Read Karang Mbete Rɔmri 1 Bible Online

Mbete Rɔmri 1 - Karang bible

Mbete Rɔmri 1

¹A bi Pɔl mgbal Mbay Zezu, ké riŋ gun nzak pihna Ŋgermbay kan tul bi. Ke mbi mi hi̧ mí mi ka-kah ɓaysuki Ŋgerzah ké si tul gun ye.

²Ɓaysuki gun ye-ay, Ŋgerzah wahɓayu lewsa̧ kaŋ, mí ke hi̧ gun nzak pihna yeri vbeh ɓayu ku̧ ɓil mbete ye kandɔkay : Gun ye ra, ke ti̧h ɓa nzuk pirmatul, sa̧w mbuŋna ye ɓa som siɓa[1] ɓil mi̧hri Daviɗ mbay a luki. Ke ti̧h ɓil sakra hulri ɓa nzuk pirmatul, sa̧wu ɓa Tempuki. Ke el sɔk ni ke huhrumun ɓa gun Ŋgerzah. A ye Ŋgermbay Zezu Gaŋ wah.

⁵Tumbɔl ye mí nah ziŋ lawsuki. Nah ti̧h ɓa gun nzak pihnari ké si ta̧w sa̧wnzuk a ɓoruri gbam hi̧ kú lah nzak Ŋgerzah ɓay law woyri ké te sa tul ye hi̧ riŋ Ŋgermbay mgbe.

⁶Mí a woiri kara i ƴo haŋsekle nzukri-aw ké riŋ Ŋgermbay Zezu kan tul woyri pi.

⁷Mi vah wuri, gun sana Ŋgerzahri gbam ké i kaɓ Rɔm, ké Ŋgerzah ɗi wuri ɓa sa̧w ye. Mi vah wuri ke ɗeŋ ke lawsuki ké ur ké ta̧w Bah wah Ŋgerzah, ké ur ké ta̧w Gaŋ tul feri riw a ye Ŋgermbay Zezu.

⁸Titil ɓay bi le, mi el ke tumbɔl hi̧ Ŋgerzah bi kpatara ke riŋ Ŋgermbay Zezu ɓay tul woiri gbam ɓay fe le, mberem kanlaw woiri ké tul ye ya̧ gelri gbam ké tusiɓa-ay.

⁹Ŋgerzah tu-tu, a ye ké tem bi ƴo dim ni ke nzak pihna ɓaysuki gun ye ra, ke ƴo lah goŋna bi, mi ɗi riŋ woiri ɗi kpatara.

¹⁰Mi ƴo goŋ ni dan ɔkna, ke poŋ ful hi̧ mi le, mi sí ta̧w woiri ɓáy.

¹¹Mi tasa̧y si kó wuri ɓay mí wal fe hi̧na Tempuki a hani ziŋ wuri le, í ŋger keni.

¹²Kaŋ dale seh ké mi ká̧h sakra woiri le, náh so wuri haniri ɓay law wahri ké te sa tul Ŋgermbay mbew, law woiri te sa tul Ŋgermbay kandɔk a bi ké law bi te sa tul ye pi.

¹³Mi yih ɓay í tu wuri yi̧n biri, mi lek mun bi le, mi lek ra ɓáy ɓay si ta̧w woiri, mí kpu̧ru ka̧h aŋay, mi ziŋ si-u ya. Mi ka̧h le, mi só wuri hi̧ í leh lehna lawsuki le, mi zíŋ lehna a hani ké sakra woiri kandɔk ké mi ziŋ ké ta̧w sa̧wnzuk a ɓoruri pi.

¹⁴Mbɔl na tul bi ɓay mí puh-u. Mbɔlu ɓa sí ta̧w sa̧wnzukri gbam, ta̧w nzuk ru̧nari ke kɔk nzukri, ta̧w nzuk nun a mgbururi ke ra̧wri, mi puh-u gaŋ.

¹⁵Kandɔkaw mí mi tasa̧y sí ka-kah ɓaysuki Ŋgerzah ké si tul Ŋgermbay Zezu ra hi̧ wuri, a woiri ké i kaɓ Rɔm pi.

¹⁶Su̧hru ɓaysuki ra se mi ya. Ɓaysuki-u mí ɓa huhrumun Ŋgerzah ké hi̧ nzukri gbam ké kan law tulu el ma ta̧w ye ɓa záh woyri, gun Izarayelri a woyri ziɓri pol dara mí sa̧wnzuk a ɓoruri kara pi.

