Read Karang Mbete 1 Kɔrenteri 15 Bible Online

Mbete 1 Kɔrenteri 15 - Karang bible

Mbete 1 Kɔrenteri 15

¹Yi̧n biri mi ƴo el ke fal ɓaysuki hul Ŋgermbay ké mi ka-kah-u hi̧ wuri, ké i ya̧, mí i ɓer gi̧w tulu ra.

²Ɓaysuki-aw mí ya̧ wuri kandɔk ké i ƴo tul mgbá ɓayu. I ƴo tulu ya le, kanlaw woiri na kpo̧k.

³Ɓaysuki ké mi ya̧ mí-i el hi̧ wuri ɓa ɓay a titilu ra ɓahri se, mbete Ŋgerzah sɔk ɓay hul Ŋgermbay lewsa̧, mí Ŋgermbay gi hu ɓay tul suya wah,

⁴ku gɔr ni, mí ke ti̧h ke puh záh ke pa̧ymun a foyu ke nam a sayu. Fe-u laɓ kandɔk ké mbete Ŋgerzah sɔk lewsa̧ ra.

⁵Mí ke ti̧h nun Piyer. Bol falu Ŋgermbay el ti̧h nun nzuk-dih fal ye a boh falu seɗeri[35].

⁶Bol falu ke ti̧h nun nzuk yi̧n ɓil Ŋgermbay a ɓoruri ké gel mbew. Ki̧na woyri kal sɔɗ sɔɗ ndiɓi. Ké mi ƴo vbeh mbete-ay, ŋgi̧na nzuk a hani-uri-aw kaɓ ke nun ɓáy, mí nzuk a ɓoruri ba, ta tukala mba.

⁷Bol falu ke ti̧h nun Zak dara mí ke ti̧h nun tɔr gun nzak pihnari gbam pi.

⁸Ɔh tɔru bale ke ti̧h nun bi, mi na kandɔk gun ké mah ye kew few mbuŋna ye,

⁹ɓayu ké haŋsekle gun nzak pihnari gbam mi ɓa gun. Mi mah kú-u ɗi mi ɓa gun nzak pihna ya dih ɓay fe le, lewsa̧ mi laɓ sa̧w nzuk Ŋgerzahri koseh.

¹⁰Mí tumbɔl lawsuki Ŋgerzah mí-i ti̧h ɓa nzuk ké i ko ni-ay. Lawsuki ké-e laɓ ziŋ mi ra kal ndikpo ya. Ketina le mi ta̧h ɓil pihna ka-kah ɓaysuki kal ta̧hma gun nzak pihna a ɓoruri gbam ka-kal. Ta ɓa a bi ke huhrumun bi ya. Wara le lawsuki Ŋgerzah ƴo ziŋ mi.

¹¹Kaŋ mí ɓa a bi mini ɓa gun nzak pihna a ɓoruri kara ɓaysuki ké nah ka-kah-u ké mi ƴo el ke fal ɓayu mí na-aw. Ɓaysuki ké i ya̧ ba, mí na-aw pi.

¹²Nah ka-kah ɓahri se, Ŋgermbay ti̧h ke puh záh ke pa̧ymun a foyu. Ani wara mí nzuk a haniri ké sakra woiri ƴo ɓahri, hulri ta ziŋ pa̧ymun a foyu ya le wo ?

¹³Gelke ti̧hna nzukri ke puh záh ke pa̧ymun a foyu ta-a le, Ŋgermbay kara ti̧h ke puh záh ke pa̧ymun a foyu ya pi.

¹⁴Uwa, Ŋgermbay ti̧h ke puh záh ke pa̧ymun a foyu ya le, ka-kah ɓay wah-aw ɓa kuna. Kanlaw woiri tul Ŋgermbay kara na kpo̧k pi.

