Read Karang Mbete Rɔmri 9 Bible Online

Mbete Rɔmri 9 - Karang bible

Mbete Rɔmri 9

¹Ké mi ƴo mbew ke Ŋgermbay ra, mi ƴo ɓah ketina, mi kuŋ ɓay ya. Tempuki ké ƴo tem bi ƴo lu lakna ɓayu pi, law bi kara ƴo lu lakna ɓayu pi.

²Fe-se law mbaŋ law bi, gaŋlaw bi ɗɔ-ɗɔr ɓay buma Ŋgermbay ké mgba tul yi̧n bi ziɓri a woyri gun Izarayelri. Buma ké mgba tul sa̧w bi a fál haymun ra, buma-u ɓá ta tul bi. Su ɓay mí hu soh gel woyri.

⁴A woyri ku ɓa gun Izarayelri. Ŋgerzah hi̧ niri ku ɓa gun yeri, ke hi̧ niri riŋ ɗina ye, ke ŋga̧h ɓayri ziŋ niri, ke ɓaŋ mbete bolkusol ye kan ndɔk woyri, ke hi̧ ku gi ke fe hɔlna vbeh ɓa fe puhna dim ni keni, ke wah ɓayri ziŋ niri,

⁵zih woyri dim Ŋgerzah ɓa záh woyri, dara mí ké ɓil mi̧hri woyri, Ŋgermbay ti̧h ké ri. Tumbɔl hi̧ Ŋgerzah ɓay mgbɔkɔ ye, a ye ké-e ƴo tul feri riw sew ke sew. Gelu munu.

⁶Kaŋaw ba, ɓay Ŋgerzah kew oh le ? Kew oh ya. Gun Izarayelri gbam ɓa gun Izarayel ya.

⁷Abaraham zih gun Izarayelri ra, gbam woyri ku ɓa mi̧hri ye ya. Ŋgerzah ba, ke wahɓay hi̧ Abaraham ɓahri se, sa̧w mi̧hri ké mi wahɓay hi̧ mu ra ɓa Isak[23],

⁸sɔk ɓahri, ta ɓa gunri kú-u mbuŋ ke fe laɓna a sa̧w tusiɓa mí ɓa gun Ŋgerzah ya. Le gunri ké sa̧w woyri ɓa wahɓay mí ku ko niri ɓa gun yeri

⁹kandɔk wahɓayu ɓah hi̧ Abaraham ɓahri, sew a ɓoru ke nam a kari-ay le, mi él gi. Wu̧y wo Sara ba, ɓay ƴo ke gun wo̧ronzuk[24].

¹⁰Ta ɓa ɓay a a̧w kaŋto ya. Ɓay a ɓoru mí na-ay : Sew zih wahri Isak, wu̧y ye Rebeka ƴo ke ɓil sɔh ye.

¹¹Ke fa̧h hore ya ɓáy. Ku ƴo ɓil mah woyri ɓáy, ku laɓ suki ya, ku laɓ kɔk fe ya, mí ɓay hi̧ kerɓay ké Ŋgerzah lek ɓay lu nzukri ɓa sa̧w ye ɓá si ke gelu gelu le, ke ɗi nzuk mbew. Ɗina-aw ta ɓa sa̧w fe laɓna nzuk ya, wara le sa̧w ɗina-aw ɓa a ye ké-e ɗi nzuk.

¹²Ke ɓah hi̧ Rebeka ɓahri se, gun pol ɓay laɓ pihna hi̧ toŋnafal[25]

¹³kandɔk kú-u vbeh lewsa̧ ɓahri, law bi te sa tul Zakoɓ poŋ Esaw[26].

¹⁴Kaŋaw ba, ɓay fe mí nah ɓah-u ɓáy le ? Ŋgerzah laɓ gelu ya le ? Ke laɓ gelu gaŋ.

¹⁵Lewsa̧ Moyiz ƴo vuh hi̧ Ŋgerzah ɓay fe laɓna gun Izarayelri sew kú-u laɓ yim nday hi̧ záh a ɓoru ra, Ŋgerzah ɓah hi̧ ni ɓahri, mi mgbá in ziŋ nzuk ké mi mgba in ziŋ ni. Mi kér seh nzuk ké mi ker seh ye[27].

¹⁶Kaŋ dale ɗina Ŋgerzah ra ta ɓa ŋgerna mini yihna nzuk pirmatul ya. Le ɓa law in Ŋgerzah.

¹⁷Sew faroŋ mbay Eziɓte a lewsa̧, ke kpuh tul ziŋ Ŋgerzah[28], Ŋgerzah ɓah hi̧ ni ɓahri, sa̧wu mí, mi mbi mu ɓa mbay Eziɓte, ɓay sɔk keni huhrumun bi ké ta̧w wo, ɓay hi̧ riŋ bi ɓá mgbe ké tusiɓa gbam[29], mí ke el kpuh law faroŋ.