¹⁷Ɓayu ké Ŋgerzah ƴo tul ɓay ye ké-e ŋga̧h ɓa záh woyri, ketina ye ten mun ké ɓil ɓaysuki-aw. Sa̧w ŋga̧hna-u ti ké ta̧w Ŋgerzah si ka̧h ta̧w nzukri hi̧ ku ƴo ziŋ ni kandɔk kú-u vbeh lewsa̧ ɓahri, nzuk ké ƴo tul sal in ké Ŋgerzah ŋga̧h ziŋ ni ɓa záh ye le, sa̧w ɔkna nzuku ɓa law mbew ké ɗɔr sal in ya[2].

¹⁸Haŋ fa̧hna Ŋgerzah ten mun ké nunmbam gi ka̧h tusiɓa da, mí na tul fe laɓna nzuk pirmatulri kú-u poŋ ni ɓa záh woyri. Hȩ́k ni ta-a. Ku poŋ ni, ku el gɔɓrɔ ketina ɓil kuŋɓay woyri.

¹⁹Keni-aw gbam, nzuk pirmatulri mah tu Ŋgerzah ɓa teh-u ɓay fe le, Ŋgerzah mí hi̧ niri ku tu ni.

²⁰Ur ke sew-laɓ nunmbam ke tusiɓa kaŋ mí nzuk pirmatulri ko ni ke nun ya kara, ku ƴo ko ŋgerna ye ké na ɓa ŋgɔh ɓay feri ké-e laɓ, ku ƴo ko riŋ ɗina záh ye ɓa teh-u ɓay fe-uri pi, mí ku mah tu ni keni, sɔk ɓahri, mahful ya̧m mun woyri ta-a.

²¹Ku tu Ŋgerzah tu, mí dimna le, ku sa dim ni ɓa záh woyri ya. Ku sa el ke tumbɔl hi̧ ni ya pi. Bale kerɓay woyri na kpo̧k hi̧ ku ti̧h suk ya. Law woyri sih nduŋ ke kɔk ɓay.

²²Ku ɗi mun woyri ɓa nzuk ru̧nari, mí ku ti̧h ɓa kɔkɔri dara mí ku mboh fe tem záhri ké ba hani ke nzukri ké ɓay pu-puŋ[3], nayri, gundoyri, fe kuhru ke selhaŋri soh keni gel dimna Ŋgerzah a ye Ŋgɔhnzuk.

²⁴Wara mí Ŋgerzah poŋ nzuk pirmatulri hi̧ ku laɓ fe kandɔk ké law woyri yih. Ku mbi mun woyri laɓ fe-se su̧hru keni ké haŋsekle haniri.

²⁵Ku el kom ketina Ŋgerzah ke kuŋɓay. Ku hȩk feri ké-e laɓ, ku el dim fe-uri poŋ ni ye Nzuk-laɓ fe-uri-aw ké-e mah pirna sew ke sew gelu munu.

²⁶Sa̧wu mí Ŋgerzah poŋ nzuk pirmatulri rih ɓil fe laɓna su̧hru woyri kandɔk ké law woyri tasa̧yu. Wu̧yri poŋ sa̧w fe laɓna woyri, ku kom ná ke wo̧rori el na ke haniri wara.

²⁷Wo̧rori ba, poŋ sa̧w fe laɓna woyri. Ku kom ná ke wu̧yri el na ke haniri. Ɗaka ná ke wo̧ronzuk mbaŋ woyri mí se niri. Wo̧ronzuk ke wo̧ronzuk ƴo laɓ fe-se su̧hru, mí ku ƴo ziŋ kpaŋndɔk fe laɓna-reh ful woyri keni.

²⁸Kandɔk ké nzuk pirmatulri sa tu ni ɓa Ŋgerzah ya ra, ke poŋ niri ku dih fal kɔk kerɓay woyri, mí ku ƴo laɓ fe ké mah laɓna ya.

²⁹Sam fe laɓna a pipiri-uri ɓoɗ ɓoɗ gbam mbah law woyri : póŋ wahɓay, law a sih-u, kó nun fe, láɓ suya. Ku mbah ke sere, í hul, ɓala, kér law, gak law, láɓ nani.

³⁰Ku ƴo mbi riŋ haniri, ku fu̧y Ŋgerzah, ku pahra nzak, ku hu̧h tul, ku gar ɓay, law woyri ƴo ker ɓay laɓ suya, ku poŋ ɓay nzuk-mbuŋ niri.

³¹Kerɓay woyri na kpo̧k, ku sel wahɓay woyri. Mgbá in ta-a, kerseh ta-a.

³²Ku tu salɓay Ŋgerzah tu-tu. Ku tu ɓahri se, nzukri ké laɓ sam fe a kandɔkawri mah hul, mí ku ƴo tul laɓu kaŋto ya le, ku haŋ ndɔk hi̧ nzukri ké ƴo laɓu pi.