Read Karang Mbete 1 Kɔrenteri 1 Bible Online

Mbete 1 Kɔrenteri 1 - Karang bible

Mbete 1 Kɔrenteri 1

¹A bi Pɔl ké Mbay Zezu ɗi mi kandɔk ké law Ŋgerzah yih, mi ɓa gun nzak pihna ye. A bi ke Sosten[1] yi̧n wah ɓil Ŋgermbay nah vah wuri a woiri sa̧w in Ŋgerzah ké i mbu̧h hani ké Kɔrente[2] ɓa nunu a Ŋgerzah, ké i ƴo ziŋ Mbay Zezu. Ke ɗi wuri ɓa sa̧w ye ké mah nun ye, a woiri ke nzukri gbam ké gelri gbam ké riŋ Gaŋ wah Ŋgermbay Zezu ɗi ké haŋsekle woyri ziŋ na pi.

³Nah vah wuri ke lawsuki ke ɗeŋ ké ur ké ta̧w Bah wah Ŋgerzah, ké ur ké ta̧w Gaŋ tul feri riw a ye Ŋgermbay Zezu.

⁴Mi ƴo el ke tumbɔl hi̧ Ŋgerzah bi kpatara ɓay tul woiri ɓay lawsuki ye ké i ziŋ ɓay tul Mbay Zezu

⁵ɓay fe le, a woiri ké i ƴo ziŋ Ŋgermbay ra Ŋgerzah mbar wuri ke sam sukiri gbam, nunu a ɓay pi, nunu a fe tuna pi.

⁶Suki ké i ziŋ ra si sina ke tehɓay Ŋgermbay ké mgba law woiri.

⁷Kandɔkaw mí suki ké Ŋgerzah hi̧ wuri ra, suki mbew kara poh wuri ya, mí i ƴo kaɓ keh geŋ tén mun Gaŋ wah Ŋgermbay Zezu.

⁸A ye mí ke ƴo mgba wuri hi̧ í ŋger ɓa nzukri ké ƴo dan ɓay ké pol Gaŋ wah Zezu si ka̧h nam gina ye.

⁹Ndɔk Ŋgerzah ɗɔr sal in ya. Ke ɗi wuri hi̧ sal inu mbu̧h wuri mbew ziŋ gun ye Ŋgermbay Zezu Gaŋ wah.

¹⁰Dale mi ƴo hew wuri yi̧n biri ke riŋ Gaŋ wah Ŋgermbay Zezu, a woiri gbam í ƴo tul ɓay mbew, kéhr hani ɓá ta sakra woiri ya. Ké law woiri gɔl haniri mbew ra, lekɓay woiri ɓá si mbew, law woiri kara ɓá si mbew pi.

¹¹Mi ƴo hew wuri yi̧n biri ɓayu ké nzukri ké kerpuh ŋgerwu̧y a hani ké riŋ ye ɓa Kolowe ku sɔk mi ɓay woiri ɓahri, fahɓay ké sakra woiri ƴo ri.

¹²I ƴo fahɓay ɓahri : « A bi mi ɓa nzuk Pɔl. » « A bi mi ɓa nzuk Apolo[3]. » « A bi mi ɓa nzuk Sefas[4]. » « A bi mi ɓa nzuk Ŋgermbay. »

¹³Ŋgermbay ra ke keh-kehr le wo ? Ɓa Pɔl mí hu ké tul kpuh vbatay ɓay tul woiri le ? I ti̧h mbih batem hi̧ riŋ Pɔl mí kan tul woiri le ?

¹⁴Mi el ke tumbɔl hi̧ Ŋgerzah ɓay fe le, mi soh nzuk mbew ké sakra woiri mbih batem ya, rɔkɔ nzuk ɓá ɓahri, ke ti̧h mbih batem hi̧ riŋ bi kan tul ye. Sa ɓa Kiripuh ke Gayus mí-i soh niri mbih batem.

¹⁶Mi soh mbih batem nzuk kerpuh Etefana pi. A ɓoru le mi tu nzuk ké mi soh ni mbih batem ya

¹⁷ɓayu ké Ŋgermbay pih mi si sóh nzukri mbih batem ya. Ke pih mi si ka-kah ɓaysuki ye dan ru̧na nzuk pirmatul rɔkɔ mí i ŋgerna ɓaysuki hul nazi ye ké tul kpuh vbatay.

