Read Karang Mbete 1 Kɔrenteri 4 Bible Online

Mbete 1 Kɔrenteri 4 - Karang bible

Mbete 1 Kɔrenteri 4

¹Su-su ɓay ko na ɓa gun-laɓ pihnari ké ƴo laɓ pihna hi̧ Ŋgermbay kaŋto, su-su ɓay ko na ɓa nzuk-mgba sa̧w kerɓay ké Ŋgerzah mu̧h lewsa̧ ra hi̧ nzukri lah.

²Mí fe mbew ké nzuk yih ké ta̧w nzuk-mgba sa̧w fe ye ra le, ké ƴo tul mgbá sa̧wu ke law mbew.

³Dale ɓay ɓahna woiri ké tul bi mini nzukri goh mi kara se mi ya. Law bi kara laɓ ɓay kan tul bi ya

⁴ɓayu ké law bi nzah ɓay ya. Keni-aw kara ta ɓa a a̧w mí lu ɓay ké tul bi ya. Ɓay fe le nzuk-kuŋ salɓay tul bi ɓa Gaŋ tul feri riw.

⁵Kaŋ le í takra kuŋ salɓay ya, í geŋ sa̧wseh-u. Í geŋ elna Gaŋ tul feri riw. A ye ke téh gel tul ɓayri ké mu̧h ɓil tirima. Ke tén ɓayri ké na law nzuk ma kala dale, a ge ge le ɓay ya̧ pirna ye ké ta̧w Ŋgerzah.

⁶Kaŋ mí yi̧n biri mi mbi lawɓayri-aw ra ɓah keni ɓay bi ke Apolo ɓay so wuri hi̧ í firma ɓayay ké ta̧w wah ɓahri, ɓá zo tul fe vbehna ya rɔkɔ mgbá nzuk mbew tuh ke nzuk a ɓoru ɓá hi̧ í hu̧h tul el kehr hani.

⁷Kandɔkaw a ge mí ɓa sa̧w-kehr mu ke nzuk a ɓoru ɓa nzuk le ? A fe mú-u ya̧ mí mu nda giri ɓahri, fe ziŋna wo munu le ? Ké mu ziŋ kara ɓay fe mú-u ƴo vba̧ haŋ ɓahri, sa̧wu ɓa ŋgerna wo le ?

⁸I ker ɓahri, i ƴo ɓil vana da, i ɓa nzuk fe ziŋna da. Nah ta-a kara i ƴo lak mbay da. Nah mbi kɔk kerɓay woiri el ɓah hi̧ wuri ɓahri, í lak mbay si wɔrɔk ge ɓay hi̧ a wah kara náh lak mbay ziŋ wuri pi. I tu ya ɓáy le wo ?

⁹A wah gun nzak pihna Ŋgermbayri ra mi ko ɓahri se, Ŋgerzah ten na ɓa sar nzukri mgbaɗ. Ke ten na ké nun nzukri, ké nun tem nzak pihnari, ké nun tukala pi ɓa fe-yi̧h yi̧hna eŋ mgbalri kú-u laɓ niri ɓay i-u kaŋ.

¹⁰A wah nah ɓa kɔk nzuk ɓay riŋ Ŋgermbay, mí a woiri ké i ƴo ziŋ ni i ru̧-ru̧. Nah ta̧-ta̧h, mí i ŋge-ŋger. I ƴo ke riŋ ɗina, mí a wah nah ɓa fe ndikpo.

¹¹Kpu̧ru ka̧h guri nah ƴo lih ɗaka, kɔkmbih ƴo i na, nah si mun ndikpo, nah ƴo ya̧ vba̧na, nah ta ke puh ya.

¹²Nah ƴo kah rohna laɓ pihna ke ndɔk wah. Ku ƴo far na le, nah lu mgbɔkɔ hi̧ niri. Ku ƴo laɓ na koseh le, nah su̧h law.

¹³Ku ƴo laɓ nani ke riŋ wah le, nah el ke ɓay a voh-u hi̧ niri. Nzuk tukalari ƴo laɓ na eŋ ɗikma-ku̧ tul nzakseh, ku ƴo laɓ na eŋ vbi̧ri woyri ka̧h aŋay.

¹⁴Mi vbeh ɓayaw ɓay ɓaŋ su̧hru kan nun woiri ya. Le kandɔk ké i ɓa gun sana biri mí-i kɔklɔ suk woiri keni

¹⁵ɓayu ké a bi mi ɓa bah-mbuŋ wuri ke ɓaysuki hul Mbay Zezu hi̧ sa̧w woiri ƴo mbew ziŋ ni. Bah-hɔl wuri ɓil ɓay Ŋgermbay ɓa sɔɗ sɔɗ boh kara bah-mbuŋ wuri ɓa mbew.

¹⁶Kaŋ le mi ƴo hew wuri, í ndɔl fe laɓna bi.

¹⁷Sa̧wu mí-i pih Timote a ye gun sana bi ɓil Ŋgermbay, ke ƴo lah mi ɓa suki ɓil Ŋgermbay pi. Ke él dum law woiri ké tul siŋ sina bi ké si mbew ziŋ Ŋgermbay kandɔk ké mi sɔk sa̧w in Ŋgermbay ké gelri ɓoɗ ɓoɗ gbam.

¹⁸Nzuk a haniri ké sakra woiri hu̧h tul. Ku ker ɓahri, mi ta el si ko wuri mba.

¹⁹Mí Gaŋ tul feri riw poŋ ful hi̧ mi si ta̧w woiri ɓa gah-u le, mi si-u. Mi tú ɓay ké nzuk-hu̧h tulri-aw ƴo ɓah-u kaŋto ya. Wara le mi tú ŋgerna woyri pi

²⁰ɓayu ké lák mbay Ŋgerzah ta ɓa ɓay ɓahna ya. Le ɓa ŋgerna ye.

²¹Fe a suŋ mí i yih le ? Mí si ta̧w woiri ke ndeh mini mí si ta̧w woiri ke law sana Tempuki a ye ké-e ɓa sa̧w law a voh-u ra le ?