¹⁵Zíŋ pa̧ymun a foyu ta-a kandɔk kú-u ɓah ké sakra woiri le, a wah nah kuŋ ɓay kan nzak Ŋgerzah ɓay fe le, nah te-teh ɓay ye ɓahri, Ŋgerzah mí ten Ŋgermbay ke puh záh ke pa̧ymun a foyu. Mí a woyri ba, ku ɓahri, zíŋ pa̧ymun a foyu ta-a. Dale a ye Zezu ra ba, Ŋgerzah ten ni ya bale, hulri kara ta ziŋ pa̧ymun a foyu ya pi.

¹⁶Hulri ta ziŋ pa̧ymun a foyu ya kandɔk ké nzuk a haniri ɓah gaŋ le, sɔk ɓahri, Ŋgermbay kara ti̧h ke puh záh ke pa̧ymun a foyu ya pi.

¹⁷Gelke Ŋgermbay ti̧h ke puh záh ke pa̧ymun a foyu ya le, kanlaw woiri na gɔɓ, salɓay hul mgba tul woiri kɔɓ ɓáy.

¹⁸Dale nzukri ké ta tukala mba, ké riŋ Ŋgermbay mgba tul woyri ra, ku zi wu̧m pi.

¹⁹Nah ɓaŋ law wah te tul Ŋgermbay ɓay kaɓ keni tukala-ay kaŋto le, nah baseh mbamba ké sakra nzukri gbam.

²⁰Wara le í ko wuri ketina. Ŋgermbay ti̧h pol ɗekrek ké sakra hulri. Ké haŋsekle nzukri ké na tul dakan ke eŋ tul fe pay ké ŋger pol.

²¹Kandɔk ké hul gi ke tul nzuk pirmatul mbew a ye Adam, ti̧hna nzukri ke pa̧ymun a foyu kara gi ke tul nzuk pirmatul mbew a ye Zezu.

²²Ɓayu ké sa̧w nzukri gbam ti ke tul Adam le, ku hú-hu. Mí nzukri ké sa̧w woyri ɓa Ŋgermbay ba, gbam ɓay ɔ-ɔkna ke pa̧ymun a foyu.

²³Mí a ge ge le ke toŋna-u toŋna-u. Tul fe pay ɓa a ye Ŋgermbay. Ti̧hna ye ké nun nzuk yeri dara mí ku zíŋ pa̧ymun a foyu ɓáy.

²⁴Dale ɓa sew a ɔh tɔru munu. Ŋgermbay ƴo ɔh ziŋ záh tukalari geɓ geɓ, ɓa ra záh-lak mbayri, ɓa ra záh riŋ ɗinari, ɓa ra záh huhrumunri, gbam woyri mí ke ƴo ɔh ziŋ niri. Mí ke él ndar lák mbay hi̧ baah Ŋgerzah.

²⁵Ɓayu ké Ŋgermbay ɓá lak mbay dɔh dɔh si ka̧h sew ké-e ɔh ke nzukbaa yeri gbam ɓa gel-ku̧ bɔk ye[36].

²⁶Nzukbaa a saru mgbaɗ ké-e ɓay ɔh ziŋ ni ɓa hul,

²⁷ɓayu ké mbete ɓahri, feri gbam na huh bɔk ye, sɔk ɓahri, feri gbam ɓa gel-ku̧ bɔk ye da, mí Ŋgerzah ké poŋ feri-aw ku̧ ndɔk ye mí mba tul ye.

²⁸Kandɔk ké feri gbam ɓa gel-ku̧ bɔk ye ra, gun ke mun ye gaŋ ɓay el poŋ tul ye hi̧ ni a ye ké-e hi̧ feri gbam na huh bɔk ye ra dale, Ŋgerzah ɓa nzuk-ɔh tɔr feri gbam ke gelri gbam.

²⁹Gelke hulri ta ziŋ pa̧ymun a foyu ya kandɔk ké nzuk a hani-uri ƴo ɓah-u ra wa, ɓay fe mí nzukri ƴo soh mbih ɓay tul hulri ɓáy le ? Ɓay tul fe mí ku ƴo ti̧h mbih batemaw le[37] ?

