔr, ke ɓa nzuk ƴo haŋsekle zih wahri ke tem nzak pihna Ŋgerzah ké ɓah ɓay hi̧ ni ké tul kasaw Sinay. A ye mí, ke ya̧ ɓay ke nzak Ŋgerzah el gi ndazi hi̧ na[50]. Ɓayuri ɓa ɔkna ké na ɓa ŋgɔh.

³⁹Mí a ye ba, zih wahri ra sa lah ɓay ye mba. Tul woyri sɔɓ, mí ku sɔɓ fal woyri ti Moyiz el ɓaŋ law kan tul záhri ké Eziɓte

⁴⁰Ku ɓah hi̧ Aroŋ ŋgernzuk Moyiz ra ɓahri : Mú laɓ fe ɓa záh hi̧ ni ké nda pol wah. Moyiz ké ten na ké tusiɓa Eziɓte ra, nah tu fe ké ziŋ ni mba.

⁴¹Ke seh-aw, ku fa̧h lari lɔr ɓa ŋgi̧-u, ku vbo el mboh kɔk fe eŋ nday[51]. Ku gi ke fe puhna hi̧ ni ɓa záh woyri. Ku laɓ yim nday ké pol záh ké ku laɓ ke ndɔk woyri ra.

⁴²Wara mí Ŋgerzah sɔɓ fal ti niri. Ke poŋ niri dim záh feri ké ƴo nunmbam. Ke ɓah ɓil mbete vbehna gun nzak pihna a lewsa̧ri ɓahri : A woiri gun Izarayelri, fe puhna ké i puh ké ɓil lawkɔr laɓ mbihmbam bon niŋ ra wa, i puh hi̧ mi Ŋgerzah gaŋ le wo ? Kaŋ ya, i pɔr vul kani hi̧ záh Molok[52], i laɓ fe záh Rafan eŋ gunwu̧y nunmbam[53]. Fe záhri-aw ra, gelri riw ké i ƴo si ri, i suk ha̧rma keni. Záhri-aw, i laɓ ke ndɔk woiri, mí i ƴo dim niri. Sa̧wu mí-i ɓay ni̧h wuri ɓa ɗih-u kal tusiɓa Babiloŋ[54]. Mí ke ni̧h niri ra gaŋ ba.

⁴³

⁴⁴Ɓay vul kani Ŋgerzah ra mí na-ay : Moyiz pɔr vul ho̧ko ɓa gel fe puhna hi̧ zih wahri kandɔk ké Ŋgerzah hi̧ ni ke ko sam vulu ke nun ye. Ku mbek fe vbehna bolkusol Ŋgerzah ké-e ŋga̧h ziŋ zih wahri ké ri. Ku suk ha̧rma keni[55].

⁴⁵Vulaw ra, zih wah a lewsa̧ri poŋ hi̧ gun woyri. Ku suk si keni fal Zozuwe, ku rih keni tusiɓa-ay ké Ŋgerzah hi̧ niri. Ke hi̧ niri ku ni̧h sa̧w nzukri ké kaɓri-aw riw[56]. Ku kɔr vul kani a pɔru-aw kpu̧ru ka̧h sew ké Daviɗ lak mbay[57].

⁴⁶Daviɗ rih law Ŋgerzah rih. Ke vbi Ŋgerzah mahful ɓay ké mboh vul kani hi̧ ni ɓá na ɓa gel ƴona ye ké haŋsekle sa̧w nzuk ye gun Izarayelri[58].

⁴⁷Ŋgermbay Salomoŋ gun Daviɗ mí mboh vul ra hi̧ Ŋgerzah[59].

⁴⁸Mí keni-aw kara, Mbay a luki ké lak mbay tul feri gbam ta kaɓ ɓil vul ké nzukri mboh ya. Ŋgerzah pih gun nzak pihna ye a lewsa̧ ɓah ɓayu ɓahri :

⁴⁹Nunmbam ɓa fe kaɓna mbay bi. Tusiɓa ba, ɓa gel ku̧ bɔk bi. Sam vul a suŋ mí i ɓay mboh hi̧ mi le ? Vul ké mah ɓay mí ɔk mun bi ɓilu ƴo ri ley ?

⁵⁰Ɓa a bi gaŋ mí-i laɓ feri-aw riw ya le wo[60] ? Miƴori, Gaŋ tul feri riw ɓah kaŋ.

⁵¹A woiri, nzuk law kpuhnari. Suk woiri lah ɓay Ŋgerzah ya kandɔk sa̧wnzuk-kuŋ ndi̧w yari kaŋ. I mba gel mbamba. Zih woiri ƴo kpuh tul ziŋ Tempuki. A woiri kara, i ƴo kpuh tul ziŋ ni kaŋ pi.

⁵²Gun nzak pihna Ŋgerzah a suŋri mí zih woiri laɓ niri koseh ya le wo ? Ku i nzukri ké sɔk ɓay gina Nzuk lawpuki, mí aŋay, i ɔh tɔr pihna fe laɓna zih woiri da. Nzuk lawpuki ka̧h. Mí i mgba ni, i ɓaŋ ni ndoh ndɔk sa̧wnzuk a ɓoruri i ni, ɓayu mgba tul woiri.

⁵³A woiri ké Ŋgerzah pih bolkusol ye ke tem nzak pihnari hi̧ wuri, mí i ƴo tul bolkusolu ya gaŋ. »

⁵⁴Nzuk-kuŋ salɓayri ɓá lah ɓay ɓahna Eten kaŋ bale, law woyri zaŋ huɗ huɗ, mí ku su̧ sel woyri ŋger ŋger ké tul ye.

⁵⁵Eten ra, sa̧w siŋ sina ye ɓa Tempuki, mí ke ɔr nun ye, ke ko gel gbak gbak ma nunmbam le, ke ko gel tehna mun Ŋgerzah ké ndu̧y ver ver. Ke ko Zezu ƴo tul bɔk ɓa ndɔk lakna Ŋgerzah pi.

⁵⁶Ke ɓahri : « Í ko. Mi ko nunmbam na ŋgah. Mi ko gun nzuk pirmatul ké ɓa ndɔk lakna Ŋgerzah ƴo tul bɔk. »

⁵⁷Ku lah ɓayaw kaŋ bale, ku vba̧ nzak gɔm. Ku mbih suk woyri, mí ku ur yir gi guɓ ni.

⁵⁸Ku kɔklɔ ni ti̧h keni si fal puh Zurusalem. Nzuk-laɓ ɓay kan tul yeri lu mah gar woyri ku̧ ta̧w seke a hani ké riŋ ye ɓa Sɔl[61]. Ku titil vbuk ni ke kasaw ɓay i ni.

⁵⁹Ku ƴo vbuk Eten kɔɓ ɓáy bale, a ye ba, ke ƴo goŋ Ŋgerzah ɓahri : « Gaŋ bi Zezu, mi gi ma ta̧w wo. »

⁶⁰Ke huk siɓa, mí ke vba̧ nzak ɓeleŋ ɓahri : « Gaŋ bi, mú hi̧ ɓay hul bi-ay ɓá mgba tul woyri ya. » Ke ɓah kaŋ bale, ke lih ɓa hul.