Read Karang Mbete Rɔmri 13 Bible Online

Mbete Rɔmri 13 - Karang bible

Mbete Rɔmri 13

¹Ŋgerzah mí hi̧ lák mbay. Nzuk a a̧yri ké ƴo ri-ay, lák mbay woyri gbam ur ké ta̧w ye. Mí nzuk a suŋ suŋ le ɓá hȩk nzuk-lak tusiɓari.

²Nzukri ké kpuh tul ziŋ nzuk-lak tusiɓari le, ku mba nzak Ŋgerzah munu, mí nzukri ké ƴo kpuh tulaw ƴah salɓay ku̧ tul woyri ke mun woyri

³ɓayu ké nzuk-kuŋ salɓayri ta ɓa nzuk-se hȩkme ɓay nzuk-laɓ sukiri ya. Le ku ɓa nzuk-se hȩkme ké ta̧w nzuk-laɓ suyari. Mí mu sa ɓay hi̧ nzuk-lak tusiɓari ɓá se mu hȩkme ya le, mú laɓ suki, ku pír mu pir.

⁴Ɓay fe le ku ƴo laɓ pihna hi̧ Ŋgerzah ɓay suki wo. Mí mu laɓ suya le, hȩkme ɓá se mu. Ku uk mahwu̧y ndikpo ya. Ku ƴo laɓ pihna hi̧ Ŋgerzah le, ku uk ɓay sɔk keni law fa̧hna ɓay kuŋ salɓay tul nzukri ké laɓ suya.

⁵Sa̧wu mí su-su ɓay hȩk nzuk-lak tusiɓari ɓay salɓay kú-u kuŋu kaŋto ya. Le ɓay law a teh-u mí mu hȩk niri.

⁶Kandɔkaw mí í puh lampoh hi̧ niri pu-puh. A woyri ba, ku ƴo laɓ pihna hi̧ Ŋgerzah, ku ƴo poŋ mun woyri hi̧ pihna-u.

⁷Í hi̧ a ge ge le, fe ké-e vbi. Ɓa ra lampoh kara í hi̧ nzuk lampoh. Ɓa ra fe mbu̧hna kara í hi̧ nzuk fe mbu̧hna. Ɓa ra hȩkna kara í hȩk nzuk hȩkna. Ɓa ra rohna kara í roh nzuk-lak tusiɓari.

⁸Mbɔl ɓá na tul woiri ya. Mbɔl ƴo ri le, ɓá na ɓa mbɔl law sana ké i sa haniri. Nzuk ké sa nzuk a ɓoru le, ke ƴo tul bolkusol ɔh ke gelu gelu gbam.

⁹Bolkusol ɓahri se, mu mbí wu̧y mbaŋ wo ya, mu í hul ya, mu rí-riɓa ya, mu ɓáŋ law wo kan tul fe nzuk ya. Ɓayayri ke ɓay a ɓoruri gbam mbu̧h ma ɓil ɓay ké na-ay : Mu sá nzuk mbaŋ wo eŋ mun wo kaŋ.

¹⁰Law sana laɓ fe a se-u ziŋ mbaŋ wo nzuk pirmatul ya. Law sana mí bal tul ɓay bolkusol.

¹¹Kaŋ mí i tu wuri tu, sewu ka̧h da, ɓa sa̧wseh tóm ke nam woiri ɓay kaɓ ke nun mí na-ay. Ur ke seh ké nah kan law tul Ŋgermbay, nah ziŋ wahɓay pa̧ymun a foyu. Aŋay le ziŋu ɗih mba.

¹²Suŋ sih mí gel fa̧h hoh. Tipele ɗih ziŋ na mba. Náh lur wuri fe laɓna tirim, náh ndoh wuri gel tehna ɓa fe rem wah.

¹³Náh si wuri siŋ sina ké si ke se-seh-aw ma. Yim nday ɓá ta-a, tá yim ɓá ta-a, mbí hani ɓa riɓa ɓá ta-a, lɔ́m hani ɓá ta-a, ɓál hani ke sere kara ɓá ta-a pi.

¹⁴Dale í mbi wuri Gaŋ tul feri riw, a ye Ŋgermbay Zezu í ndoh ni ɓa gar riŋ ɗina woiri. Í lu kerɓay-laɓ fe ké voh ɗaka haymun woiri ma fal.