Read Karang Mbete Rɔmri 10 Bible Online

Mbete Rɔmri 10 - Karang bible

Mbete Rɔmri 10

¹I ɓa yi̧n bi ɓil Ŋgermbay, mí kerɓay tul sa̧w bi gun Izarayelri na sa law bi. Mi ƴo vuh hi̧ Ŋgerzah ɓay ké hi̧ niri, kú ti̧h ɓil salɓay hul.

²Mi mah lu lakna ɓay woyri ɓahri, ku ri̧h si̧w ɓay tul Ŋgerzah gaŋ, mí ku ri̧h si̧wu dan tu sa̧wu.

³Sal in ké Ŋgerzah ŋga̧h ziŋ ziih Abaraham ra, guh law woyri ya. Ku ƴo leh ŋgerna woyri ke mun kaŋ. Ku sa hi̧ Ŋgerzah ɓá na ɓa mbay tul sal in ké-e ŋga̧h ziŋ ziihri ra ya. Ku ƴah ful ɓay na ɓa mbay tul sal inu,

⁴ɓayu ké bolkusol Ŋgerzah bal tul ɓayu ɓahri, Ŋgermbay ɓa mahsa̧w bolkusolu mí hi̧ Ŋgerzah ŋga̧h sal in ziŋ nzukri gbam ɓa záh woyri, a woyri kú-u kan law tul Ŋgermbay.

⁵Moyiz vbeh ɓay mahsa̧w bolkusol ké hi̧ Ŋgerzah ŋga̧h sal in ziŋ nzuk ɓa záh ye ra ɓahri se, nzuk ké ƴo tul ɓayu ɔh le, ke ƴo ke ɔkna ɓay tul bolkusolaw[39].

⁶Kaŋ le sa̧w ŋgá̧h sal in ziŋ Ŋgerzah ra ɓa kanlaw tul ye ké ndɔk ye ɗɔr sal inu ya, mí sal inu ɓah kandɔkay : Ko-ko mú vbi law wo ɓahri [40], a ge mí ɓay hil si nunmbam gi ke Ŋgermbay le [41] ? Ɓayu mgba tul ɗerna Ŋgermbay gi tusiɓa-ay.

⁷Ko-ko mú vbi law wo ɓahri, A ge mí ɓay ɗer si puh záhri ɓay ya̧ ɓay Ŋgerzah [42] ? Ɓayu mgba tul ti̧hna Ŋgermbay ké sakra záhri.

⁸Mí bolkusol ɓah ani le ? Ke ɓahri, ɓayu ƴo ɗih ya ké ta̧w wo, na nzak wo, na law wo pi[43]. Ɓayu mí ɓa ɓay law ké te sa tul sal in Ŋgerzah ké nah ka-kah-u ke riŋ Ŋgermbay

⁹ɓahri se, nzak wo ɓah ketina ké na ɓil law wo ɓahri, Gaŋ tul feri riw mí ɓa Zezu, law wo te tul ye pi, mí mu ɓahri se, Ŋgerzah ten ni ké sakra záhri ke pa̧ymun a foyu dale, mu ƴó ziŋ Ŋgerzah ɓa suki.

¹⁰Gelke law nzuk kan tul sal in Ŋgerzah le, Ŋgerzah ŋga̧h sal in ziŋ nzuku ɓa záh ye. Nzak nzuk ba, ɓah ketina ra le, ke ƴo ziŋ Ŋgerzah ɓa suki.

¹¹Mbete Ŋgerzah ɓahri se, law nzuk ké te sa tul ye le, su̧hru ta se nzuku ya[44].

¹²Ɓa ra ziɓ mini sa̧wnzuk a ɓoru kara, gbam mah hani, ɓayu ké Gaŋ tul feri riw mbew, ke ƴo laɓ suki si wɔrɔk ziŋ nzukri gbam ké ɗi ni ɓa záh woyri.

¹³Kandɔkaw mí nzuk a suŋ suŋ ké ɗi Gaŋ tul feri riw le, nzuku ɓay ƴo ziŋ ni ɓa suki[45].

¹⁴Mí-aw ba, ani mí ku ɓay ɗi ni a ye kú-u kan law tul ye ya ɓáy le ? Ani mí ku ɓay kan law tul ye dan lah ɓay ké si tul ye le ? Nzuk-ka-kah ɓayu ta-a le, ku lah ani le ?

¹⁵Mí nzuk pih niri ya ba, ku ka-kah-u hi̧ nzukri ani le ? Kandɔk kú-u vbeh lewsa̧ ɓil mbete Ŋgerzah ɓahri, nzak pihna a suki ka̧h nzukri, gina gun nzak pihna-u ndɔh mbamba[46].

¹⁶Nzak pihna-u ka̧h niri kara ta ɓa gbam woyri mí ku ya̧ ɓaysuki hul Ŋgermbay ya kandɔk Ezay ɓah lewsa̧ : Gaŋ tul feri riw, a ge mí kan law tul nzak pihna ké nah ka-kah-u ra le[47] ?

¹⁷Kaŋ dale sa̧w kanlaw ra ur ke nzak pihna ké nzukri lah, mí nzak pihna-u ra, ɓa ɓay Ŋgermbay.

¹⁸Mi vbi ɓahri, nzak pihna ɓaysuki ra ka̧h ta̧w woyri ya le ? Nzak pihna-u ka̧h niri ka̧h gaŋ kandɔk ku-u vbeh ɓayu lewsa̧ ɓahri : Kusol woyri mgbe ɓeleŋ ɓeleŋ ɔh tusiɓa gbam. Nzak pihna woyri ya̧ gel ya̧h ya̧h ka̧h gbu̧h tusiɓa [48].

¹⁹Mí a a̧w ba, mi vbi ɓahri, nzak pihna ɓay Ŋgermbay ka̧h gun Izarayelri ya ley ? Lewsa̧ kara ɓay hi̧ niri kú lah ɓay ye, Ŋgerzah hi̧ Moyiz ɓahri se, mi páhra wuri ɓay laɓ sere ɓay sa̧wnzukri ké na kpo̧k, mi sɔ́krɔ wuri ɓay laɓ haŋ fa̧hna ɓay tul sa̧wnzuk a kɔkuri[49].

²⁰Kandɔkaw mí Ezay ŋgu̧h lɔkɔkɔ, ke ɓahri, Sa̧wnzukri ké tu ƴah mi ya, ku ziŋ mi. Mi ti̧h nun sa̧wnzukri ké tu vbi ɓay bi ya.

²¹Mí ɓay tul gun Izarayelri ba, ke ɓahri, nam ke nam mi ƴo ndar ndɔk bi ɗi keni sa̧wnzuk bi gun Izarayelri. Ku u̧m nun woyri, ku ma̧y ɓay ɓahna bi.