Read Karang Mbete Fe laɓna Tempuki 9 Bible Online

Mbete Fe laɓna Tempuki 9 - Karang bible

Mbete Fe laɓna Tempuki 9

¹Ke sewu-aw, Sɔl ra toŋ laɓ nzukri ké dih fal Gaŋ tul feri riw koseh ɓa ŋgi̧-u. Ke ker ɓahri, ke í niri i. Mí ke ur si ta̧w ŋgernzuk fe puhna vbi ni ké vbeh mbete hi̧ ni ful rih ɓil vul misoŋ ziɓri ké Damas. Gelke-e ziŋ wo̧ronzuk mini wu̧ynzuk ké ko Zezu ɓa mahful le[68], ke mgbá niri ŋga̧h gi keni Zurusalem.

³Sɔl ya̧ mbete ra, ke mbi mahful. Ke toŋ ɗih ya ɓay ka̧h Damas dale, gel teh gberere kandɔk sakna mbam gi ɗoŋ tul ye gbuk.

⁴Mí ke lih gbirik vbu siɓa. Le ke lah kusol nzuk ɗi ni ɓahri : « Sɔl, Sɔl ma, ɓay fe mú-u faŋ bol bi ƴo laɓ mi koseh kari-ay le ? »

⁵Sɔl vbi ni ɓahri : « Mbay, i ɓa ge le ? » Mí ke ɓahri : « Mi ɓa Zezu ké mu faŋ bol bi ƴo laɓ mi koseh ra munu.

⁶Ur síɓa. Mú rih ɓil puh-aw gaŋ. Mu láh fe ké mu ɓay laɓu ɓáy. »

⁷Bɔh gahru Sɔlri ta̧h ƴo silili. Ku lah kusol mí ku ko nzuku ya.

⁸Mí Sɔl ur síɓa. Nun ye mgbu-mgbur kara, ke ko gel mba. Mí ku mgba ndɔk ye, ku maŋ ni si ka̧h Damas.

⁹Laɓ nam say, ke kaɓ ɓa ra̧w. Ké ɓil namawri, ke su̧ fe ya, ke nzo mbih ya pi.

¹⁰Ké ɓil Damas ra, nzuk-dih fal Ŋgermbay a hani-u ƴo ri. Riŋ ye ɓa Ananiya. Gaŋ tul feri riw ti̧h nun ye. Ke ɗi ni ɓahri : « Ananiya. » Ananiya yih nzak ye ɓahri : « Gaŋ bi, mi ƴo-ay. »

¹¹Gaŋ tul feri riw el ɓah hi̧ ni ɓahri : « Ur síɓa. Mú mbi ful ké haŋsekle puh kú-u ɗi ɓa mahful a ndaru. Mú si ka̧h kerpuh Zuda. Mú vbi nzuk Tarsi kú-u ɗi ni ɓa Sɔl. Mú ko, ke ƴo goŋ Ŋgerzah.

¹²Ké ɓil goŋna ye-ay, mi hi̧ ni ke ko fe. Ke ko mu Ananiya rih tul ye ɓaŋ ndɔk kan tul ye, mí ke el ko gel ɓáy. »

¹³Mí Ananiya el ɓahri : « Gaŋ bi, mi lah ɓay gun wo̧ro-aw ké nzak nzukri ya̧h ya̧h. Ku sɔk mi ɓahri, ke laɓ sa̧wnzuk wo ké Zurusalem koseh.

¹⁴Mí gina ye gelay kara, ke gi ke mbete ké ŋgernzuk fe puhna ke nzuk yeri vbeh hi̧ ni ɓay mgba nzuk a suŋ suŋ ké kan law tul wo ɓahri, mu ɓa Gaŋ ye. »

¹⁵Gaŋ tul feri riw ɓah hi̧ Ananiya ɓahri : « Mú si ɓay fe le, mi lu ni ɓa nzuku a bi. Ke si sɔ́k tehɓay riŋ ɗina bi par par hi̧ sa̧wnzukri ke mbay woyri ke gun Izarayelri pi.

