Read Karang Mbete Rɔmri 7 Bible Online

Mbete Rɔmri 7 - Karang bible

Mbete Rɔmri 7

¹Uwa, yi̧n biri, i tu wuri bolkusol ké Ŋgerzah hi̧ Moyiz vbeh tu-tu. Mi ƴo ɓah hi̧ wuri ɓahri, bolkusol ɓa mbay tul nzuk ke sew ké-e kaɓ tukala ɓáy.

²Kandɔk bolkusol-ya̧ hani, bolkusol ra ŋga̧h wu̧y ke wo̧ro sew ké wah ye kaɓ tukala ɓáy. Mí wah ye hu dale, bolkusol ŋga̧h wu̧yu mba.

³Sa̧wu mí wah ye ra hu ya ɓáy, mí ke mbi wo̧ro a ɓoru le, ku ɗi ni ɓa wu̧y nunpuki. Wah ye hu dale, bolkusol ŋga̧h ni mba. Ke ya̧ wo̧ro a ɓoru fal hul wah ye kara, riŋ wu̧y nunpuki ɗi tul ye ya.

⁴Kaŋ mí yi̧n biri, i hu wuri mí bolkusol ŋga̧h wuri mba. Sa̧w mbuŋna woiri a som siɓa ra ŋga̧h wuri mba. Ke hul Ŋgermbay, i hu ziŋ ni, mí i sɔɓ ɓa sa̧w nzuk ye a ye ké-e ti̧h ké sakra hulri ɓay hi̧ sa̧w wah ɓá leh lehna ké mah nun Ŋgerzah.

⁵Sew sa̧w mbuŋna wah a som siɓa ra, ɗaka haymun a suya-uri ɓoɗ ɓoɗ gi ke bolkusol Moyiz, mí mun wah ƴo hi̧ nah tasa̧y fe-uri ɓayu, mí nah el leh lehna ké mah hul.

⁶Mí aŋay sal bolkusol ra nzom ké tul wah da. Nah hu poŋ fe ké ŋga̧h na hi̧ siŋ sina mgbal wah sɔɓ ɓa siŋ sina nzuk pirmatul a foyu ké sa̧wu ɓa Tempuki, ta ɓa mbí bolkusol ké na ɓil mbete laɓ keni pihna ɓa nzuk pirmatul a titilu ké sa̧wu ɓa som siɓa ra ya.

⁷Mí a a̧w ba, nah el ɓáh ani ? Bolkusol ɓa Suya le ? Kaŋ ya. Mi tu Suya ke riŋ ye ɓay tul bolkusol. Bolkusol sɔk mi ɓahri, mu ɓáŋ law kan tul fe nzuk ya. Gelke bolkusolu ta-a le, mi ta tu ɓahri, ɓáŋ law kan tul fe nzuk ɓa fe a suya-u ya.

⁸Bolkusol gi bale, Suya mbi bolkusolaw ruklu law bi keni ke sam ɓáŋ law kan tul fe nzuk ɓoɗ ɓoɗ, ɓayu ké bolkusol ta-a le, Suya kara ta-a pi.

⁹Lewsa̧, ké bolkusol ta-a ɓáy ra, mi ƴo kaɓ fe bi. Mí bolkusol gi bale, Suya ten mun.

¹⁰Mi hu ɓayu. Mi ko ɓayri ké na ɓil bolkusol mah hi̧ mi kaɓ ke ɔkna ra el si ziŋ mi ma hul,

¹¹ɓayu ké Suya gi mbi ɓayri ké na ɓil bolkusol mí rɔk mi el i mi keni.

¹²Kaŋ mí bolkusol ɓa nunu a Ŋgerzah. Ɓayri ké na ɓil bolkusol ɓa nunu a Ŋgerzah, ɓa ketina, su-su.

¹³Mí-aw ba, ɓayri ké ɓa suki ra wa el ti̧h ɓa fe-i mi le ? Kaŋ ya. Ɓay hi̧ Suya ɓá ten mun ye ɓa teh-u ɓa su ya gaŋ le, ke ɓay a suki-aw Suya gi ke hul dale, ɓayri ké na ɓil bolkusol ten Suya ɓa su ya kal ŋgɔŋ.

¹⁴Nah tu-tu, sa̧w bolkusol ɓa Tem Ŋgerzah, sa̧w mbuŋna bi ba, ɓa som siɓa, mí mbɔl bi ba, ɓa mgbal Suya,

¹⁵ɓayu ké fe ké mi ƴo laɓu-ay, kal tul bi ka-kal. Fe ké mi yih laɓu le, mi laɓ ya, mí fe ké mi fu̧y laɓu ba, mí-i ƴo laɓu.

¹⁶Mí fe ké mi sa laɓu ya mí-i laɓ le, sɔk ɓahri, mi tu-tu, bolkusolu su-su.

¹⁷Dale ta ɓa a bi mí-i laɓ suya-aw mba wara le, ɓa Suya ké ɗeh puh ké haymun bi.

¹⁸Mi tu-tu, suki ɗeh puh ké haymun bi ya, sɔk ɓahri, ɓay laɓ suki ɓa fe bi, mí ɓay laɓ suki-aw le, mi laɓ ya,

¹⁹ɓayu ké suki ké mi yih laɓu ra, mi laɓ ya. Suya ké mi sa laɓu ya ra ma, mí-i ƴo laɓu.

²⁰Mí gelke mi laɓ suya ké mi sa-a ra le, ta ɓa a bi mí-i laɓ suya-aw mba dale, ɓa Suya ké ɗeh puh ké mun bi munu.

²¹Mi ko le, bolkusol Ŋgerzah na kandɔkay : Mi yih mbi-u ɓay laɓ keni suki ɓayu ké law bi rih mi keɗ keɗ ké tul bolkusol Ŋgerzah[21], mí Tukala ba, ƴo ɗih ya ziŋ mi.

²³Mí mi ko bolkusol Ŋgerzah laɓ pihna seɗe. A mbewu hi̧ mun bi ƴo ruh ŋgermu ɓay ketina ké mi tu-tu ké ɓa pihna a seɗe-u, mí mun bi el hi̧ mi rih ɓil mgbal Suya ké gi ke pihna a mbew ra mí-i laɓ keni suya ye.

²⁴A bi ke mun bi kara mi kaɓ baseh ! A ge mí ɓay ten mi ke ɓil mun hay a hulu-ay le ?

²⁵Law in ɓa nzuku a Ŋgerzah ɓay tul Ŋgermbay Zezu, Gaŋ wah. Kandɔkaw mí ke tul bi le, mi ƴo lah bolkusol Ŋgerzah, mí ke mun hay bi ba, mi ƴo lah bolkusol Suya.