³⁰Ti̧hna nzukri ke pa̧ymun a foyu ta-a ra wa, ɓay tul fe gaŋ mí a wah nah ƴo ndoh mun wah hi̧ hul sa̧wsehri gbam le ?

³¹Ketina nam ke nam mi ƴo ko hul. Mi ɓahri, i ɓa fe-vba̧ haŋ bi gaŋ. Ke riŋ Gaŋ wah Mbay Zezu ɓa ketina.

³²Ŋgermu ké mi ruh ke fe mgbamri ké Efeze, mi ruh ŋgermu-aw ɓay tul kerɓay tukala kaŋto le, ti̧h mi suk fál suŋ ? Gelke hulri ta ziŋ pa̧ymun a foyu ya ra le, náh su̧ fe, náh nzo fe ɓayu ké pele le, nah hú wu̧m[38].

³³Í reh ful ya. Káɓ gel mberem kɔk ɓayri ra ƴo ɓeɓ siŋ sina a sukiri.

³⁴Í el wuri mbi kerɓay a teh-u, í laɓ suya ya, ɓayu ké nzuk a haniri ké sakra woiri-aw tu Ŋgerzah ya. Mi ɓah kaŋ ɓay hi̧ su̧hru ɓá se wuri.

³⁵Mí nzuk a hani ɓay ɓahri : « Ani mí záhri ɓay ziŋ pa̧ymun a foyu le ? Sam mun a suŋ mí ku él gi keni le ? »

³⁶Kɔk nzuk, mi̧hri ké mu ruh ra, zah-u hu ya le, lawu ta ti̧h ɓa gay fe pay ya.

³⁷Mi̧hri ké mu ruh ra, mu ruh ɓa gay fe pay ya ɓáy. Le ɓa ti̧hri naŋ mini ti̧hri fe a ɓoru mú-u ruh.

³⁸Mí Ŋgerzah hi̧ ti̧hri fe pay gayu kandɔk ké law ye yih. Ti̧hri fe pay a suŋ suŋ le, ƴo ke gay ye gay ye.

³⁹Mun hayri gbam mah hani ya. Ku na ɓoɗ ɓoɗ. Nzuk pirmatul ƴo ke mun hay ye ɓoɗ, nay ƴo ke mun hay ye ɓoɗ, gundoy ƴo ke mun hay ye ɓoɗ, nzuy ƴo ke mun hay ye ɓoɗ.

⁴⁰Mun fe nunmbamri ƴo ri, mun fe tusiɓari ƴo ri, mí ndu̧yna mun fe nunmbamri na ɓoɗ, ndu̧yna mun fe tusiɓari na ɓoɗ.

⁴¹Ndu̧yna mun seh na ɓoɗ, ndu̧yna mun few na ɓoɗ, a ɓoru ɓáy ɓa ndu̧yna mun gunwu̧y nunmbamri. Ké sakra gunwu̧y nunmbamri kara ndu̧yna mun woyri na ɓoɗ ɓoɗ pi.

⁴²Kaŋ pi mí ɓa ti̧hna záhri ke pa̧ymun a foyu mah hani ke mi̧hri kú-u ruh gɔl tulu ke siɓa. Nzuk pirmatul ba, ku gɔr mun ye ɓa fe a puŋu, mí ke ti̧h eŋ gay fe pay le, mun ye ta pu-puŋna mba.

⁴³Ku gɔr mun nzuk pirmatul ɓa kɔk fe, mí ke ti̧h le, mun ye ndu̧y ɓa fe riŋ ɗina. Ku gɔr mun nzuk pirmatul ɓa ko̧hko fe, mí ke ti̧h le, mun ye ƴo ke huhrumun.

⁴⁴Ku gɔr mun nzuk pirmatul ɓa a sa̧w som siɓa. Mí ke ti̧h le, mun ye ɓa a sa̧w Tempuki. Kandɔk ké sa̧w a som siɓa ƴo ri ra, sa̧w a Tempuki kara ƴo ri pi.

