Read Karang Mbete Rɔmri 2 Bible Online

Mbete Rɔmri 2 - Karang bible

Mbete Rɔmri 2

¹Sa̧wu mí ya̧m mun ta-a. Nzuk pirmatul, mu ɓa ge ra wara mú-u ɓaŋ ɓay kan tul nzuk mbaŋ wo lo ? Ɓay fe le ɓay ké mu ɓaŋ kan tul mbaŋ wo-aw, mgba tul wo da ɓayu ké mu ƴo laɓ fe-u pi.

²Nah tu wuri tu, nzukri ké ƴo laɓ fe a kaŋawri ra, kúŋ salɓay Ŋgerzah si tul woyri ke gelu gelu ɓa ketina.

³Nzuk pirmatul, ɓayu ké mu mgba mbaŋ wo ke ɓay, mí mu toŋ laɓu ra wa, salɓay Ŋgerzah ta mgba tul wo keni ya le ?

⁴Uwa, mu ɓahri, iklaw ye, káɓ ɗeŋ ye, lawsuki ye gbam ɓa kɔk fe. Mu tu ya le wo ? Lawsuki ye ké-e yih laɓ ziŋ mu ra ƴo ɓay kɔklɔ mu ké ɓil tí̧h zer wo el gi ta̧w ye.

⁵Mí tul wo kpuh, mu sa mbi law wo ké tul fe laɓna wo ya. Mu ƴo hi̧ haŋ fa̧hna Ŋgerzah ka̧y tul hani ka̧y tul hani ɓay tul wo. Ké ɓil sew haŋ fa̧hna ɓa sew ké ketina salɓay Ŋgerzah ten mun, fe-u ɓay toh tul wo.

⁶Mí ke hí̧ nzuk a suŋ suŋ le kpaŋndɔk mah ke fe laɓna ye, fe laɓna ye[4].

⁷Nzukri ké ƴo ƴah riŋ ɗina, ƴah pirna, ƴah káɓ ɓa ŋgɔh, mí ku su̧h law ƴo laɓ suki le, kpaŋndɔk woyri ɓa ɔkna sew ke sew.

⁸Mí nzukri ké lah nzak rɔkna kú-u sɔɓ fal ti Ŋgerzah, mí ku to ketina ma fal ɓay ɓil woyri le, kpaŋndɔk woyri ba, ɓa haŋ fa̧hna ké ur tuh tuh.

⁹Koseh ke fe-se law na ɓay tul nzuk a suŋ suŋ ké pihna woyri ɓa láɓ suya titilu ké tul sa̧w ziɓri pol dara mí sa̧wnzuk a ɓoruri pi.

¹⁰Riŋ ɗina, pirna, ɗeŋ ɓa nzuku a nzukri gbam ké ƴo laɓ suki, sa̧w ziɓri pol dara mí sa̧wnzuk a ɓoruri pi.

¹¹Kandɔkaw, Ŋgerzah kehr nzuk ya.

¹²Mí sa̧wnzukri ké ta ke bolkusol Ŋgerzah ya, ku laɓ suya le, ku zíŋ ɓeɓna ɓay suya woyri kú-u laɓ dan bolkusol ra. Ziɓri ba, ku ƴo ke mbete bolkusol Ŋgerzah, ku laɓ suya le, bolkusolaw mí salɓay woyri ɓay kuŋ keni.

¹³Ɓay fe le tú bolkusol kaŋto mí hi̧ Ŋgerzah ŋga̧h sal in ziŋ nzuk ya. Wara le, nzukri ké ƴo tul bolkusol ye mí Ŋgerzah ɓay ŋga̧h sal in ziŋ niri.

¹⁴Gelke sa̧wnzuk a ɓoruri ké ta ke mbete bolkusol Ŋgerzah ya, mí fe laɓna woyri mah hani ke bolkusol ye dale, a woyri kú-u ta ke mbete bolkusol ya ra, bolkusolaw mí na law woyri.

¹⁵Fe laɓna woyri ƴo sɔk ɓahri, bolkusol Ŋgerzah vbeh kan law woyri da. Kerɓay woyri ke law woyri ƴo lu lakna ɓayu ziŋ hani mbɔk. Ku ƴo ruh ziŋ hani. Seh a ɓoru le, ƴo laɓ ɓay kan tul woyri. Seh a hani bale, ƴo ten tehɓay woyri.