¹⁶A bi gaŋ mí-i sɔ́k ni kosehri riw ké-e mah ɓay ko-u le, ke hí̧ riŋ ɗina bi mgbe ké sakra nzukri. »

¹⁷Bale Ananiya tɔr si rih tul Sɔl ké kerpuh Zuda. Ke ɓaŋ ndɔk kan tul ye. Ke ɓahri : « Yi̧n bi Sɔl. Gaŋ tul feri riw, a ye Zezu ké ti̧h tul wo ke mahful gina wo ra, ke pih mi ɓay mú el ko gel, ke pih mi ɓay Tempuki ɓá ya̧ mun wo gbam pi. »

¹⁸Sa gelaw mí fe ga̧y ke nun Sɔl eŋ hoy nzuy ku̧ siɓa. Ke el ko gel. Ke ur síɓa, mí ke ti̧h mbih batem.

¹⁹Ke su̧ fe, ke ziŋ ŋgerna. Sɔl kaɓ ziŋ nzuk-dih fal Ŋgermbayri ké Damas nam mah fe.

²⁰Ke geŋ ya, mí ke si sɔk ɓay riŋ ɗina Zezu hi̧ nzukri ɓil vul misoŋ woyri ziɓri ɓoɗ ɓoɗ ɓahri se, Zezu ɓa gun Ŋgerzah gaŋ.

²¹Ziɓri riw ké lah ɓay ɓahna ye kaɓ yer, ku ɓahri : « Ɓa a ye-ay ké-e sɔk nun seh nzuk Zezuri ké Zurusalem ra, mí ke gi gelay ɓay mgba nzukri ké riŋ nzukaw kan tul woyri ɓay si keni hi̧ ŋgernzuk fe puhna ke nzuk yeri, ya le wo ? »

²²Mí Sɔl ziŋ ŋgerna ma pol pol, mí ke sɔk tehɓay Ŋgermbay hi̧ ziɓri ké kaɓ Damas. Ku ziŋ ful mba ni ke ɓay ya. Ke sɔk niri ke gelu gelu ɓahri, Zezu ɓa Ŋgermbay ké Ŋgerzah mbi ni ɓa mbay gaŋ.

²³Laɓ nam mah fe ké Sɔl toŋ sɔk niri ɓay, mí ziɓri mbu̧h hani lek ɓay i ni.

²⁴Ku ƴo kɔr nzak mahfulri ké ti̧h ke ɓil puh Damas gbam suŋ ke seh ɓay mgba ni i ni. Lekɓay woyri toh suk Sɔl.

²⁵Gel ɓa suŋ, nzukri ké lah ɓay Sɔl mbi ni kan ɓil tɔlɔ. Ku ŋga̧h nzak tɔlɔ ra ke sal ɗer ni keni kan fal ila, mí ke tɔr.

²⁶Sɔl el si Zurusalem. Ke ƴah ful ɓay mbu̧h ziŋ nzuk-dih fal Ŋgermbayri, mí riw woyri ku ɗuk ni ɗuk. Ku ɓahri, ke ɓa nzuk-dih fal Ŋgermbay a ketina ya.

²⁷Barnabas mí ya̧ ni[69]. Ke maŋ ni si keni ta̧w gun nzak pihna Ŋgermbayri. Ke ndazi ɓay ti̧hna ké Gaŋ tul feri riw ti̧h nun Sɔl ké ful Damas, ke sɔk ɓay ké Ŋgermbay ɓah hi̧ Sɔl dara mí ke ɓay fe sɔkna ké Sɔl sɔk ɓa teh-u ra ke riŋ Zezu hi̧ nzukri ké Damas lah pi.

²⁸Kaŋ mí Sɔl ziŋ ful mbu̧h ziŋ niri mbew. Ke ha̧rma ziŋ niri ké Zurusalem dan fe zɔklɔ. Ke sɔk ɓay ɓa teh-u ke riŋ Gaŋ tul feri riw hi̧ nzukri lah.

