Read Karang Mbete Rɔmri 8 Bible Online

Mbete Rɔmri 8 - Karang bible

Mbete Rɔmri 8

¹Mí keni-aw kara nzukri ké ƴo ziŋ Mbay Zezu le, salɓay hul nzom ké tul woyri

²ɓayu ké pihna Tempuki ɓa mbí bolkusol Ŋgerzah ra hi̧ mu keni ɔkna ké na ta̧w Mbay Zezu mí sel mu ké ndɔk Suya ké pihna ye ɓa mbí bolkusolaw ŋga̧h mu keni ɓa hul.

³Kandɔk ké ŋgerna bolkusolu i-i, Ŋgerzah pih gun sana ye gi ɓa nzuk pirmatul, sa̧w mbuŋna-u ɓa som siɓa. Haymun ye mah ke haymun nzuk pirmatul ké Suya ɗeh puh ké ri. Mun ye mí ti̧h ɓa fe puhna.

⁴Ŋgerzah kuŋ salɓay kan tul Suya ké mun nzuk ɓay hi̧ bolkusol ra ɓá laɓ ɔh ke gelu gelu ké ta̧w wah ké sa̧w siŋ sina wah ɓa Tempuki. Sa̧w siŋ sina-u ta ɓa sa̧w nzuk a som siɓa ya,

⁵ɓayu ké nzuk pirmatul ɓa sa̧w som siɓa ra, law ye na sa tul fe tusiɓa. Mí nzuk pirmatul ɓa sa̧w a foyu ké ɓa Tempuki ba, law ye na sa tul fe Tempuki.

⁶Kerɓay nzuk pirmatul a sa̧w som siɓa si ziŋ ni ma hul, kerɓay nzuk pirmatul a sa̧w Tem ba, ɓa ɔkna ke ɗeŋ.

⁷Ɓay fe le kerɓay nzuk pirmatul a sa̧w som siɓa ɓa nzukbaa Ŋgerzah. Ke hȩk bolkusol Ŋgerzah ya. Ŋgerna hȩku kara ta-a pi.

⁸Nzukri ké sa̧w woyri ɓa tusiɓa ra, ku ta rih law Ŋgerzah ya.

⁹A woiri le sa̧w tem woiri ɓa tusiɓa ya. Sa̧w tem woiri ɓa Tem Ŋgerzah. Tempuki ɗeh puh ké tem woiri. Nzuk a a̧y ké ta ke Tem Ŋgermbay ya le, ke ɓa nzuku a Ŋgermbay ya pi.

¹⁰Mí Ŋgermbay ɓa sa̧w woiri le, ketina pa̧ymun woiri ɓay hu-u ɓay tul suya, Tem ké ƴo ziŋ wuri ba, ɓa ɔkna ɓay sal in ké ŋga̧h wuri ziŋ Ŋgerzah ɓa záh woiri.

¹¹Kandɔk ké Tem Ŋgerzah ten Zezu ké sakra hulri, mí Temu ɗeh puh ké tem woiri dale, Ŋgerzah ké hi̧ Ŋgermbay ti̧h ke pa̧ymun a foyu ra, ke hí̧ pa̧ymun woiri ké ɓay hu-u ra ɔkna ɓay tul Tem Ŋgermbay ké ɗeh puh ké tem woiri.

¹²Kaŋ dale yi̧n biri, mbɔl na tul wah, mí mbɔlu ta ɓa mbɔl ké nah puh hi̧ ɗaka haymun ɓay su̧ keni tukala ya.

¹³Ɓayu ké i si sam siŋ sina a haymun ra le, i hu-u. Mí ke Tempuki, mbɔl ké i puh-u ɓa í fe laɓna haymun le, i ɔ-ɔkna gaŋ ba.

¹⁴Nzuk ké hi̧ Tem Ŋgerzah nda pol ye ra, ke ɓa gun Ŋgerzah gaŋ.

¹⁵Tempuki ké i ya̧ ra ta ɓa tem ké laɓ wuri ɓa mgbal ya, ta ɓa tem ké hi̧ wuri kaɓ ke hȩkme ya. Le ɓa Tem ké sɔɓ wuri ɓa gun Ŋgerzah hi̧ na, nah ɗi wuri ni ɓahri, baah.

¹⁶Temaw mí mbu̧h nzak ziŋ tem wah mbɔk ɓahri, nah ɓa gun Ŋgerzah.

¹⁷Kandɔk ké nah ɓa gun ye ra nah ɓa gun-fa̧h fe ye pi. Nah fa̧h fe Ŋgerzah le, fe Ŋgermbay ba, nah ya̧ ziŋ ni pi. Koseh ye ƴo zíŋ na kara ɓay hi̧ riŋ ɗina ye ɓá mgbe tul wah pi.

¹⁸Mi ɓahri se, koseh a sew a aŋay ké ziŋ na mah mgba tuh ke baw riŋ ɗina ké ɓay ten mun ké mun wah ra ya.

