Read Karang Mbete Rɔmri 11 Bible Online

Mbete Rɔmri 11 - Karang bible

Mbete Rɔmri 11

¹Kaŋ dale mi ƴo vbi ɓahri, Ŋgerzah poŋ fal sa̧wnzuk ye gun Izarayelri ra po-poŋ le ? Kaŋ ya. A bi Pɔl ra mi ɓa gun Izarayel ké fál ndɔk Benzameh, mi ɓa mi̧hri Abaraham gaŋ.

²Ŋgerzah poŋ fal sa̧w nzuk yeri ké-e tu niri pol ra ya[50]. Ɓay Eli kú-u vbeh na ɓil mbete Ŋgerzah lewsa̧ ra, i tu ya le wo ? Eli vuh mun ye sek gun Izarayelri keni ké pol Ŋgerzah ɓahri,

³Gaŋ tul feri riw, ku i gun nzak pihna wori. Ku vbar gel fe puhna wori. Mi toŋ ke hȩk bi, mí ku ƴah ful ɓay i mi [51].

⁴Mí-aw ba, Ŋgerzah yih nzak Eli ani le ? Ŋgerzah yih nzak ye ɓahri : Mi kɔr nzukri sɔɗ sɔɗ boh gel toŋndɔk say (7.000) ƴo ri. A woyri-aw ku huk pol záh a ɓoruri ya. Záh ké ɓa Bahal kara ku huk pol ye ya[52].

⁵Kaŋ mí sew a aŋay kara ké sakra gun Izarayelri, Ŋgerzah kɔr mi̧hri ye ké riŋ ye kan tul woyri ƴo ri. Ɗina-u si mbew ke lawsuki ye.

⁶Kandɔk ké ɗina ye ur ke lawsuki ye ra dale, sa̧w ziŋu ta ɓa fe laɓna nzukri ya. Gelke sa̧w ɗina-u ur ra ke fe laɓna nzuk gaŋ le, lawsuki ye ra ta ɓa lawsuki ya.

⁷Le ɓayu ra na ani munu ? Sal in Ŋgerzah ké gun Izarayelri ƴah ke fe laɓna woyri ra ku ziŋ ya[53]. Gun Izarayel a ɓoruri ké riŋ Ŋgerzah na tul woyri ɓa záh woyri ba, ku zi-ziŋ. Gun Izarayel a a̧yri ké ziŋ ya ba, law woyri kpuh. Ɓayu guh law woyri ya kandɔk kú-u vbeh lewsa̧ ɓahri, Ŋgerzah poŋ niri ɓil ndɔk záh a hani hi̧ tul woyri yih dik dik [54], nun woyri ko fe ya, suk woyri lah ɓay ya pi kpu̧ru ka̧h guri-ay [55].

⁹Daviɗ mbay a luki kara ɓah lewsa̧ si tul woyri ɓahri, fe su̧na ti̧hmbih woyri ɓá ti̧h ɓa ndaw, ɓa kȩke, ɓa gburka, ɓa kpaŋndɔk woyri.

¹⁰Mí nun woyri ɓá sih nduŋ kú ko gel mba, tak woyri ɓá ra̧h ŋgole ŋgole [56].

¹¹Mi vbi ɓahri, ɓé tul bɔk woyri ɓa lihna wu̧m ley ? Ɓé tul bɔk woyri-aw bale, selna ka̧h keni ké ta̧w sa̧wnzuk a ɓoruri mí Ŋgerzah ti̧h ɓa záh woyri. Selna-aw ƴo sɔkrɔ gun Izarayelri laɓ sere[57].

¹²Mí ɓé tul bɔk woyri ɓa fe ziŋna sa̧wnzuk tusiɓari gbam, él fal woyri gi ke suki ké ta̧w sa̧wnzuk a ɓoruri ra wa, ɓay na ani ɓáy hi̧ sa̧wnzuk a ɓoruri gelke ku lek gel kaɓna woyri guk guk ké ta̧w Ŋgerzah ba ? Ɓay ndɔh mbamba.

¹³Wara mí-i ƴo ɓah hi̧ wuri sa̧wnzuk a ɓoruri kandɔkay : Ké mi ɓa gun nzak pihna si ta̧w sa̧wnzuk a ɓoruri ra le, sí ke ɓay nzak pihna-aw mí-i vba̧ haŋ ɓilu.

¹⁴Vbá̧ haŋ bi-aw mi pahra keni gun Izarayelri kú-u ɓa mun hay bi ɓay kú laɓ sere. Ko ya le, a haniri ɓay ƴo ziŋ Ŋgermbay ɓayu.

¹⁵Ŋgerzah to suy woyri ma fal hi̧ sa̧wnzuk tusiɓari gbam mgba nzak nzaw ziŋ ni, mí ke el mgba gun Izarayelri ndɔk seɗe ba, ɓay na ani ɓáy le ? Ɓay na ɓa ɔkna hi̧ nzukri ké ɓay ti̧h ke hul wara.

¹⁶Tul fe pay ɓa fe Ŋgerzah le, tɔr fe payu gbam ɓa nunu a Ŋgerzah. Sa̧w kpuh ɓa fe Ŋgerzah le, nzakndɔk kpuh-u gbam ɓa nunu a ye pi[58].

