Read Karang Mbete 1 Kɔrenteri 11 Bible Online

Mbete 1 Kɔrenteri 11 - Karang bible

Mbete 1 Kɔrenteri 11

¹Í ndɔl fe laɓna bi-ay kandɔk ké a bi mi ndɔl fe laɓna Ŋgermbay.

²Mi pir wuri ɓay fe le, ɓil feri gbam i ƴo ker ɓay tul bi kandɔk fe laɓna-dim Ŋgerzah ké gel-mbu̧h hani ké mi poŋ ndoh ndɔk woiri, mí i ƴo tulu.

³Dale mi yih ɓay í tu wuri ɓayay : Tul wo̧ronzuk gbam ɓa Ŋgermbay, tul wu̧ynzuk ɓa wo̧ronzuk, tul Ŋgermbay ɓa Ŋgerzah.

⁴Kaŋ le wo̧ronzuk a suŋ suŋ ké ƴo goŋ Ŋgerzah mini ke ƴo ɓah ɓay ké Tempuki ɓaŋ ndoh ɓil law ye, mí ke guɓ tul ye le, ke ɓaŋ su̧hru kan nun Ŋgermbay ké ɓa tul ye.

⁵Mí wu̧ynzuk a suŋ suŋ ké ƴo goŋ Ŋgerzah mini ke ƴo ɓah ɓay ké Tempuki ɓaŋ ndoh ɓil law ye, mí ke ƴo tul ndikpo le, ke ɓaŋ su̧hru kan nun wo̧ronzuk ké ɓa tul ye. Fe laɓna ye mah hani bin ke fe laɓna suya wu̧y a a̧y ké su̧h tul ye su̧h.

⁶Ké gel-mbu̧h hani ra gelke wu̧ynzuk sa guɓ tul ye ya le, ké su̧h tul ye. Mí su̧hru sú̧h tul mini séŋ tul se ni dale, ké guɓ tul ye guɓ.

⁷Wo̧ronzuk ta guɓ tul ya ɓay fe le, riŋ ɗina Ŋgerzah kan tul ye, ke eŋ ni, mí wu̧ynzuk ba, riŋ ɗina wo̧ronzuk kan tul ye,

⁸ɓayu ké sa̧w wo̧ronzuk ur ké ta̧w wu̧ynzuk ya. Wara le sa̧w wu̧ynzuk mí ur ké ta̧w wo̧ronzuk.

⁹Ŋgerzah laɓ wo̧ronzuk ɓay wu̧ynzuk ya. Le wu̧ynzuk mí ke laɓ ni ɓay wo̧ronzuk.

¹⁰Sa̧wu mí ɓay tem nzak pihnari ké ƴo ko gel ma tul dimna Ŋgerzah woiri-aw ra wu̧ynzuk ɓá guɓ tul ye ɓa fe-sɔk ŋgerna-u.

¹¹Mí keni-aw kara ké nun Gaŋ tul feri riw wu̧ynzuk ke wo̧ronzuk ɓa fe mbew. Wu̧ynzuk ƴo ke tul mun ye ya, wo̧ronzuk kara ƴo ke tul mun ye ya pi.

¹²Kandɔk ké sa̧w wu̧ynzuk ur ké ta̧w wo̧ronzuk, wo̧ronzuk kara ti̧h ke ɓil wu̧ynzuk pi. Mí sa̧w feri gbam ur ké ta̧w Ŋgerzah.

¹³Í lu lakna ɓayay ke mun woiri : ɓay wu̧ynzuk ɓá goŋ Ŋgerzah ké gel-mbu̧h hani dan guɓ tul ye ra wa si ke gelu gaŋ le ?

¹⁴Feri ké Ŋgerzah laɓ gaŋ kara ƴo sɔk wuri ɓahri, pirmatul wo̧ronzuk sa ɓa peh-u le, ɓa su̧hru hi̧ wo̧ronzuk.

¹⁵Pirmatul wu̧ynzuk ba, sa-sa le ɓa fe gama ye ɓay fe le, Ŋgerzah hi̧ ni pirmatul ɓay pɔr tul ye.

¹⁶Kandɔkaw mí nzuk a hani ko su-su ɓay fah ɓay tul fe laɓna-ay le, a wah nah tu sam fe laɓna a ɓoru ya pi, sa̧w in Ŋgerzah kara tu ya pi.

¹⁷Nzak pihnari ké mi yih ɓah hi̧ wuri-ay, mi ta pir wuri ya ɓay fe le, mbú̧h hani woiri si ziŋ wuri ma pol ya. Le el ziŋ wuri ma fal.