⁴⁵Kaŋ mí ku vbeh ɓahri, Adam nzuk pirmatul a titilu ra tem ye ziŋ ɔkna[39]. Mí Adam a saru ba, ti̧h ɓa nzuk pirmatul ké tem mun ye ƴo hi̧ ɔkna[40].

⁴⁶Mí ta ɓa mun nzuk pirmatul a sa̧w Tempuki mí ti̧h pol ya. Wara le mun nzuk pirmatul a sa̧w som siɓa mí ti̧h pol dara mí mun nzuk pirmatul a sa̧w Tempuki el ti̧h fal ɓáy.

⁴⁷Sa̧w nzuk pirmatul a titilu ɓa tusiɓa. Sa̧w nzuk pirmatul a toŋna-u ba, ɓa nunmbam.

⁴⁸Kaŋ mí mun nzuk kú-u laɓ ke som siɓa ra ɓa sam mun nzuk pirmatul ké sa̧w woyri ɓa som siɓa. Mí mun nzuk ké sa̧w ye ɓa nunmbam ba, ɓa sam mun nzuk pirmatul ké sa̧w woyri ɓa nunmbam.

⁴⁹Kandɔk ké mun wah ba hani ke mun nzuk pirmatul ké sa̧wu ɓa som siɓa ra, kaŋ pi mí mun wah ɓay ba hani ke mun nzuk pirmatul ké sa̧wu ɓa nunmbam.

⁵⁰Yi̧n biri, mi ɓahri se, mun ke sem ké ɓay pu-puŋ ta ya̧ puh lakna Ŋgerzah ya. Fe a a̧y ké ɓay pu-puŋ ra ta ya̧ fe a a̧y ké ɓay kaɓ kpatara ra ya.

⁵¹Mi ƴo ten sa̧wɓayay hi̧ wuri. Nah ta na tul dakan gbam ya. Wara le mun wah gbam mí ɓay kom gba̧y ɓa mun a ɓoru, ké ɓil te ta̧y nun mbew.

⁵²Seh ké úl baw ti̧w a saru ɓay mgbe-u dale, mun hulri ɓay ti̧h ke pa̧ymun ké pu-puŋna ya, a wah mun wah ɓay sɔɓ ke mun ké pu-puŋna ya.

⁵³Kandɔk ndóh gar, mun ké ɓay pu-puŋ ra ɓá ndoh mun ké pu-puŋna ya. Mun ké ɓay hu-hu ra ɓá ndoh mun ké kaɓ kpatara.

⁵⁴Nam ké mun a pu-puŋ ɓay ndoh mun ké pu-puŋna ya, mun a hulu ɓay ndoh mun ké kaɓ kpatara dale, ɓay kú-u vbeh lewsa̧ ra ɓay laɓ ke gelu gelu. Ɓayu mí na-ay : Tul Hul gɔl gba̧y gba̧y ɓil haw ŋgermu[41].

⁵⁵A wo Hul, ŋgerna-i fe wo na fál suŋ ? A wo Hul, ŋgerna-ɔr ki̧n wo na fál suŋ lo[42] ?

⁵⁶Ŋgerna-i fe hul ɓa suya, ŋgerna suya ba, ɓa bolkusol Ŋgerzah.

⁵⁷Mí tumbɔl hi̧ Ŋgerzah ɓay lawsuki ye ké-e hi̧ Gaŋ wah Ŋgermbay Zezu haw ŋgermu hi̧ na.

⁵⁸Kaŋ dale yi̧n biri, gun sanari, í ɓer gi̧w, í ƴo ɓa kpuh-u. Pihna Gaŋ tul feri riw ɓá ŋgi̧ ndekle ndekle kpatara ké ta̧w woiri. Ɓay fe le i tu-tu, ta̧hma woiri ɓil pihna Gaŋ tul feri riw ra kal ndikpo ya.