¹⁷Sa̧w nzuk biri ɓa nzakndɔk kpuh, mí ku kuŋ nzakndɔk a hani-uri ma fal dale, ku mbɔhlɔ mu a wo sa̧wnzuk a ɓoru ké mu ɓa nzakndɔk kpuh a kpah ké sakra-u, mí mu ƴo nzo boɗo ké sa̧wu hi̧ mbew.

¹⁸Ko-ko mú nda giri tul nzakndɔk a kuŋuri-aw. Mu ma-mah ɓay nda giri, mí ta ɓa a wo mú-u hɔl sa̧w kpuh-aw ya. Le ɓa sa̧wu mí hɔl mu.

¹⁹Dale mu ɓáhri, ku kuŋ nzakndɔk kpuhri ɓay mí soh mbɔhlɔ gel woyri.

²⁰Ketina. Kuŋna woyri laɓ kandɔkaw ɓayu kú-u poŋ Ŋgermbay. A wo ba, ɓay kanlaw mú-u mbɔhlɔ kpuh. Le ful hú̧h tul wo ta-a. Mú ko tul wo ma.

²¹A ké Ŋgerzah kuŋ gun Izarayelri kandɔk nzakndɔk kpuh ra wa, ke mah kuŋ mu a wo nzakndɔk kpuh a kpah pi ya le ?

²²Dale mú lah ɓay lawsuki Ŋgerzah ke ɓay kpuhna ye mbɔk. Kpuhna ye na tul nzukri ké lih, mí suki ye ƴo ziŋ mu. Mu kaɓ ɓil suki-aw ya le, ku ɓay kuŋ mu kandɔk nzakndɔk kpuhri-aw pi.

²³Mí gun Izarayelri ɓá kaɓ ra ɓil law kpuhna woyri ya le, ku él mbɔhlɔ niri ɓáy. Ŋgerzah ƴo ke huhrumun ɓay el mbɔhlɔ niri ɓa foyu ɓáy.

²⁴A wo ké sa̧w wo ɓa kpuh a kpah, ku mbɔhlɔ mu ké kpuh a ma̧-u, ani mí a woyri ké sa̧w woyri ɓa kpuh a ma̧-u ra ba, ku él mbɔhlɔ niri ké mahsa̧w woyri ya le ?

²⁵Yi̧n biri, mi yih ɓay í tu sa̧wɓay ké Ŋgerzah mu̧h lewsa̧ rɔkɔ í ɗi mun woiri ɓa ru̧nari. Ɓay fe le law kpuhna gun Izarayel a haniri ra ɓay na kaŋ kpu̧ru ka̧h sew ké nzukri ké sa̧w woyri ɓoɗ ɓoɗ gbam ɓay mbu̧h ɓa sa̧w mbew ɔh dara ɓáy.

²⁶Kaŋ mí nzukri gbam kú-u ɓa gun Izarayelri[59], ku ƴó ziŋ Ŋgerzah ɓa suki gaŋ, kandɔk kú-u vbeh lewsa̧ ɓahri, nzuk-ya̧ nzukri ɓay ti̧h ké Siyoŋ gi. Ke lú law-saŋ Ŋgerzah ké sakra mi̧hri Zakoɓ ma fal[60].

²⁷A a̧w ɓa salɓay ké mi ŋga̧h ziŋ niri ɓay laɓu sew ké mi nzóm ɓay ké tul woyri[61].

²⁸Fál ɓaysuki hul Ŋgermbay le gun Izarayelri ɓa nzukbaa ɓay tul woiri sa̧wnzuk a ɓoruri. Mí fál ɗina le ku ɓa gun sanari ɓay tul zih woyri

²⁹ɓayu ké ɗina Ŋgerzah ke suki ké-e hi̧ ra vbiru ta-a.

³⁰Lewsa̧ ra a woiri sa̧wnzuk a ɓoruri, i mba nzak Ŋgerzah, mí aŋay Ŋgerzah mgba in ziŋ wuri ɓay tul mbá nzak gun Izarayelri.

³¹Kandɔkaw mí aŋay ku mba nzak Ŋgerzah ɓayu ké Ŋgerzah mgba in ziŋ wuri, hi̧ ɓo a woyri kara Ŋgerzah ɓá mgba in ziŋ niri pi.

³²Ŋgerzah vba̧ kpaŋ ɗoŋ nzukri gbam ɓil mbá nzak woyri ɓay ké mgba in ziŋ nzukri gbam.

³³Ahna ndɔk Ŋgerzah, ru̧na ye, goso fe tuna ye si wɔrɔk wo. Nzuk mah fakla salɓay ye ya, nzuk ké mah faŋ mahful ye ka̧h gbu̧h ta-a [62].

³⁴A ge wara mí tu kerɓay Gaŋ tul feri riw le wo ? A ge mí mah hew ni le [63] ?

³⁵A ge mí ta ni fe ɓay ké el puh mbɔlu le [64] ?

³⁶Ɓay fe le sa̧w feri gbam ur ké ta̧w ye, ƴona woyri ɓa a ye, ɓay el ma ta̧w ye pi. Kandɔkaw mí riŋ ɗina ɓa nzuku a ye sew ke sew. Gelu munu.