²⁹Ke lu mberem ziŋ ziɓ a ɓah nzak gerekri. Ke fah ɓay ziŋ niri pi. Mí a woyri ba, ku ƴah ful ɓay i ni.

³⁰Ɓayu toh suk yi̧n yeri ɓil Ŋgermbay bale, ku maŋ ni si ka̧h Sezareh hi̧ ni ke tɔr ma Tarsi.

³¹Kandɔkaw, sa̧w nzuk Ŋgermbayri ké kaɓ tusiɓa Zude, Galile ke Samari riw, ku kaɓ ɗeŋ wara. Ŋgerzah hi̧ niri ku ƴo hu̧h ɓa vul gel ƴona ye. Ku ƴo hȩk Gaŋ tul feri riw ma pol pol ɓil siŋ sina woyri. Ku ƴo hew haniri ɓay tumbɔl Tempuki pi.

³²Ke sewu-aw, Piyer si ke puh puh ɓay ko sa̧wnzuk Ŋgerzah. Ke ka̧h ké Lida pi.

³³Ké ri, ke ziŋ wo̧ronzuk a hani. Riŋ ye ɓa Ene. Mun ye hu yɔh. Ke na sena-u mbihmbam toŋndɔk seɗe.

³⁴Piyer ɓah hi̧ ni ɓahri : « Ene, Ŋgermbay Zezu gah mu da. Ur síɓa. Mú kah hih wo. » Sa gelaw mí, ke ur síɓa.

³⁵Ur ke Lida ka̧h puh a ɓoruri ké tusiɓa Saroŋ riw, nzukri ko nzuk sena ké ziŋ mun gahna bale, ku poŋ fal fe laɓna suya woyri el kan law tul Gaŋ tul feri riw.

³⁶Ké Zope, wu̧y a hani ƴo ri. Ke ɓa nzuk-dih fal Ŋgermbay. Riŋ ye ɓa Tabita. (Ke sa̧w nzak gerek le, ɓa Dorkas[70].) Ke ƴo laɓ fe suki ŋgi̧ mbamba, ke ƴo mgba in ziŋ nzuk sehri kpatara.

³⁷Ke seh-u-aw, mun ye gi se ni. Ke ta̧h sɔrɔrɔ, mí ke hu. Ku soh ni mbih, mí ku mbi ni si kan ɓil vul fál síɓa vul-ka̧y tul hani.

³⁸Kandɔk ké Lida ɗih ya ke Zope, nzuk-dih fal Ŋgermbayri ké Zope lah ɓahri, Piyer ƴo Lida. Mí ku pih nzukri seɗe si ɗi ni ɓay ké gi ɓa gah-u, ké kaɓ sal sal ya.

³⁹Piyer ur si ziŋ niri. Ka̧hna ye bale, ku maŋ ni si ɓil vul fál síɓa vul-ka̧y tul hani ra. Wu̧y kaŋpeleri gbam gi ɗoŋ Piyer ke rew, ku kazi ɓayri. Ku sɔk ni gar haŋri ke mah gar-ri ké Dorkas kaŋ hi̧ niri.

⁴⁰Piyer ten nzukri gbam ma kala dara mí ke huk siɓa goŋ Ŋgerzah. Ke el sɔɓ nun ye ma tul hul ra, mí ke ɓahri : « Tabita, ur síɓa. » Hul ra mgbur nun ye ko Piyer, mí ke ur kaɓ síɓa.

⁴¹Piyer mgba ndɔk ye ɔr ni ƴo síɓa. Ke ɗi wu̧y kaŋpeleri ke sa̧wnzuk Ŋgerzah a ɓoruri, mí ke sɔk niri Dorkas ké el kaɓ ke nun wara.

⁴²Ɓayu ya̧ gel ya̧h ya̧h ké Zope bale, nzukri ɓa ŋgi̧-u kan law tul Gaŋ tul feri riw.

⁴³Piyer kaɓ Zope nam ro-ro. Ke na puh Simu nzuk-gbak ho̧ko[71].