Read Karang Mbete 1 Kɔrenteri 14 Bible Online

Mbete 1 Kɔrenteri 14 - Karang bible

Mbete 1 Kɔrenteri 14

¹Kaŋ dale í ɗuk fal law sana. Í taw ŋgernari ké Tempuki hi̧, wara mí ŋgerna-ɓah ɓay ké Tempuki ɓaŋ ndoh ɓil law woiri mí í taw.

²Nzuk ké Tempuki hi̧ ni ŋgerna-ɓah nzak ɓay ɓahnari ɓoɗ ɓoɗ ɓa fe saŋ ra, ke ɓah ɓayu hi̧ nzuk pirmatulri ya. Ke ɓah ɓayu hi̧ Ŋgerzah, ɓayu ké nzukri ké ƴo gel-dim Ŋgerzah-aw lah ya, mí Tempuki hi̧ ni ke ɓah sa̧wɓayri ké mu̧h ké ɓil law Ŋgerzah.

³Mí nzuk a a̧y ké ƴo ɓah ɓay ké Tempuki ɓaŋ ndoh ɓil law ye ra, ke ɓah ɓayu hi̧ nzuk pirmatulri lah, ɓay kú ŋger keni, ɓay hew niri, ɓay hi̧ law nzukri ɓá voh pi.

⁴Nzuk ké ɓah nzak ɓay ɓahnari ɓoɗ ɓoɗ ra, a ye ke hȩk ye mí ke ŋger keni. Mí nzuk ké ɓah ɓay ké Tempuki ɓaŋ ndoh ɓil law ye ba, hi̧ sa̧w in Ŋgermbay ŋger keni.

⁵Mi yih ɓay a woiri gbam í ɓah nzak ɓay ɓahnari ɓoɗ ɓoɗ. Mí fe ké su mba a a̧w le, Tempuki ɓá hi̧ í ɓah ɓay ké-e ɓaŋ ndoh ɓil law woiri ma. Ɓay fe le nzuk ké ɓah ɓay ké Tempuki ɓaŋ ndoh ɓil law ye ra ƴo hi̧ sa̧w nzuk Ŋgermbayri hu̧h ma pol pol kal nzuk ké ɓah nzak ɓay ɓahnari ɓoɗ ɓoɗ ké nzuk ndazi ɓayuri ta-a.

⁶Í ko yi̧n biri, gelke mi gi ta̧w woiri ké gel-dim Ŋgerzah mí-i ɓah ɓay hi̧ wuri ke nzak ɓay ɓahnari ɓoɗ ɓoɗ ké i lah ya ra wa, mi ti̧h wuri suk gaŋ le wo ? Gelke mi ten sa̧wɓay ye ya, mi sɔk fe tuna ya, mi ɓah ɓay ké Tempuki ɓaŋ ndoh ɓil law bi ya, mi firma wuri ɓay Ŋgerzah ya ra wa, mi ti̧h wuri suk gaŋ le wo ?

⁷Ɓayu si mbew ke fe-loŋ gel kandɔk ti̧w ke nzaŋa. Gelke kusolu ti̧h ɓoɗ ɓoɗ ya le, ani mí nah tú siŋ ké nzuk-ul ti̧w ɗi, ani mí nah tú siŋ ké nzuk-haŋ nzaŋa ɗi le ?

⁸Gelke nzuk-haŋ tul dali zukru kusolu maŋ ba, a ge mí ɓay lek mun ye ɓay si ŋgermu le ?

⁹Kaŋ pi mí a woiri ké i ɓah nzak ɓay ɓahnari ɓoɗ ɓoɗ ɓa fe saŋ ra, gelke nzukri tu nzak ɓay ɓahna-aw ya le, ani mí ku lah wuri le wo ? I ƴo ɓah ɓay hi̧ kuna munu.

¹⁰Nzak ɓay ɓahnari ka̧h ani mí ké tukala ? Mí nzak a a̧y ké na gɔɓ ta-a.

¹¹Kaŋ le mi tu nzak ké nzuk ƴo ɓah-u ya le, mi ɓa mbiki ké pol nzuk ké ƴo ɓah ɓayaw ra, mí a ye kara ke ɓa mbiki ké pol bi pi.

¹²Kaŋ pi mí a woiri ké i taw ŋgernari ké Tempuki hi̧ dale, í vbi ŋgerna a a̧yri ké hi̧ sa̧w nzuk Ŋgermbayri ɓá ŋger. Le i hú̧h keni ma pol pol.

