Read Karang Mbete Rɔmri 4 Bible Online

Mbete Rɔmri 4 - Karang bible

Mbete Rɔmri 4

¹Mí kaŋ ba, nah él ɓah ani le ? Nah ɓa mi̧hri zih wahri Abaraham ɓay sa̧w mbuŋna a haymun ley ?

²Ɓa ra fe laɓna Abaraham mí hi̧ ni ke ƴo ke Ŋgerzah ɓa záh ye le, ke mah vba̧ haŋ, mí ké nun Ŋgerzah le, ke mah ya.

³Kandɔk ké mbete ɓah ra, Abaraham kan law sa tul Ŋgerzah, mí Ŋgerzah ko ni ɓa gun ye ké ƴo mbew ziŋ ni gaŋ ba[16].

⁴Ɓay fe le nzuk a suŋ suŋ ké laɓ pihna le, lari ye ƴo tul nzuk ké hi̧ ni pihna-aw, ku ki̧ ɓa fe hi̧na ya, ɓa fe ye gaŋ.

⁵Mí nzuk ko pihna ye mah nun Ŋgerzah ya, mí ke kan law sa tul Ŋgerzah ké mah lu ɓay ké tul nzuk-dih fal záhri le, Ŋgerzah ko nzuk-kan law tul ye ɓa gun ye ké ƴo mbew ziŋ ni.

⁶Kaŋ pi mí Daviɗ mbay a luki ɗi siŋ ɓay pol tehna nzuk pirmatulri kú-u ko pihna woyri mah ya ra, mí Ŋgerzah ki̧ niri ké sakra gun yeri, ke ɓa záh woyri.

⁷Pol tehna ƴo ziŋ nzukri ké salɓay-poŋ Ŋgerzah lu ké tul woyri, ké suya woyri ta mba.

⁸Pol tehna ƴo ziŋ nzuk ké Gaŋ tul feri riw ki̧ suya ye ya[17].

⁹Kaŋ dale pol tehna-ay na ɓay tul ziɓri sa̧wnzuk-kuŋ ndi̧wri mini pol tehna-ay na ɓay tul sa̧wnzuk ndi̧w ɓɔlri pi le ? Abaraham na ani mí Ŋgerzah ko ni ɓa gun ye le, ké-e kuŋ ndi̧w da mini ké-e ɓa nzuk ndi̧w ɓɔl le ? Nah tu ɓahri se, Abaraham kpɔ-kpɔkrɔ, mí ke ɓa nzuk ndi̧w ɓɔl ɓáy, ke kan law sa tul Ŋgerzah. Ŋgerzah ba, ko ni ɓa gun ye pol dara mí ke kuŋ ndi̧w ɓáy.

¹¹Abaraham kan law ye sa tul sal in ké Ŋgerzah ŋga̧h ziŋ ni ɓa záh ye dara mí ke ya̧ bolkusol-kuŋ ndi̧w ɓáy. Kɔrɔ no̧ku ɓa zezele fe ké sɔk sal in ké-e ŋga̧h ziŋ Ŋgerzah ɓa záh ye dale, ke ti̧h ɓa zih sa̧wnzuk ndi̧w ɓɔlri gbam kú-u kan law woyri sa tul sal in Ŋgerzah le, Ŋgerzah ki̧ niri ké sakra gun yeri dan ɓay.

¹²Abaraham ɓa zih sa̧w ziɓ nzuk-kuŋ ndi̧wri pi, nzuk a a̧yri ké mbi siŋ sina zih wah Abaraham ke sew ké-e kan law ye sa tul Ŋgerzah ra, mí ke ɓa nzuk ndi̧w ɓɔl ɓáy.

¹³Sewu ké Ŋgerzah wahɓay hí̧ tusiɓa gbam hi̧ Abaraham ke mi̧hri ye ra le, fe vbehna bolkusol Moyiz ta-a ɓáy, mí Ŋgerzah ŋga̧h wahɓay ziŋ Abaraham, mí ke ko ni ɓa gun ye dan ɓay, ɓayu ké-e kan law sa tul ye.

¹⁴Kanlaw ti̧h suk ti̧h, ɓayu ké mahful-ya̧ fe baah Ŋgerzah ɓay bolkusol ta-a. Yá̧ fe baah ɓay bolkusol ƴo ra ri le, wahɓay Ŋgerzah kal ndikpo.

¹⁵Ɓayu ké bolkusol Ŋgerzah gi ke haŋ fa̧hna ye, mí gel a a̧y ké bolkusol ta-a le, mbá nzak bolkusol kara ta-a pi.

¹⁶Kaŋ mí yá̧ fe baah Ŋgerzah ra sa̧wu ɓa kanlaw sa tul ye ɓay hi̧ lawsuki ye ɓá ŋga̧h wahɓayu ɔh ziŋ mi̧hri Abaraham gbam. Ziɓri ké ƴo ke bolkusol Ŋgerzah, ta ɓa a woyri ke hȩk woyri mí ku ya̧ fe baah ya. Le sa̧w nzuk a suŋ suŋ ké kan law kandɔk Abaraham pi. A ye, ke ɓa zih wah gbam kandɔk ké nah tu wuri tu Ŋgerzah ɓah hi̧ ni ɓahri : Mi laɓ mu ɓa zih sa̧wnzukri ɓa ŋgi̧-u ya̧h ya̧h[18]. Mí Abaraham kpɔ-kpɔkrɔ kara ke kan law tul Ŋgerzah Nzuk wahɓayu ké hi̧ feri ti̧h ke titilu da̧y ké fe mbew ta-a ɓáy, ke kan law tul Ŋgerzah Nzuk-tom hulri pi.

¹⁸Abaraham tu ɓahri, tí̧h ɓa zih sa̧wnzukri ɓa ŋgi̧-u ra mahful ta-a ɓayu kú-u kpɔkrɔ da, mí ke ɓaŋ law kan tul wahɓay-aw ké Ŋgerzah wah ɓahri : Mi̧hri wo ɓay seh kandɔk gunwu̧y nunmbamri kaŋ pi[19].

¹⁹Mbihmbam ye laɓ sɔɗ. Ke ko mun ye mah hani ke hul, ke ko mun wu̧y ye Sara ké ɓa mahtuh mah hani ke hul pi, mí law ye el fal ya.

²⁰Law ye ma̧y wahɓayu ya. Le law ye ké-e kan sa tul Ŋgerzah ra, mí ke ziŋ keni ŋgerna pi, ke dim keni Ŋgerzah pi.

²¹Ke tu te-teh, ɓay ké Ŋgerzah wah-aw ra, Ŋgerzah ƴo ke huhrumun. Le ke laɓu gaŋ.

²²Sa̧wu mí Ŋgerzah ko ni ɓa gun ye.

²³Mí ku vbeh ɓayu ɓay tul ye ke hȩk ye ya.

²⁴Le ku vbeh ɓayu ɓay tul wah pi, a wah ké Ŋgerzah ki̧ na ké sakra gun yeri ɓay law wah ké nah te sa tul ye, a ye ké-e ten Zezu Gaŋ wah ke puh záh ke pa̧ymun a foyu.

²⁵Ke hu hul buma ɓay tí̧h zer wah, mí ke ti̧h ke puh záh ke pa̧ymun a foyu ɓay sal in ké Ŋgerzah ŋga̧h mí hi̧ ni ke ƴo ziŋ na ɓa záh wah.