Read Karang Mbete 1 Kɔrenteri 13 Bible Online

Mbete 1 Kɔrenteri 13 - Karang bible

Mbete 1 Kɔrenteri 13

¹Gelke mi ɓah nzak ɓay ɓahna nzuk pirmatulri, mi ɓah nzak ɓay ɓahna tem nzak pihnari pi, mí law sana ta ɓil law bi ya le, mi ɓa gɔh dali ké mgbe buktuk buktuk mini ta̧w mbara ké mgbe wɔk wɔk.

²Gelke mi ɓah ɓay ké Ŋgerzah ɓaŋ ndoh ɓil law bi, mi tu sa̧w feri gbam ké na law Ŋgerzah, mi tu goso feri gbam, mi ƴo ke sam kanlaw ké mah loh baw kasawri kara pi, mí law sana ta ɓil law bi ya le, mi na ɓa fe ndikpo.

³Gelke mi wal fe ziŋna biri gbam hi̧ nzuk sehri, mini mi poŋ mun bi hi̧ hul ɓay hi̧ fe-u ti̧h ɓa fe-vba̧ haŋ bi, mí law sana ta ɓil law bi ya le, feri-aw gbam ti̧h mi suk ya.

⁴Law sana ƴo ik law, law sana ƴo laɓ lawsuki ziŋ nzukri. Law sana laɓ sere ya, a̧h ka̧w ya, hu̧h tul ya,

⁵laɓ fe gak ya, ƴah suki ɓay tul ye ya, pahra nzak ya, mgba suya ké nzuk laɓ ziŋ ni kan law ye ya.

⁶Law sana ziŋ law rihna tul fe laɓna tukala ya, ketina mí rih law ye.

⁷Law sana gah nzak ya, sam fe a ani ani mí toh tul ye kara law sana ƴo kan law, law sana ƴo geŋ suki kpatara, law sana ƴo su̧h law.

⁸Law sana ƴo ɓa ŋgɔh. Ɓayri ké Tempuki ɓaŋ ndoh ɓil law nzuk ɓay ka-kal. Ɓáh nzak ɓay ɓahna ɓoɗ ɓoɗ ɓa fe saŋ ɓay gbu̧h-u.

⁹Goso fe tunari ɓay ka-kal, ɓayu ké fe tuna wah gba-gba, ɓayri ké Tempuki ɓaŋ ndoh ɓil law wah kara gba-gba pi.

¹⁰Mí sew ké feri gbam ɓay ƴo gelu le, fe ké gba-gba ɓay ta mba.

¹¹Sew ké mi ɓa gun ɓáy ra, mi ɓah ɓay ɓahna gun, mi ker ɓay kerna gun, fe tuna bi kara ɓa fe tuna gun. Mi ŋger bale, feri gbam ké ɓa fe laɓna gun ra kal ke gelu gbam.

¹²Mí sew a aŋay, nah ƴo ko fe-uri roh kandɔk ké nah ko tem mun wah ɓil fe-ko tem. Mí sewu-aw ra nah ɓay ko-u nun ke nun. Sew a aŋay, fe tuna bi gba-gba. Mí sewu-aw ra, mi ɓay tu ni te-teh kandɔk a ye ké-e tu mi kaŋ pi.

¹³Aŋay feri sayay ƴo ri : kanlaw, géŋ suki, law sana. Ké haŋsekle feri sayaw ra law sana mí mba tul tɔruri-aw.