¹⁶Namu mí Ŋgerzah ƴo ten ɓay ké mu̧h ɓil law nzukuri, ɓay kehr ɓay ké si mah hani ke ɓaysuki Mbay Zezu ké mi ka-kah-u.

¹⁷Mí a wo ziɓ ké mu vba̧ haŋ ɓay sa̧w wah ké ɓa ziɓ, mu poŋ mun wo ɓu ɓil mbete bolkusol Ŋgerzah, mu vba̧ haŋ ɓay sa̧w záh wah Ŋgerzah.

¹⁸Mu tu fe ké-e yih, mu hi̧ tul wo hi̧ mbete bolkusol ké sɔk mu mahful Ŋgerzah ke gelu gelu.

¹⁹A wo ziɓ, mu ko sa̧w wo, mí mu ɓahri, mu ɓa gun-mgba ka̧w ra̧wri. Mu ko sa̧w wo ɓa gel tehna sa̧wnzuk a ɓoruri ké ƴo ɓil tirim.

²⁰Mu ɓahri, mu ɓa nzuk-sɔk bolkusol hi̧ kɔk sa̧wnzukawri-aw ké tu bolkusol ya. Mu ɓahri, mu ɓa nzuk-nda pol gunri pi, sɔk ɓahri, ziɓ ƴo ke mbete bolkusol, mí mu ziŋ fe tuna ke ketina ké ri.

²¹Kaŋ mí a wo ziɓ, mu sɔk ɓay Ŋgerzah hi̧ sa̧wnzuk a ɓoruri, mí mu sɔk tul wo ya dih lo ? Mu sɔk ɓahri, riɓa su ya, mí mu ri-riɓa ley ?

²²Mu ɓahri, nunpuki su ya, mí mu laɓ nunpuki ley ? Mu gen fe záh a ɓoruri ŋgeŋ ŋgeŋ, mí mu lɔm fe kani záhri-aw ley ?

²³Mu ƴo vba̧ haŋ ɓay bolkusol, mí mu ko Ŋgerzah mah nun wo ya, ɓayu ké mu poŋ bolkusol ye.

²⁴Sa̧wnzuk a ɓoruri ko, mí ku sak riŋ Ŋgerzah ɓay tul woiri[5]. Kaŋ mí ku vbeh kan ɓil mbete lewsa̧.

²⁵Mu hȩk bolkusol Ŋgerzah le, kúŋ ndi̧w ké Ŋgerzah lu keni ziɓri ɓa fe a kpakpaŋu hi̧ mu, mí mu to suyɓay bolkusol Ŋgerzah ma fal le, sa̧w wo mah hani ke sa̧wnzuk ndi̧w ɓɔlri.

²⁶Mí nzuk ndi̧w ɓɔl ba, ke ƴo tul ketina bolkusol Ŋgerzah le, Ŋgerzah ɓay ko ni ɓa sa̧wnzuk-kuŋ ndi̧w, ya lo ?

²⁷Kaŋ mí a ye ké sa̧w ye ɓoɗ ké-e kuŋ ndi̧w ya, ke ƴo tul bolkusol ra ɔh, ke ndíh mu ke ɓay, a wo ziɓ ké mu ƴo ke mbete bolkusol, ké mu ƴo kuŋ ndi̧w, mí mu to suyɓay bolkusol Ŋgerzah ma fal,

²⁸ɓayu ké tí̧h ɓa ziɓ ɓa fe ké nzuk ko ke nun ya. Kúŋ ndi̧w kara ɓa haymun kaŋto ya pi.

²⁹Mí tí̧h ɓa ziɓ le, sa̧wu na ɓil law. Kúŋ ndi̧w kara ɓa sal in ké Tempuki ŋga̧h ké law, ta ɓa sal in kú-u ŋga̧h ké mbete ya. Ziɓ a kandɔkaw, nzuk-pir riŋ ye ta ɓa nzuk pirmatul ya, mí ɓa Ŋgerzah mí pir ni[6].