Read Karang Mbete Rɔmri 12 Bible Online

Mbete Rɔmri 12 - Karang bible

Mbete Rɔmri 12

¹Aŋay dale yi̧n biri ɓay law in Ŋgerzah ké-e mgba ziŋ na ra mi ƴo hew wuri keni : Í hi̧ mun woiri ɓa fe puhna a nunu[65]. Sam fe puhna-aw mah nun Ŋgerzah mí ke ya̧ ɓa pihna nzuk kani ké i laɓ hi̧ ni, ké si ke gelu gelu.

²Mí í ndɔl fe laɓna tukala a seway ya. Wara le í hi̧ Tempuki[66] ɓá sɔɓ wuri í ru̧ ma pol pol ma. Le i ɓay tu fe ké law Ŋgerzah yih, i tú ke mun woiri law yihna ye na ɓa suki, ndɔ-ndɔh, ƴo gelu ɓa fe gama.

³Tumbɔl lawsuki ké Ŋgerzah laɓ ziŋ mi, mí-i ƴo ɓah hi̧ a ge ge ké sakra woiri ɓahri se, kerɓay nzuk a suŋ suŋ le ɓá hu̧h tul ya. Wara le a ge ge ɓá ko tul ye mah ke kerɓay a ru̧-u ké gi ke kanlaw tul Ŋgerzah ké-e wal hi̧ na mbew mbew

⁴Kandɔk ké mun nzuk ƴo ke kehrna ɓoɗ ɓoɗ ra mí kehrnari-aw le pihna woyri kara ɓoɗ ɓoɗ pi.

⁵Kaŋ pi mí a wah ké nah ɓa daɓa ra nah ɓa mun mbew ziŋ Ŋgermbay, mí nah mbɔhlɔ hani hani.

⁶Nzuk a suŋ suŋ le ɓay lawsuki Ŋgerzah mí ke hi̧ nzuku ŋgerna ɓoɗ ɓoɗ. Ɓa ra ŋgerna-ten sa̧wɓay ké Ŋgerzah ɓaŋ ndoh ɓil law nzuk kara nzuku ɓá ten sa̧wɓayu si mbew ke kanlaw tul Ŋgerzah,

⁷ɓa ra ŋgerna-so nzukri kara ké so, ɓa ra ŋgerna-sɔk fe kara ké sɔk,

⁸ɓa ra ŋgerna-hew nzukri kara ké hew, ɓa ra ŋgerna-na ɓa balak nzuk kara ké zukru mun ya, ɓa ra ŋgerna-nda pol nzukri ɓa suki ké hi̧ tul ɓilu, ɓa ra ŋgerna-ker seh nzuk kara ké laɓ ke mun rihna.

⁹Law sana ta mbu̧h ke nzak seɗe ya dale, fe a pipiri-u, ɓá na ɓa fe fu̧yna woiri. Suki le, ɓá na ɓa fe mbɔhlɔ wuri.

¹⁰Law in le, ɓá na ɓa fe ké hi̧ law woiri te tul hani. Hȩ́k hani ba, ɓá na ɓa fe ké i kpak hani tulu.

¹¹Zayna law woiri ɓay laɓ suki ɓá na ɓa fe ké i ta ke zoh ɓilu ya, Tem ké mun woiri ɓá na ɓa fe ké ɗaŋ ké mun woiri kaɗ kaɗ, Ŋgermbay le, ɓá na ɓa nzuk ké i laɓ pihna hi̧ ni.

¹²Suki ké i geŋ, ɓá na ɓa fe law rihna woiri, koseh ké i ko, ɓá na ɓa fe ké i ƴo su̧h law ɓilu, ɓayri ké i ƴo ɓah ziŋ Ŋgerzah ɓá na ɓa fe laɓna ké i ƴo tulu kȩk,

¹³fe zɔklɔ ké ziŋ sa̧w nzuk Ŋgerzahri, ɓá na ɓa fe ké i ƴo ɓilu ziŋ niri, mgbá gahruri ndɔk seɗe ɓá na ɓa fe ké i takra laɓu pi.

¹⁴Í lu mgbɔkɔ ku̧ tul nzukri ké laɓ wuri koseh. Í lu mgbɔkɔ, í haɓ fe ya.

¹⁵Le nzukri ké ƴo ke law rihna, law woiri ɓá rih ziŋ niri. Nzukri ké ƴo vuh rew, law woiri ɓá se ziŋ niri.

¹⁶Í ko haniri mah hani, kó mun ɓa nzuk a luki ɓá ta-a. Í mgba̧hra ke ko̧hkori ma. Ko-ko í ko mun woiri ɓa ru̧nari.

¹⁷Mbɔl suya ba, puh ke suya ya, kerɓay-laɓ suki hi̧ nzuk a suŋ suŋ gbam ɓá na ɓil law woiri hi̧ kú ko.

¹⁸Mahful ƴo ri ké fál ta̧w woiri le, í hi̧ ɗeŋ ɓá ƴo haŋsekle woiri ke nzukri gbam.

¹⁹Gun sanari dál baa ke mun woiri ɓá ta-a dale, í poŋ ful hi̧ law fa̧hna Ŋgerzah mí ɓá dal baa-u kandɔk kú-u vbeh lewsa̧ ɓahri, dál baa ɓa fe bi, mi sɔ́r mbɔlu[67]. Kaŋ mí Gaŋ tul feri riw ɓah.

²⁰Í dal baa ya, wara le ɗaka i nzukbaa woiri le, mú hi̧ ni fe su̧na. Kɔkmbih i ni, í hi̧ ni mbih. Láɓ kaŋaw ɓa fá̧h hȩkre hɔrɔ ke hɔrɔ-u ku̧ tul ye munu[68].

²¹Kandɔkaw mí suya ɓá mba tul wo ya. Mú mba tul suya ke suki ma.