Read Karang Mbete Rɔmri 15 Bible Online

Mbete Rɔmri 15 - Karang bible

Mbete Rɔmri 15

¹A wah ké kanlaw wah tul Ŋgermbay lɔkrɔ da, mbɔl na tul wah ɓay so nzuk-kan lawri ké kanlaw woyri lɔkrɔ ya. Náh ƴah ɓay tul wah ya.

²Ké sakra wah a ge ge le ɓá ƴah suki ɓay tul mbaŋ ye ɓay hi̧ sa̧w in Ŋgermbay ɓá hu̧h ɓa mun ké mbew ɓa suki,

³ɓayu ké Ŋgermbay ƴah ɓay tul ye ya kandɔk kú-u vbeh ɓay ɓahna ye lewsa̧ ɓahri, Ŋgerzah, farna ké nzukri far mu ra ku̧ tul bi[72].

⁴Ɓayri kú-u vbeh ɓil mbete Ŋgerzah lewsa̧-aw, ku vbeh ɓa fe firma hi̧ na le, hewna ke sú̧h law ké nah ziŋ ɓil mbete-ay ra ƴo hi̧ na ɓaŋ law kan tul suki ké ƴo geŋ na.

⁵Ŋgerzah, a ye ké-e ɓa sa̧w hewna ke sa̧w sú̧h law ɓá hi̧ wuri law mbew ké si mbew ke law Mbay Zezu

⁶ɓo law mbew ke kusol mbew woiri-aw í loŋ keni riŋ Ŋgerzah a ye bah Ŋgermbay Zezu Gaŋ wah.

⁷Sa̧wu mí í mgba wuri hani ma law kandɔk Ŋgermbay ké mgba wuri ma law ye ɓay riŋ ɗina Ŋgerzah.

⁸Mi ɓahri se, Ŋgermbay ti̧h ɓa gun-laɓ pihna hi̧ sa̧wnzuk Ŋgerzah a woyri gun Izarayelri ɓay tul ketina Ŋgerzah. Pihna mgbal Ŋgermbay hi̧ wahɓayri ké Ŋgerzah ŋga̧h ziŋ zih woyri laɓ ɔh ke gelu gelu.

⁹Ɓay tul law in ye, ke ti̧h ɓa gun-laɓ pihna hi̧ sa̧wnzuk a ɓoruri pi mí riŋ Ŋgerzah loŋ keni kandɔk kú-u vbeh lewsa̧ ɓahri, sa̧wu mí a bi Ŋgermbay mi ɓáh ketina wo ké sakra sa̧wnzuk a ɓoruri, mi ɗí siŋ loŋ riŋ wo[73].

¹⁰Ku vbeh ra ɓáy ɓahri, a woiri sa̧wnzuk a ɓoruri, í zay mun ziŋ gun Izarayelri ké ɓa sa̧wnzuk Ŋgerzah[74].

¹¹Ra ɓáy, a woiri sa̧wnzukri riw, í pir wuri a ye Miƴori. A woyri nzukri gbam, í dim wuri ni, riŋ ye loŋ ɗik ɗik[75].

¹²Ezay gun nzak pihna Ŋgerzah a lewsa̧ ɓah ra ɓáy ɓahri se, gun ké mi̧hri Zeseh[76]ɓay ti̧h ɓa tul. Ke lák mbay tul sa̧wnzuk a ɓoruri, mí ku ɓáŋ law te tul suki ké ur ké ta̧w ye[77].

¹³Kandɔkaw mí Ŋgerzah nzuk sa̧w suki-aw ɓá hi̧ law rihna ke ɗeŋ ya̧ mun woiri gbam, a woiri ké law woiri te sa tul ye hi̧ law woiri mbah zɔk gbɔh gbɔh ke suki ké i ƴo geŋu ke huhrumun Tempuki.

¹⁴A bi ke mun bi kara mi tu ɓay woiri te-teh, yi̧n biri. Law woiri mbah ke suki, sam fe tunari ɓoɗ ɓoɗ gbam poh wuri ya, i ma-mah ɓay hew haniri.

¹⁵Bale mi ŋgu̧h lɔkɔkɔ vbeh ɓay a haniri ɓil mbete-ay ɓay law suki ké Ŋgerzah laɓ ziŋ mi ɓa dúm law hi̧ wuri. Mi ti̧h ɓa gun-laɓ pihna Mbay Zezu hi̧ sa̧wnzuk a ɓoruri. Pihna bi-aw ɓa pihna nzuk kani. Fe pihna kani bi ɓa ɓaysuki Ŋgerzah ké si tul hul Ŋgermbay hi̧ Ŋgerzah ya̧ keni sa̧wnzuk a ɓoruri ɓa fe puhna ké Tempuki lek mah nun ye.

