Read Karang Mbete Fe laɓna Tempuki 8 Bible Online

Mbete Fe laɓna Tempuki 8 - Karang bible

Mbete Fe laɓna Tempuki 8

¹Sɔl kara ƴo fal ŋgaŋ nzukri ké i Eten ra pi. Nam kú-u i Eten ra bale, koseh a luki ziŋ sa̧w nzuk Ŋgermbayri ké Zurusalem. Mí ku gbakra hani kparki kparki ké tusiɓa Zude ke tusiɓa Samari, sa ɓa gun nzak pihna Ŋgermbayri mí toŋ ké Zurusalem.

²Nzuk law Ŋgerzahri vuh hul Eten ɗik ɗik[62]. Ku mbi hul ye si gɔr.

³A ye Sɔl ba, ke ƴo sɔk nun seh sa̧w nzuk Ŋgermbayri ɓa ŋgi̧-u. Ke si ke kerpuh kerpuh, ke mgba sa̧w nzuk Ŋgermbayri ke ŋgere si ku̧ vul mgbal. Ke laɓ wo̧rori ke wu̧yri gbam mah hani.

⁴Mí sa̧w nzuk Ŋgermbayri ké zikri-aw, ƴo sɔk ɓaysuki Ŋgermbay Zezu ke puhri gbam kú-u ɗuk si ri hi̧ nzukri lah.

⁵Kaŋ mí Filiɓ ba[63], ɗuk si puh a hani ké tusiɓa Samari, mí ke ka-kah ɓaysuki Ŋgermbay hi̧ nzuk puh-uri.

⁶Nzukri lah ɓaysuki Ŋgermbay ké Filiɓ sɔk, ku ko fe saŋri ké-e laɓ pi dale, ku te suk woyri keh lah ɓay ye ke law mbew.

⁷Záhri ti̧h ke vba̧ nzak ɓeleŋ ɓeleŋ ké tul daɓa nzukri, gɔmri ke nzuk kpereri ɓa ŋgi̧-u ziŋ mun gahna.

⁸Kaŋ mí nzuk puh-awri ziŋ law rihna ɓa ŋgi̧-u.

⁹Ke sewu-aw, nzuk sa̧wkpuh ƴo puh-aw. Riŋ ye ɓa Simu. Ke ko mun ye ɓa nzuk a luki. Ke laɓ fe saŋri ɓa ŋgi̧-u rɔk keni nzukri hi̧ niri ku kaɓ yer.

¹⁰Ŋgereri ke gunri gbam ko ni ɓa nzuk a kpakpaŋu. Ku ɓahri : « Nzukay ƴo ke huhrumun Ŋgerzah. Ɓa ŋgerna a luki gaŋ. »

¹¹Doro-u ɗi-ɗih ké-e ƴo rɔk nzukri ke fe laɓna ye-aw. Sa̧wu mí nzukri ɓaŋ law woyri kan tul ye.

¹²Mí Filiɓ gi sɔk ɓaysuki lak mbay Ŋgerzah ke riŋ Ŋgermbay Zezu bale, nzukri poŋ Simu el kan law woyri tul ɓaysuki ké Filiɓ sɔk, mí ke soh niri mbih batem, wo̧rori ke wu̧yri pi.

¹³Simu gaŋ kara ya̧ ɓay ɓahna Filiɓ pi. Fal ti̧hna ye ɓil mbih batem, ke poŋ fal Filiɓ ya, ke ko gel ka̧ah ɓay ŋgerna fe saŋri ké Filiɓ laɓ, mí ke kaɓ yer.

¹⁴Gun nzak pihna Ŋgermbayri ké Zurusalem lah ɓahri, nzuk Samariri ya̧ ɓay Ŋgerzah da. Mí ku pih Piyer ke Za̧h si ta̧w woyri.

¹⁵Ka̧hna Piyer ke Za̧h ra bale[64], ku goŋ Ŋgerzah ɓay ké hi̧ Tempuki ɓá ku̧ tul nzuk Samariri ɓayu kú-u ti̧h mbih batem kan riŋ Gaŋ tul feri riw a ye Zezu ké tul woyri, mí Tempuki ku̧ tul woyri ya ɓáy.

¹⁷Wara mí Piyer ke Za̧h ɓaŋ ndɔk kan tul woyri mbew mbew gbam, mí ku ya̧ Tempuki.

¹⁸Simu ko ani mí Tempuki gi ta̧w nzukri gelke gun nzak pihnari ɓaŋ ndɔk kan tul woyri ra. Ke ndar lari hi̧ Piyer ke Za̧h ɓahri : « Í hi̧ mi ŋgerna-aw le, mí ɓaŋ ndɔk kan tul nzuk le, nzuku ɓá ya̧ Tempuki kaŋ pi. »

²⁰Mí Piyer ɓahri : « Lari wo ɓá se hɔrɔ gbɔlɔk gbɔlɔk ziŋ mu ɓayu ké mu ker ɓahri, ku yeh fe ké Ŋgerzah hi̧ ndikpo ke lari.