¹³Kandɔkaw mí nzuk ké ƴo ɓah nzak ɓay ɓahnari ɓoɗ ɓoɗ ké gel-dim Ŋgerzah ra, ké goŋ Ŋgerzah ɓá hi̧ ni ŋgerna-ndazi ɓayu pi.

¹⁴Gelke mi ƴo goŋ Ŋgerzah ke nzak ɓay ɓahnari ɓoɗ ɓoɗ ɓa fe saŋ le, tem bi ƴo goŋ Ŋgerzah, tul bi ba, tu fe ké mi ƴo ɓah-u ya.

¹⁵Kaŋ ba, a fe mí-i laɓu ɓáy le ? Mi góŋ Ŋgerzah ke tem bi pi, mi góŋ Ŋgerzah ke fe tuna tul bi pi. Mi ɗí siŋ Ŋgerzah ke tem bi pi, mi ɗí siŋ Ŋgerzah ke tul bi pi.

¹⁶Mí gelke tem wo el ke tumbɔl hi̧ Ŋgerzah ke nzak ɓay ɓahnari ɓoɗ ɓoɗ ɓa fe saŋ, mí nzuk ké gi kaɓ haŋsekle woiri ké-e lah nzak ɓay ɓahna-aw ya ra wa, ke yíh, « Gelu munu » gaŋ le ? Ɓay fe le ke lah ɓay ké mu ɓah ya.

¹⁷A wo le mu ƴo el ke tumbɔl hi̧ Ŋgerzah. Fe-u su mbamba, mí a ye ba, ke ziŋ ŋgerna keni ya dih.

¹⁸Mi el ke tumbɔl hi̧ Ŋgerzah ké mi ɓah ke nzak ɓay ɓahnari ɓoɗ ɓoɗ ɓa fe saŋ mba wuri gbam mba-mba.

¹⁹Mí ké gel mbu̧h hani sa̧w nzuk Ŋgermbayri le, mi ko su-su ɓay mí ɓah ɓay a peh ya-u kaŋto ké ɓay guh law nzukri. Láɓ kandɔkaw su mba ró ɓay raɓ raɓ ke nzak ɓay ɓahnari-aw.

²⁰Yi̧n biri, í ker ɓay kandɔk gunri ya. Ké ɓil suya le, í na ɓa gunri. Mí ɓay kerlaw le, í eŋ nzukri ké ŋger da.

²¹Mbete bolkusol Ŋgerzah ɓahri se : « Mi ɓáh ɓay hi̧ nzuk biri-aw ke nzak ɓay ɓahna a ɓoruri. Tul nzak a ɓoruri, mi ɓáh ɓay keni hi̧ niri dale, ku láh mi ya gaŋ[31]. » Gaŋ tul feri riw ɓah kaŋ.

²²Kaŋ le ɓáh ɓay ke nzak ɓay ɓahnari ta ɓa fe saŋ ké sɔk ɓay hi̧ nzuk-kan law tul Ŋgermbayri ya. Le sɔk ɓay haɓna tul nzukri ké saŋ Ŋgerzah. Ɓay nzukri ké saŋ ni ra ɓáh ɓay ké Tempuki ɓaŋ ndoh ɓil law nzuk-kan lawri ta ɓa fe saŋ ɓay tul woyri ya. Le ɓáh ɓay ké Tempuki ɓaŋ ndoh ɓil law ɓa fe saŋ ké sɔk ɓay hi̧ nzukri ké kan law tul Ŋgermbay.

²³Gelke a woiri sa̧w in Ŋgermbay i mbu̧h haniri gel mbew, mí gbam woiri i ƴo ɓah ke nzak ɓay ɓahnari ɓoɗ ɓoɗ ra, mí nzuk hani mini nzuk ké saŋ Ŋgerzah gi rih sakra woiri le, ku ɓay ɓahri, eh mí ɗuk wuri, kaŋ ya le ?

²⁴Mí gelke gbam woiri i ƴo ɓah ɓay ké Tempuki ɓaŋ ndoh ɓil law woiri dale, nzuk-saŋ Ŋgerzah mini nzuk a hani-u gi rih le, ɓay ké Tempuki hi̧ ni ke lah ra ƴo tuŋ ni tu-tuŋ, ɓay ké-e lah ra ƴo ki̧ fal fe laɓna ye.

