Read Karang Mbete Rɔmri 14 Bible Online

Mbete Rɔmri 14 - Karang bible

Mbete Rɔmri 14

¹Í ya̧ nzukri ké kan law tul Ŋgermbay ké kanlaw woyri ŋger ya. Í ya̧ niri dan fah hani tul kerɓay woyri.

²Nzuk-kan law a hani kan law tul Ŋgermbay ɓahri, fe su̧na a suŋ suŋ gbam mah su̧na. Nzuk-kan law a ɓoru ké kanlaw ye ŋger ya ba, ke lak ɓa gahay[69].

³Nzuk-kan law a a̧y ké ƴo su̧ feri gbam ra ɓá ko mbaŋ ye ké lak gahay ɓa fe a garu ya. Mí a ye ké-e ƴo lak gahay kara law ye ɓá laɓ ɓay kan tul mbaŋ ye ya a ye ké-e poŋ sa̧w fe laɓna sa̧w ye mí ke ko fe su̧na a suŋ suŋ mah su̧na ra. Ŋgerzah ya̧ ni ya̧-ya̧.

⁴A wo ra mu ɓa ge mí law wo laɓ ɓay kan tul gun kaɓna nzuk le ? Gun kaɓna ra ƴo ɓa kpuh-u mini ke lih kara ɓa ɓay bahgaŋ ye munu. Mí ke ƴo-u gaŋ ɓayu ké Gaŋ tul feri riw ƴo ke huhrumun hi̧ ni, ké ƴo.

⁵Nzuk-kan law tul Ŋgermbay a hani-u ko nam ti̧hmbihri mba tul nam a ɓoruri. Mbaŋ ye ba, ko namri riw mah hani. A ge ge le ɓá ƴo tul kerɓay ye kerɓay ye.

⁶Nzuk-kan law tul Ŋgermbay ké hȩk nam a haniri ɓa nam a luki ra, ke hȩk ɓay tul Gaŋ tul feri riw. Mbaŋ ye ké ko fe su̧na a suŋ suŋ mah su̧na ra, ke su̧ ɓay dim keni Gaŋ tul feri riw, ke el ke tumbɔl hi̧ Ŋgerzah. Mí nzuk-saŋ fe su̧na a haniri kara ke saŋ ɓay dim keni Gaŋ tul feri riw, mí ke el ke tumbɔl hi̧ Ŋgerzah pi, ɓayu ké sakra wah-ay nzuk a suŋ suŋ kaɓ tukala ɓay tul ye ya. A ge ge ké hu kara hul ye ta ɓa nzuku a ye ya pi.

⁸Nah kaɓ tukala, sa̧w kaɓna wah ɓa Gaŋ tul feri riw. Mí nah hu kara nah hu ke riŋ Gaŋ tul feri riw. Ɓay fe le nah kaɓ ke nun mini nah hu kara nah ɓa nunu a Gaŋ tul feri riw.

⁹Sa̧wɓay hul Ŋgermbay ke ti̧hna ye ke pa̧ymun a foyu hi̧ ke na ɓa Gaŋ tul hulri ke nzuk a ƴo ke ɔknari riw[70].

¹⁰A wo mu ɓa ge mí law wo laɓ ɓay kan tul yi̧n wo lo ? A wo-ay ba, mu ɓa ge mú-u ko yi̧n wo ɓa fe a garu le ? Ɓayu ké riw wah, nah ɓay si ndiseŋe Ŋgerzah.

¹¹Ku vbeh lewsa̧ ɓahri, na ani ani gaŋ kara mi kaɓ ke nun, a bi Gaŋ tul feri riw mi ɓah kaŋ. Nzukri gbam ɓay huk pol bi, ku pír Ŋgerzah ke nzak woyri ɓahri, mi ɓa Gaŋ tul feri riw[71].

¹²Kaŋ mí a ge ge ké sakra wah ɓay ki̧ fal fe laɓna ye ke mun ye hi̧ Ŋgerzah.

¹³Dale náh hi̧ law wah ɓá laɓ ɓay kan tul mbaŋ wah ya. Le í hi̧ law woiri ɓá mgba ɓay ké na-ay ma : Í ɓaŋ kasaw-ɓe bɔk kan pol yi̧nri ya, í hɔl ndaw lihna kan pol yi̧nri ya.

¹⁴Mi tu-tu, a bi ké mi ƴo mbew ziŋ Gaŋ tul feri riw a ye Zezu, kerɓay bi-ay ƴo gelu : Fe su̧nari gbam mah nun ye mah. Mí nzuk ké ko fe a hani-u mah nun ye ya le, fe-u mah nun ya hi̧ nzuku gaŋ ba.

¹⁵Gelke fe su̧na wo a hani ɓeɓ law yi̧n wo le, siŋ sina ké mu si-aw ra ɓa siŋ sina law sana ya. Fe su̧na wo ɓá zi yi̧n wo ɓil ɓeɓna ya. A ye ra Ŋgermbay hu ɓay tul ye.

¹⁶Dale nzukri ɓá ɓal suki woiri-aw ya.

¹⁷Puh lakna Ŋgerzah-ay ɓa ɓay fe su̧na ya, ɓa ɓay fe nzona ya. Le ɓa ƴó ke Ŋgerzah ɓa záh nzuku, ɓa ɗeŋ, ɓa law rihna ké ur ké ta̧w Tempuki.

¹⁸Nzuk ké ƴo laɓ pihna-u hi̧ Ŋgermbay kandɔkaw, ke rih law Ŋgerzah rih. Nzukri ba, pir ni pir.

¹⁹Kaŋ le náh ƴah wuri siŋ sina ké si mah hani ke ɗeŋ, ké hi̧ gunri ké ɓil kerpuh-u hu̧h ke haniri.

²⁰Fáh hani tul fe su̧na ɓá ɓeɓ pihna ké Ŋgerzah laɓ ya. Ketina fe su̧nari gbam mah su̧na mah, mí fe su̧na ti̧h ɓa ɓay, ɓa ndaw hi̧ nzuk ké su̧ le, fe su̧na-u su ya.

²¹Kandɔkaw mí ɓay fe a a̧y ké hi̧ law yi̧n wo ruklu le, su-su ɓay mú gboh mun wo, mú lak hay ya mini mú nzo yim ya mini mú su̧ fe a hani ya ɓay hi̧ law yi̧n wo ɓá ruklu ya.

²²Kanlaw wo ra mí mú ƴo keni ké nun Ŋgerzah. Nzuk ké law ye laɓ ɓay kan tul ye ke mun ya ɓay fe su̧na ké-e ko ɓa suki ra pol tehna Ŋgerzah ƴo ziŋ nzuku.

²³Mí salɓay mgba tul nzuk ké law ye nzah ɓay tul fe ké-e su̧. Ɓay fe le sú̧ fe-aw ur ke kanlaw tul Ŋgermbay ya. Dale fe laɓna a suŋ suŋ gbam ké ur ke kanlaw ya ra ɓa suya.