²¹Fe ké Ŋgerzah hi̧ ra ɗih ziŋ mu ɗih, mu ta ɓilu ya. Law wo sih ndiŋ ndiŋ ké tul Ŋgerzah.

²²Kaŋ le mú mbi law wo ké tul kerɓay suya wo ma fal, mú el gi leh seh ké ta̧w Gaŋ tul feri riw. Le, law ye ɓay voh ké tul kerɓay wo-aw ɓáy.

²³Mi ko ɓahri, law wo zuŋ mbak mbak, kerɓay tukala ŋga̧h mu kiɗik kiɗik ɓa mgbal. »

²⁴Mí Simu el ɓah hi̧ Piyer ke Za̧h ɓahri : « A woiri gaŋ, í goŋ wuri Gaŋ woiri ɓay tul bi rɔkɔ fe ké i ɓah-ay ɓá laɓ mi. »

²⁵Falu ké Piyer ke Za̧h ɓah tehɓay Gaŋ tul feri riw, ku te-teh ɓayu hi̧ niri ku lah pi, mí ku el si Zurusalem. Elna woyri-aw, ku sɔk ɓaysuki hi̧ puhri ɓa ŋgi̧-u ké tusiɓa Samari.

²⁶Mí tem nzak pihna Gaŋ tul feri riw gi sɔk Filiɓ ɓahri : « Ur síɓa, mú mbi mahful a ɓel ɓil seh a fál ndɔk lakna[65], ful ké ɗer ke Zurusalem si Gaza. » Fulu, nzukri si ri ŋgi̧ ya.

²⁷Filiɓ tɔr bale, ke si ko nzuk Etiyopi a hani mbew. Ke ɓa pɔrɔ. Ke ɓa nun mbay Kandas ké ɓa mbay a wu̧yu ké lak mbay ké tusiɓa Etiyopi. Pihna ye ɓa kɔr fe ziŋna mbay. Ke si Zurusalem dim Ŋgerzah.

²⁸Elna ye ma puh, ke kaɓ ɓil sareɗ mbay ké ɗeŋeri ƴo kɔklɔ-u, ke ƴo ki̧ mbete vbehna Ezay gun nzak pihna Ŋgerzah a lewsa̧ ɓa mgbe-u.

²⁹Mí Tempuki sɔk Filiɓ ɓahri : « Mú si ma ɓel sareɗaw. »

³⁰Filiɓ ur ɗukna si ka̧h ɓel sareɗ ra bale, ke lah kusol nzuk Etiyopi ra ƴo ki̧ mbete vbehna Ezay gun nzak pihna Ŋgerzah a lewsa̧, mí Filiɓ vbi ni ɓahri : « Mbete ké i ki̧-ay ra wa, i lah sa̧wɓayu te-teh gaŋ le ? »

³¹Nzuk ra yih nzak ye ɓahri : « Nzuk-sɔk mi ta-a ba, ani mí-i tu sa̧wu le ? » Mí ke el ɓah hi̧ Filiɓ ɓá hil kaɓ ɓel ye ké ɓil sareɗ.

³²Gel ki̧na ké-e ƴo ki̧-u ra mí na-ay : Kandɔk sami kú-u maŋ ɓay si vbeh-u, gun sami kú-u ƴo su̧h pirma-u, ke vuh ya, ke fer ɓay ya. Ku kuŋ salɓay hul ɓa gɔɓ kan tul ye, mí ke ɗiŋ tul. A ge mí mah ko ɓay nzukri ke sew ye-aw ra le ? Ɓay fe le, ku i ni i [66].

³⁴Wara mí nzuk pɔrɔ ra vbi Filiɓ ɓahri : « Kɔkrɔya, mú sɔk mi ɓayay, mí lah. Gun nzak pihna Ŋgerzah-ay ɓah ɓay tul ge le ? Ɓay tul ye mini ɓay tul nzuk a ɓoru le ? »

³⁵Ur ke gel ki̧na-u-ay, Filiɓ sɔk ni ɓaysuki Zezu.

³⁶Ku ƴo si ful kɔɓ ɓáy, mí ku ti̧h nzak mbih dale, nzuk pɔrɔ ra vbi Filiɓ ɓahri : « Mbih mí na-ay. A fe mí gboh ɓay mú soh mi mbih batem le ? »

³⁸Nzuk pɔrɔ hi̧ ku ta̧h ƴo. A woyri ke Filiɓ, ku ɗer seɗe mbɔk si ɓil mbih, mí Filiɓ soh ni mbih batem.

³⁹Ku ti̧h ke ɓil mbih bale, Tem Gaŋ tul feri riw mbi Filiɓ zi rik rik. A ye, nzuk pɔrɔ ba, ke mbi mahful ye ke mun rihna, ke ko ni mba.

⁴⁰Filiɓ ba, ti̧h ké Azoɗ kpetere. Ke si par par sɔk ɓaysuki hi̧ nzukri puh ke puh ka̧h Sezareh.