²⁵Ɓayuri ten ɓay ké mu̧h ɓil law ye ma kala dale, ke húk siɓa, ke dím Ŋgerzah ɓahri : « Ŋgerzah ƴo sakra woiri gaŋ ɓa ketina[32]. »

²⁶Mí a fe ɓáy le, yi̧n biri ? Gelke i mbú̧h hani ɓay dim Ŋgerzah le, a ge ge kara ƴo ke ŋgerna ké Tempuki hi̧ ni hi̧ ni. Nzuk mbew ƴo ke ŋgerna-ɗi siŋ-dim Ŋgerzah, nzuk a ɓoru ƴo ke ŋgerna-sɔk ɓay Ŋgerzah, nzuk a ɓoru ƴo ke ŋgerna-ten sa̧wɓay, nzuk a ɓoru ƴo ke ŋgerna-ɓah ɓay ke nzak ɓay ɓahnari ɓoɗ ɓoɗ ɓa fe saŋ, nzuk a ɓoru ƴo ke ŋgerna-ndazi ɓayu, mí fe-uri gbam ɓá laɓ ke gelu gelu hi̧ sa̧w nzuk Ŋgermbayri ɓá ŋger keni.

²⁷Nzukri ké ƴo ke ŋgerna-ɓah ɓay ke nzak ɓay ɓahnari ra le, ɓá na ɓa nzukri seɗe, say kaŋto. Mí kú ɓah ke toŋna-u toŋna-u dara mí nzuk ké ƴo ke ŋgerna-ndazi ɓayu ɓá ƴo ri pi.

²⁸Ta-a le, kú tuh nzak woyri ké gel mbu̧h hani sa̧w in Ŋgermbay, mí kú ɓah ɓay hi̧ Ŋgerzah ma law woyri.

²⁹Mí nzuk a ɓoruri ké ƴo ke ŋgerna-ɓah ɓay ké Tempuki ɓaŋ ndoh ɓil law woyri, ɓá na ɓa nzukri seɗe mini say. Tɔr nzuk a ɓoruri ké gel mbu̧h hani woiri-aw ba, ɓá fakla sa̧w ɓayu ɓa teh-u ko[33].

³⁰Ké sakra nzukri ké ƴo lah ɓayu, Tempuki hi̧ nzuk mbew tu sa̧w fe le, nzuk ké ƴo ɓah ɓay ɓá tuh nzak ye,

³¹ɓayu ké gbam woiri i ƴo ke ful-ɓah ɓay ké Tempuki ɓaŋ ndoh ɓil law woiri, mí í ɓah ɓayuri ke toŋna-u toŋna-u, ɓay hi̧ nzukri gbam ɓá ziŋ fe firma pi, ɓá ziŋ nzak hewna pi.

³²Nzuk ké Tempuki ɓaŋ ɓay ndoh ɓil law ye ra nzuku ƴo ke ful ɓay ɓah ɓayu, ke ɓa gaŋ tul mun ye,

³³ɓayu ké Ŋgerzah ta ɓa záh-laɓ sa̧na ya, mí ke ɓa záh ké ƴo hi̧ ɗeŋ kandɔk ké fe-u ƴo laɓ ké gel-mbu̧h hani sa̧w nzuk yeri gbam.

³⁴Wu̧yri ɓá tuh nzak woyri ké gel mbu̧h hani sa̧w in Ŋgermbay, ɓayu kú-u ta ke ful-suh ɓay ya, mí hȩkna ɓá ƴo ri kandɔk ké bolkusol[34] ɓah.

³⁵Gelke-e yih vbi sa̧w fe a hani-u le, ké vbi wah ye ké puh. Ɓay hi̧ wu̧ynzuk ɓá suh ɓay ké gel mbu̧h hani sa̧w in Ŋgermbay ɓa su̧hru.

³⁶Kandɔk ké gel-mbu̧h hani sa̧w nzuk Ŋgerzahri ɓa gel ké Ŋgerzah hi̧ ɗeŋ ra, mi vbi wuri ɓahri, ɓay Ŋgerzah ra ba, sa̧wu ti ké ta̧w woiri le ? Ɓayu gbu̧h sa tul woiri ke hȩk le ?

³⁷Gelke nzuk ko mun ye ɓa nzuk ké ƴo ke ŋgerna-ɓah ɓay ké Tempuki ɓaŋ ndoh ɓil law ye le, nzuku ɓá tu ɓahri, ɓayri ké mi vbeh hi̧ wuri-ay ɓa bolkusol Gaŋ tul feri riw.

³⁸Gelke-e sa tu kaŋ ya le, a ye kara Ŋgerzah tu ni ya pi.

³⁹Kaŋ mí yi̧n biri, í ri̧h si̧w ɓay tul ŋgerna-ɓah ɓay ké Tempuki ɓaŋ ndoh ɓil law woiri, mí í gboh ŋgerna-ɓah nzak ɓay ɓahnari ra ya pi.

⁴⁰Kandɔkaw mí feri gbam ɓá laɓ mah hȩkna ke gelu gelu.