¹⁸Nzak pihna hul tul kpuh vbatay ra ɓa kɔk ɓay ké ta̧w nzukri ké ƴo zi-u. Ké ta̧w wah nzukri ké Ŋgerzah ƴo lu salɓay hul ké tul wahri ba, ɓayu ɓa huhrumun ye.

¹⁹Ɓay hul nazi ké tul kpuh ra mbete Ŋgerzah ɓahri, Mi ɓéɓ ru̧na nzuk ru̧nari. Mi hí̧ fe tuna nzuk goso fe tunari ɓá ti̧h suk ya[5].

²⁰A woiri gerekri nzuk ru̧na ƴo fál suŋ ? A woiri ziɓri nzuk-sɔk bolkusol Ŋgerzah ƴo fál suŋ ? Nzuk-faŋ sa̧wɓay sew a tukala-ay ƴo fál suŋ ? Ŋgerzah sɔɓ ru̧na tukala ɓa kɔk fe, kaŋ ya le wo ?

²¹Ke ru̧na ye ra, ke hi̧ nzuk tukalari ta tu ni ke ru̧na woyri ya, law ye rih ni ɓay ya̧ nzukri ké ƴo kan law tul kɔk nzak pihna hul nazi ké i Mbay ra.

²²Sa̧w ziɓri ƴo vbi fe saŋri ɓay kan law tulu. Sa̧w gerekri ba, ƴo fakla sa̧w ru̧na ɓay kú ru̧.

²³Mí a wah nah ƴo ka-kah nzak pihna hul nazi ké i Mbay dale, ɓayu na ɓa kasaw-ɓe bɔk ké ta̧w ziɓri hi̧ ku saŋ ni. Ké ta̧w sa̧wnzuk a ɓoruri ba, ɓa kɔk ɓay.

²⁴Bale nzukri gbam, ziɓri mah ke gerekri ké Ŋgerzah ɗi niri mbu̧h ziŋ Ŋgermbay ra, ké ta̧w woyri-aw, Ŋgermbay ɓa huhrumun Ŋgerzah, ke ɓa ru̧na Ŋgerzah gaŋ.

²⁵Ɓay fe le kɔkɔ Ŋgerzah ru̧ mba ru̧na nzukri mba-mba. Ko̧hko Ŋgerzah ŋger mba huhrumun nzukri mba-mba pi.

²⁶Ɓayu ké yi̧n biri í ko ɗina ké Ŋgerzah ɗi wuri-aw sɔk ɓahri se, nzuk ru̧na a tukalari ŋgi̧ ya, nzuk riŋ ɗinari ŋgi̧ ya, gun nzuk riŋ ɗinari ŋgi̧ ya pi.

²⁷Mí Ŋgerzah ɗi kɔk nzukri ké tukala-ay ma ta̧w ye ƴo hi̧ su̧hru ɓá kan nun nzuk ru̧nari. Ke ɗi nzukri ké ta ke ŋgerna ya ƴo hi̧ su̧hru ɓá kan nun nzuk huhrumunri.

²⁸Ke ɗi nzukri ké nzuk tukalari ko niri ɓa kɔk fe, ke ɗi gun nzuk sehri, ke ɗi nzukri ké na kpo̧k ɓay i ŋgerna nzuk a a̧yri kú-u ko niri ɓa nzuk a kpakpaŋuri.

²⁹Kaŋ le nzuk pirmatul mbew mah ndagiri ké nun Ŋgerzah ya.

³⁰Ŋgerzah mí ɓa sa̧w mbu̧hna wah ziŋ Mbay Zezu. Ke ɓa sa̧w ru̧na wah ké ur ké ta̧w Ŋgerzah sɔk ɓahri, ke ɓa sal in ké ŋga̧h na ziŋ Ŋgerzah, ke ɓa sa̧w kani wah, ke ɓa nzuk-sel na ké ndɔk hul el hi̧ Ŋgerzah ɓay hi̧ nzuk ké vba̧ haŋ ye le, ké vba̧ haŋ ɓay tul Gaŋ tul feri riw[6] kandɔk kú-u vbeh ɓil mbete a lewsa̧ kaŋ.