Read Karang Mbete Rɔmri 3 Bible Online

Mbete Rɔmri 3 - Karang bible

Mbete Rɔmri 3

¹Mí kaŋaw ba, sa̧w nzuk ké ɓa ziɓ ra ti̧h suk fál suŋ ? Kúŋ ndi̧w ké sɔk keni sal in ké Ŋgerzah ŋga̧h ziŋ ziɓri ɓa záh woyri, ɓa fe a kpakpaŋu le ?

²Ketina, sa̧w ziɓ ti̧h suk ɓa ŋgi̧-u ké ɓil feri gbam. Ɓay a ŋgeru mbew mí na-ay : Ŋgerzah hi̧ niri ku lah bolkusol ye ké-e ŋga̧h sal in ziŋ niri ɓay kú ƴo tulu.

³Mí ziɓri poŋ wahɓay, ku ƴo tulu mba kara, póŋ wahɓay woyri-aw hi̧ Ŋgerzah sel wahɓay ye le wo ?

⁴Ya ! Ke ta sel ya. Nzuk pirmatulri gbam ɓa nzuk-kuŋ ɓay mí ketina ye ɓay ti̧h-u kandɔk kú-u vbeh lewsa̧ ɓahri : Sal in wo ten tehɓay wo ɓahri, ndɔk wo ɗɔr sal in ya. Ketina wo ɓay ndih nzuk kuŋɓayri ké gel-kuŋ salɓay[7].

⁵Mí gelke póŋ wahɓay wah ten tehɓay Ŋgerzah ɓa teh-u, ɓay fe mí nah ɓah-u ɓáy le ? Mi mbi ɓay ɓahna nzuk pirmatulri kú-u ɓahri, haŋ fa̧hna Ŋgerzah ké tul suya wah na gelu gaŋ le wo ?

⁶Uwa, haŋ fa̧hna ye na gelu gaŋ. Ŋgerzah ɓa nzuk ketina ya ba, ke kúŋ salɓay tul nunmbam ke tusiɓa ani le wo[8] ?

⁷Mu ɓay el ke vbiɓay ɓahri se, póŋ wahɓay nzukri hi̧ ketina Ŋgerzah ti̧h ɓay riŋ ɗina ye ba, ɓay fe mí salɓay mgba tul nzukri ɓa nzuk suyari ɓáy le ?

⁸Ko ya le, mu ɓay mbi ɓay ɓahna nzuk a hani-uri ké kuŋ ɓay ku̧ nzak wah ɓahri, a wah, nah ɓahri, náh laɓ wuri suya ɓay ten suki ? Nzukri ké ɓah kaŋaw, salɓay mah mgba tul woyri.

⁹Mí-aw ba, a wah ziɓri, nah mba tul sa̧wnzuk a ɓoruri mba le wo ? Kaŋ ya. Mi ten ɓay ké mgba tul nzuk pirmatulri pol da[9]. A wah ke sa̧wnzuk a ɓoruri mbɔk, suya mgba na ɓa mgbal kandɔk kú-u vbeh lewsa̧ ɓahri, Nzuk ké ƴo tul wahɓay Ŋgerzah ta-a, nzuk mbew kara ta-a.

¹¹Nzuk ké ker ɓay a kpakpaŋu ta-a, nzuk ké ƴah Ŋgerzah ta-a.

¹²Gbam, ku ɓa kɔk nzukri, ku el ti̧h suk ya, ku mah haniri bin. Nzuk-laɓ suki ta-a, nzuk mbew kara ta-a [10].

¹³Nzak woyri ɓa lɔkɔ hul, haw woyri mbah ke kuŋɓay. Pom soy zeh mí ti̧h ke nzak rim woyri [11].

¹⁴Kusol woyri mbah ke fe haɓna hi̧ nzak woyri el zuŋ mbak mbak [12].

¹⁵Ku takra ɓay fer sem nzukri.

¹⁶Gel sina woyri gbam le, ku poŋ ɓeɓna ke koseh hi̧ nzukri.

¹⁷Siŋ sina ɗeŋ le, ku tu ya [13].

¹⁸Hȩ́k Ŋgerzah ta nun woyri ya.