¹⁸Kaŋ dale nzuk ké-e yih mgba in ziŋ ni, ke mgba in ziŋ nzuku. Nzuk ké-e yih kpuh law ye, ke kpuh law nzuku.

¹⁹Dale mu ɓáhri : « Ɓay fe mí ɓay ƴo tul wah ɓáy lo ? A ge mí mah mba fe ké Ŋgerzah lek le wo ? »

²⁰Mi ɓah hi̧ mu ɓahri, a wo nzuk pirmatul, mu ɓa fe mí mu fah Ŋgerzah le wo ? Iri ɓay ɓah hi̧ nzuk-mboh ni ɓahri, ɓay fe mí mu mboh mi kaŋay le wo[30] ?

²¹Nzuk-mboh fe ɓa mbay tul pa̧y. Ke pa̧y mbew, ke kehr mboh iri ɓa fe gama. Ke kehr mboh iri nzuku a laɓ pihna a garu pi, ya le[31] ?

²²Mí Ŋgerzah yih sɔk law fa̧hna ye, ke yih sɔk huhrumun ye, mí ke ik law kpu̧ru ké tul nzuk ké mah ya̧ haŋ fa̧hna ké-e lek ɓay vbar nzuku kandɔk iri, ɓay hi̧ nzuk a a̧yri ké mgba in ziŋ Ŋgerzah ɓá tu ahna riŋ ɗina ye kandɔk iri ké-e mboh ɓa fe gama kaŋ[32]. Kú tu ɓay riŋ ɗina-u ké ku̧ tul woyri. Ke lek mgba inu lewsa̧ kaŋ.

²⁴Kandɔkaw mí ke ɗi na ɗi. Ke ɗi na ké sakra sa̧w bi ziɓri kaŋto ya. Wara le ke ɗi na ké sakra sa̧wnzuk a ɓoruri pi,

²⁵kandɔk ké Ŋgerzah ɓah ké ɓil mbete Ozeh ɓahri, Mi ɗí sa̧wnzuk a ɓoruri kú-u ɓa sa̧w bi ya ɓa sa̧w bi, nzukri ké tu law sana bi ya, mi ɗí niri ɓa maŋlaw bi [33].

²⁶Mí ɓay ziɓri ba, ké gel kú-u kaɓ ri, ku ɓah ɓay tul woyri ɓahri, kú-u ɓa sa̧wnzuk ye ya ra, ku el ɓa sa̧w ye wara. Ku ɗí niri ɓa gun Ŋgerzah Ŋgɔhnzuk [34].

²⁷Mí Ezay le ke vuh mun ye ɓay tul gun Izarayelri : Ku ŋgi̧ kandɔk sikɔkre kara tɔru ndi̧ kaŋto mí ɓay toŋu[35],

²⁸ɓayu ké Gaŋ tul feri riw ɓay laɓ bolkusol ye ɔh ké tusiɓa kandɔk ké-e lek gaŋ,

²⁹kandɔk ké Ezay ɓah pol sa̧ ɓahri, gelke Gaŋ tul feri riw poŋ tɔr mi̧hri wah ya le, nah ná kandɔk nzukri ké Sɔdɔm, nah tí̧h eŋ nzukri ké Gɔmɔr[36].

³⁰Kaŋ ba, ɓay fe mí nah ɓah-u ɓáy le ? Ɓay fe le sa̧wnzuk a ɓoruri ké ƴah ŋga̧h sal in ziŋ Ŋgerzah ɓa záh woyri ya, mí Ŋgerzah ba, ŋga̧h sal in ziŋ niri ɓa záh woyri dale, sa̧wu ɓa kanlaw tul Ŋgerzah ké ndɔk ye ɗɔr sal in ya.

³¹Gun Izarayelri ba, ku dih fal mbete bolkusol ké ŋga̧h niri lewsa̧ ziŋ Ŋgerzah, mí ku kew oh bolkusol ké-e ŋga̧h ziŋ niri ra.

³²Ɓay fe mí ku kew le ? Ɓay fe le sa̧w ŋga̧h bolkusol ɓa kanlaw te sa tul Ŋgerzah ké ndɔk ye ɗɔr sal in ya, mí ku dih fal mbete bolkusol ra ker ɓahri se, ŋga̧hna-u ɓa sa̧w fe laɓna, mí kerɓay woyri hi̧ ku ɓe kasaw lihna[37]

³³kandɔk kú-u vbeh ɓayu ɓil mbete Ŋgerzah lewsa̧ ɓahri, Í ko. Mi kan kasaw ké Siyoŋ gel fe puhna Ŋgerzah, ɓa kasaw-ɓe bɔk, ɓa mah kasaw lihna. Nzuk ké kan law sa tul kasaw ra le, su̧hru ta se ni ya[38].