¹⁹Tusiɓa ke nunmbam ke feri ké ɓilu kara ƴo taw tén mun gun Ŋgerzahri ke ik law kandɔk nzuk ké sol tul bɔk ye sokoh

²⁰ɓayu ké tusiɓa ke nunmbam ke feri ké ɓilu ti̧h ɓa mgbal, ti̧h suk ya. Ta ɓa yihna tusiɓa ke nunmbam ya. Wara le a ye Ŋgerzah mí mbih tusiɓa ke nunmbam ke fe-uri ƴo geŋ nam ké tusiɓa ke nunmbam ke feri ké ɓilu ɓay ti̧h ɓil mgbal ɓeɓna-aw hi̧ tusiɓa ke nunmbam ke feri ké ɓilu sel mun ziŋ gun Ŋgerzahri ɓil riŋ ɗina woyri dara ɓáy.

²²Nah tu wuri ɓahri se, tusiɓa ke nunmbam ke feri ké ƴo ɓilu gbam ƴo vuh sena, ƴo koseh kandɔk wu̧y ké kaɓ peŋe kaŋ ka̧h aŋay.

²³Mí ta ɓa tusiɓa ke nunmbam ke feri ké ƴo ɓilu ke hȩk woyri ya. Le a wah ké nah leh suki Tempuki ke nzak rim wah kara, nah ƴo vuh sena ɓil law wah pi. A wah ra nah ƴo taw tén mun wah ɓa gun yeri ke ik law geŋ ti̧hna wah ke pa̧ymun a foyu.

²⁴Suki ké nah ƴo geŋu ra mí nah ti̧h ɓil salɓay hul keni. Dale suki ké nzuk geŋ ra ɓa fe ké-e ko ke nun ya. Fe ké nzuk ko ke nun ba, laɓ ani mí ke geŋu ɓáy le wo ?

²⁵Mí géŋ fe ké nah ko ya ra, nah su̧h law ƴo geŋu.

²⁶Kaŋ pi mí Tempuki kara ƴo so na ké ɓil ŋgerna ké nah ta keni ya, ke so na ɓay fe ké mah goŋ Ŋgerzah, mí nah tu goŋ Ŋgerzah ya. Le a ye mí ke ƴo vuh vuhna ké mba ɓahna ké pol Ŋgerzah ke riŋ wah.

²⁷Mí Ŋgerzah a ye ké-e ko law nzukri ko, ke tu kerɓay Tempuki tu ɓay fe le, Tempuki ƴo pol ye kpatara ke riŋ sa̧w nzuk yeri.

²⁸Nah tu ɓahri, ɓa ra fe fe gaŋ kara Ŋgerzah hi̧ fe-uri ti̧h ɓa suki hi̧ nzukri ké sa ni, a woyri ké-e ɗi niri kandɔk ké-e lek

²⁹ɓay fe le a woyri, ke tu niri pol tu. Ke lek niri pol sa̧ ɓa nzuk pirmatul eŋ gun ye ɓa fe tem mun gun ye hi̧ ke na ɓa gun pol daɓa yi̧nri.

³⁰Mí a woyri ké-e lek niri pol ra, ke ɗi niri kara pi. A woyri ké-e ɗi niri ra, ke lu ɓay ké tul woyri el ŋga̧h sal in ziŋ niri ɓa záh woyri pi. A woyri ké-e ŋga̧h sal in ziŋ niri ra, ke hi̧ riŋ ɗina ye kan tul woyri pi.

³¹Kandɔkaw ba, ɓay fe mí nah ɓah-u ɓáy le ? Ŋgerzah pɔr tul wah da ba, a ge mí mah laɓ ɓay kan tul wah ɓáy lo ?

³²A ye ké-e gboh salɓay hul ké tul gun ye ya, mí ke poŋ ni hu ɓay tul wah gbam hi̧ na nah ɓa gun yeri ra, ani wara mí ke ta ndar feri gbam hi̧ na ziŋ ni ya le wo ?

³³A ge mí ɓay goh sa̧wnzuk Ŋgerzah lo ? Ŋgerzah ké lu ɓay ké tul woyri el ŋga̧h sal in ziŋ niri ɓa záh woyri ba, a ge mí ɓay goh niri ɓáy le ?

³⁴A ge mí ɓay kuŋ salɓay hul kan tul wah lo ? Ŋgermbay ké hu mí ti̧h ke puh záh, ké ɓa ndɔk lakna Ŋgerzah mí ke ƴo pol Ŋgerzah ke riŋ wah ra ba, a ge mí ɓay kuŋ salɓay hul kan tul wah ɓáy le wo ?

³⁵A fe mí ɓay kehr na ke law sana Ŋgermbay le wo ? Koseh ? Fe-se law ? Nzukbaa ? Ɗaka ? Sí seh fe ? Fe-lu law ? Mini fe-i hul le ?

³⁶Kandɔk kú-u vbeh lewsa̧ ɓil mbete Ŋgerzah ɓahri, ɓay tul wo mí namri riw, nah ɓa hul. Nah ɓa sami kú-u vbeh-u[22].

³⁷Mí keni-aw kara nah haw ŋgermu ziŋ ni ha-haw a ye ké-e sa na.

³⁸Mi tu-tu ɓahri se, hul mini káɓ tukala, tem nzak pihnari, záhri mini nzukri ké lak mbay gelri ɓoɗ ɓoɗ, fe a aŋay mini fe a gi-u, ŋgerna fe a fál síɓa mini a fál siɓa, a fe fe gbam ké nunmbam ke tusiɓa mah kehr na ke law sana Ŋgerzah ké na ta̧w Mbay Zezu Gaŋ wah ra ya.