¹⁸Ŋger ɓayu mí na-ay : Ku sɔk mi ɓahri se, ké gel-mbu̧h hani sa̧w in Ŋgermbay woiri, kéhr nzukri ƴo ri. Mi ya̧ ɓayu ɓa ketina ndi̧,

¹⁹ɓayu ké kéhr hani ɓá ƴo ri ké sakra woiri ɓay ten tehɓay nzukri ké ɓay woyri te-teh.

²⁰Pirna ta-a ɓay fe le, gelke i mbu̧h hani ké nzak fe su̧na ke riŋ Ŋgermbay ɓay nzo sem ke lak huru le, ta ɓa fe su̧na Ŋgermbay mí i su̧ mba,

²¹ɓayu ké nzuk a suŋ suŋ kara takra mbi fe su̧na ye, fe su̧na ye mí ke el kaɓ keni poŋ mbaŋ yeri kaɓ ɗaka. Nzuk a ɓoruri ba, mbah ɓil woyri ke yim[28].

²²Uwa, ké kerpuh woiri fe su̧na, fe nzona ta-a wa ? Ko ya le i ko mbú̧h hani sa̧w in Ŋgerzah ɓa kɔk fe, mí i ƴo ɓaŋ su̧hru kan nun nzukri ké ta ke fe ya le ? A̧w ba, mi ɓáh ani hi̧ wuri ɓáy le ? Ké ɓil fe laɓna-aw ra wa, mí pir wuri ley ? Mi ta pir wuri ya.

²³Ɓayu ké a bi sa̧w fe laɓna ké mi ya̧ ké ta̧w Gaŋ tul feri riw mi el ndoh fe laɓna-u ké ndɔk woiri kandɔkay : Zezu Gaŋ tul feri riw ra dara kú te ni hi̧ ku mgba ni ndoh ndɔk nzuk a ɓoruri ra le, ke mbi peŋ ke suŋaw,

²⁴ke el ke tumbɔl hi̧ Ŋgerzah, mí ke gɔh. Ke ɓahri se : « Peŋay ɓa mun bi ké mi poŋ hi̧ hul ɓay tul woiri. I ƴo tul laɓ fe laɓna bi-ay le, i mbu̧h ziŋ mi ɓilu[29]. »

²⁵Fal fe su̧na bale ke mbi koɓ kaŋ pi. Ke ɓahri se : « Koɓay ɓa sem bi ké ŋga̧h sal in ɓa a foyu. Seh ké i laɓ kaŋ le, i mbu̧h ziŋ mi ɓilu. »

²⁶Kpatara ké i ƴo su̧ peŋay, i ƴo nzo yim koɓay le, i ƴo sɔk ɓay hul Gaŋ tul feri riw hi̧ nzukri kpu̧ru ka̧h nam elna ye keni.

²⁷Kaŋ mí a ge ge ké su̧ peŋ Gaŋ tul feri riw, ké nzo yimu va̧h dan hȩkna le, ke laɓ ɓay kan tul ye ke mun ye gaŋ ɓay mun Gaŋ tul feri riw ke sem ye ké-e hȩk ya.

²⁸A ge ge le ɓá hekre siŋ sina ye ɓa teh-u, ani mí ke su̧ walna peŋ, ani mí ke nzo walna yimaw ɓáy,

²⁹ɓayu ké nzuk ké su̧ peŋaw, nzo yim koɓaw va̧h dan ker ɓahri, mun Ŋgermbay[30] na ɓoɗ le, ke su̧-u, ke nzo-u, mí salɓay mgba tul ye ke mun gaŋ.

³⁰Sa̧wu mí nzukri ɓa ŋgi̧-u ké sakra woiri ta̧-ta̧h, nzuk a ɓoruri na sena, nzuk a ɓoruri ba, hu pi.

³¹Mí gelke nah hekre siŋ sina wah ɓa teh-u ke mun wah le, salɓay Ŋgerzah ta mgba tul wah ya.

³²Mí gelke salɓayu ƴo mgba tul wah le, Ŋgermbay ƴo ndar na hi̧ ɓay hul ɓá mgba tul wah ziŋ nzuk tukalari ya.

³³Kaŋ mí yi̧n biri, gelke i mbu̧h hani ɓay lak huru ke riŋ Ŋgermbay le, í geŋ haniri.

³⁴Mí ɗaka i nzuk a hani le, ké su̧ fe ké puh ye dara ké gi gel-mbu̧h hani ɓáy, rɔkɔ mbú̧h hani woiri ɓá laɓ ɓay kan tul woiri. Tɔr ɓay a ɓoruri le, mi ƴo geŋ nam ké mi ká̧h ta̧w woiri ɓay mí te-teh ɓayuri hi̧ wuri ɓáy.