Read Karang Mbete 1 Kɔrenteri 16 Bible Online

Mbete 1 Kɔrenteri 16 - Karang bible

Mbete 1 Kɔrenteri 16

¹Ɓay mbu̧h fe-so sa̧w nzuk Ŋgerzahri ké Zurusalem ké mi sɔk mahfulu hi̧ sa̧w in Ŋgermbay ké gelri ɓoɗ ɓoɗ ké tusiɓa Galaɗ ra, a woiri kara í laɓ kaŋ pi.

²Nam a titilu ké ɓil dimasiri gbam a ge ge ké sakra woiri ɓá mbek fe hi̧na mah gel ŋgerna ye dara a bi mí ka̧h ɓáy, rɔkɔ ka̧hna bi le, í ƴo tul mbu̧h fe.

³Gelke mi ka̧h ta̧w woiri le, mi píh gun nzak pihnari ké i lu niri ɓay kú suk fe hi̧na lawsuki woiri. Mi píh niri ke mbete tulu ɓay kú si keni ma Zurusalem.

⁴Su ɓay mí si Zurusalem pi le, kú mbu̧h ful ziŋ mi.

⁵Mi ɓay ka̧h ta̧w woiri ke mahful a Maseduwan kandɔk ké mi ɓay kal tusiɓa-aw.

⁶Mi káɓ ziŋ wuri nam mah fe, ko ya le, few say ɓay hi̧ í ziŋ ful píh mi ma pol ɓa suki.

⁷Mi sa kuŋ nzak mberem wahri ke kalna bi ya. Mi ker ɓay kaɓ ziŋ wuri nam mah fe, gelke Gaŋ tul feri riw hi̧ mi ful.

⁸Aŋay mi káɓ Efeze kpu̧ru ka̧h ti̧hmbih pandekoɗ

⁹ɓayu ké mahful mgbur ɓa ah-u hi̧ mi ɓay mí laɓ pihna ké ti̧h suk, mí nzukbaari ŋgi̧ mbamba pi.

¹⁰Timote ka̧h ta̧w woiri le, í laɓ ger hi̧ hȩkme ɓá se ni ke nun woiri ya, ɓayu ké-e ɓa gun-laɓ pihna hi̧ Gaŋ tul feri riw kandɔk a bi pi.

¹¹Le nzuk ɓá ko ni ɓa gun ya, mí tɔrna ye í pih ni ɗeŋ gi ta̧w bi ɓa suki. Nah ƴo geŋ ni ke nzuk yi̧n ɓil Ŋgermbayri.

¹²Ɓay yi̧n wahri Apolo ba, mi hew ni ɓa ŋgi̧-u ɓay ké si ta̧w woiri ke nzuk yi̧n ɓil Ŋgermbayri. Ke sa si aŋay ya ɓáy, mí ke si-u gelke-e ziŋ ful.

¹³Í ru̧ ke mun woiri, í ƴo ɓa kpuh-u ŋgi̧w ŋgi̧w ké ɓil kanlaw tul Ŋgermbay, í mgba mun woiri ɓa wo̧ronzuk, í ɓer gi̧w.

¹⁴Sa̧w fe laɓna woiri gbam ɓá na ɓa law sana.

¹⁵Yi̧n biri i tu wuri Etefana ke nzuk kerpuh yeri tu-tu. Ku ɓa nzuk-kan law tul Ŋgermbay a titiluri ké tusiɓa Akay. Ku mbi mun woyri ɓay laɓ pihna hi̧ sa̧w nzuk Ŋgerzahri.

¹⁶Mi hew wuri, í hȩk sam nzuk a kandɔkawri-aw ke bɔh pihna woyri gbam kú-u ƴo kah rohna ziŋ niri ɓil pihna.

¹⁷Law bi rih mi ɓay gina Etefana ke Fertuna ke Akaykus. Sonari ké i ziŋ ful laɓ ke mun woiri hi̧ mi ɔh ya ra, ku gi laɓ ɔh.

¹⁸Ku voh kerɓay bi, ku voh kerɓay woiri pi. Kaŋ le í ko sam nzuk a kandɔkawri mah nun woiri.

¹⁹Sa̧w in Ŋgermbay ké ƴo mbu̧h ké tusiɓa Azi vah wuri. Akila ke wu̧y ye Pirisil ke sa̧w in Ŋgermbay ké ƴo mbu̧h hani ké kerpuh woyri ra ku pih vahna hi̧ wuri ké i ƴo mbew ziŋ Gaŋ tul feri riw pi.

²⁰Nzuk yi̧n ɓil Ŋgermbayri gbam vah wuri. Í vah haniri ke law in a teh-u.

²¹A bi Pɔl gaŋ mí-i vbeh vahna-ay ke ndɔk bi.

²²Gelke nzuk sa ɓay Gaŋ tul feri riw ya le, haɓna ɓá ta ni. Mi vah wuri ke nzak arame ɓahri, maran ata, sɔk ɓahri, nah ɗi Gaŋ tul feri riw gi.

²³Lawsuki Zezu Gaŋ tul feri riw ƴo ziŋ wuri.

²⁴Law sana bi ƴo ziŋ wuri gbam. Nah ƴo wuri mbew ziŋ Mbay Zezu.