¹⁹Nah tu wuri ɓahri se, ɓayri ké na ɓil mbete bolkusol Ŋgerzah ko ɓay nzukri ké bolkusolu ŋga̧h tul woyri mí ƴo tuh nzak nzuk pirmatulri gbam dale, salɓay ra mgba keni nzuk tusiɓari da.

²⁰Kaŋ mí fe laɓna bolkusol ké mah hi̧ sa̧w nzuk a som siɓa a hani mbew ƴo ke Ŋgerzah ɓa záh ye ta-a[14]. Ɓayu ké bolkusol ra, ƴo sɔk nzuk suya ye.

²¹Mí aŋay ba, sal in ké Ŋgerzah ŋga̧h ziŋ nzuk pirmatulri ɓa záh woyri dan bolkusol ra ten mun da, mí fe vbehna Moyiz ke fe vbehna gun nzak pihna Ŋgerzahri te-teh ɓay ketina sal inu lewsa̧ kaŋ.

²²Sal in Ŋgerzah ra ŋga̧h ɓay Ŋgermbay Zezu ké ŋga̧h sal in ɓa law mbew ziŋ Ŋgerzah, mí na ɓay tul nzuk a suŋ suŋ ké kan law sa tul Zezu. Ŋgerzah kehr sa̧wnzukri ya, ziɓri ké ƴo ke mbete bolkusol ye ke sa̧wnzuk a ɓoruri, ke kehr niri ya,

²³ɓayu ké nzukri gbam kew oh, mí ku mah riŋ ɗina Ŋgerzah mba.

²⁴Mí law Ŋgerzah rih ni, ke ndar ndɔk ye, mí ke mgba in ziŋ nzukri ké Mbay Zezu sel niri ɓil mgbal, ke ti̧h ɓa záh woyri.

²⁵A ye Mbay Zezu ra, Ŋgerzah mbi ni sɔk keni in ye ké-e mgba ziŋ nzukri. Ŋgerzah ya̧ sem ye ké fer ku̧ gel kani ɓa fe puhna ké sel nzuk pirmatulri ɓay wahɓay ké-e ƴo tulu. Sew a polri-aw, ke kuŋ salɓay tul suya nzukri ya ɓáy.

²⁶Ke ƴo ik law ye geŋ sew a guri ɓay ten ketina ye ɓa teh-u, sɔk keni ƴó tul ketina ye pi, ŋgá̧h sal in ye ziŋ nzukri ɓa záh woyri pi, a woyri ké sal in ké Zezu ŋga̧h ziŋ Ŋgerzah mgba tul woyri.

²⁷Mí-aw ba, vbá̧ haŋ ɓay sa̧w wah ƴo ri ɓáy le ? Ta-a ! Ɓay bolkusol fe mí vbá̧ haŋ ta-a le ? Ɓay bolkusol ké Ŋgerzah ŋga̧h ziŋ ziɓri kú-u mbi laɓ keni pihna-u le ? Vbá̧ haŋ ta ri ya. Ɓay kanlaw ké tul Nzuk bolkusol mí nah vba̧ haŋ ɓayu.

²⁸Nah tu wuri te-teh, nzuk pirmatul ƴo ke Ŋgerzah ɓa záh ye ɓay law ye ké te sa tul Ŋgerzah, ta ɓa ɓay fe laɓna bolkusol ya.

²⁹Mí dale Ŋgerzah ɓa záh ziɓri ke hȩk le ? Ke ta ɓa záh sa̧wnzuk a ɓoruri pi, ya le ? Ketina gaŋ, ke ɓa záh sa̧wnzuk a ɓoruri pi.

³⁰Kandɔk ké Ŋgerzah ɓa mbew yaŋ, ke ɓa záh sa̧w ziɓri ké ƴo kuŋ ndi̧w[15], sa̧wu ɓa kanlaw. Kaŋ pi mí ke ɓa záh sa̧wnzuk ndi̧w ɓɔlri ɓay kanlaw pi.

³¹Kaŋ dale nah to suyɓay bolkusol ké Ŋgerzah ŋga̧h ziŋ ziɓri ma fal ɓay soh gelu ke kanlaw le ? Kaŋ ya, nah ɓahri se, bolkusol ƴo ri gaŋ.