¹⁷Kaŋ mí ké mi ƴo ke Mbay Zezu ɓa gun-laɓ pihna ye ra, mi vba̧ haŋ keni ké pol Ŋgerzah.

¹⁸Mi ŋgu̧h lɔkɔkɔ ɓah ɓay mbew yaŋ, mi ɓah ɓay pihna Ŋgermbay ké-e mbi keni mun bi hi̧ sa̧wnzuk a ɓoruri ɓá lah nzak ye mí-i ŋgu̧h tulu. Ke ƴo laɓ pihna ye ke ɓay pi ke fe laɓna pi ke fe saŋri pi ke huhrumun Tempuki pi. Kandɔkaw ɓaysuki hul Ŋgermbay ra mi ka-kah-u par par ur ke Zurusalem sa̧ ka̧h keni tusiɓa Iliri gbam.

²⁰Wara mí-i taw mun bi si ka-kah ɓaysuki-aw ke gelri ké lah riŋ Ŋgermbay ya ɓáy, ɓay rɔkɔ mí mboh vul bi ké tul diŋ vul ké nzuk a ɓoru ti.

²¹Mí mi si sina kandɔk kú-u vbeh ɓayu lewsa̧, sa̧wnzuk a a̧yri kú-u sɔk niri nzak pihna ya, ku ɓay ko ni. Sa̧wnzuk a a̧yri ké lah nzak pihna ké si tul ye ya, ɓay lah-u[78].

²²A a̧w mí gboh mi bɔk ŋgi̧-ŋgi̧ ɓay si ta̧w woiri.

²³Mí aŋay ba, pihna bi ɔh ké fál kɔrayri da. Laɓ mbihmbam ŋgi̧-ŋgi̧ law bi yih ɓay si ta̧w woiri.

²⁴Mi yih kalna bi ma Espa̧y le, mi kó wuri, mi káɓ ziŋ wuri ndi̧ ɓay hi̧ law bi ɓá voh dara í pih mi ma pol ɓáy.

²⁵Mí aŋay ra sa̧wnzuk Ŋgerzah ké tusiɓa Maseduwan ke tusiɓa Akay pih mi ma Zurusalem ke nzak pihna ɓay hi̧ sa̧w nzuk Ŋgerzahri ké ri.

²⁷Ku ƴo ke law rihna pih mi ke fe ziŋna woyri hi̧ mbaŋ woyri ké Zurusalem ké ƴo ɓil koseh ɓayu ké wal fe ziŋna woyri-aw, ku ko ɓa mbɔl ké tul woyri. Ku tu ɓahri se, sa̧w fe samna a suki kú-u ziŋ ke Tempuki ti ké ta̧w gun Izarayelri le, ɓa mbɔl ké tul woyri kú-u puh-u hi̧ Ŋgerzah ɓa law mbew ziŋ niri.

²⁸Kaŋ mí-i ka̧h ke fe hi̧na woyri-ay ɓa suki, mi ɔh nzak pihna bi-ay le, mi tɔ́r si Espa̧y. Sina bi-aw mi kál ké ta̧w woiri.

²⁹Mi tu-tu, mi ká̧h ta̧w woiri. Ka̧hna bi-aw ɓa baw mgbɔkɔ Ŋgermbay mí-i si keni.

³⁰Le mi ƴo goŋ wuri yi̧n biri ke riŋ Gaŋ wah Ŋgermbay Zezu ke law sana Tempuki, í ruh ŋgermu ziŋ mi ké ɓil góŋ Ŋgerzah woiri ɓay tul bi,

³¹ɓay mí ti̧h ké ndɔk nzuk tul kpuhnari ké tusiɓa Zude ɓa suki pi, ɓay sa̧wnzuk Ŋgerzah ké Zurusalem ɓá ya̧ sona-ay ra ke law rihna pi.

³²Dara mí í goŋ Ŋgerzah ɓay seh ké-e poŋ ful hi̧ mi ka̧h ta̧w woiri le, mí ɔk mun bi ndi̧ ké ta̧w woiri ke law rihna.

³³Ŋgerzah ƴo ziŋ wuri gbam, a ye nzuk sa̧w ɗeŋ, gelu munu.