Read Karang Mbete 1 Kɔrenteri 5 Bible Online

Mbete 1 Kɔrenteri 5 - Karang bible

Mbete 1 Kɔrenteri 5

¹Mberem nunpuki woiri ya̧ gelri ya̧h ya̧h. Sam fe laɓna-aw nzuk-dih fal záhri kara laɓ ya. Nzuk a hani-u ké sakra woiri ƴo na ke wu̧y bah ye !

²Mí i ƴo hu̧h tul keni guŋguŋ ɓáy. Wara le su̧hru ɓá se nun woiri ŋgu̧y ŋgu̧y. Su̧hru se nun woiri ŋgu̧y ŋgu̧y le, ɓay ni̧h nzuk-laɓ fe a kandɔkaw ké sakra woiri ma kala.

³Mí a bi ra mun bi ta ta̧w woiri ya kara, ke Tempuki mi ƴo ta̧w woiri. Kandɔk ké mi ƴo sakra woiri mi kuŋ salɓay ke riŋ Zezu Gaŋ tul feri riw ku̧ tul nzuk ké laɓ sam pihna-aw da. A woiri ke a bi ɓay Tem wah ké mbew, nah mbu̧h wuri mbew. Le ke huhrumun Gaŋ wah Zezu salɓay ké mi kuŋ ku̧ tul sam nzuk a kandɔkaw ndoh ni ndɔk nzukbaa a ye mbay záh tukala ɓay ɓeɓ mun hay ye. Mí nam Gaŋ tul feri riw le Gaŋ tul feri riw ɓay ya̧ tem ye.

⁶Hú̧h tul woiri su ya. I tu wuri ya lo ? Suya ké haŋsekle woiri mah hani ke is. Gelke is ndi̧ mí wa̧h ɓil farin le, hew farin ur dukuku[10].

⁷Í fer wuri isaw ku̧ kpah ɓay í ti ɓa foyu ɓa peŋ dan is ɓayu ké guy buma ti̧hmbih-su̧ peŋ dan is wah ra vbeh da, a ye Ŋgermbay mí ɓa guy buma-u[11].

⁸Kandɔkaw mí nah ƴo wuri tul ti̧hmbih-u ke peŋ ké wa̧h ke is ya. Isu ɓa fe laɓna suya, ɓa fe laɓna a pipiri-uri. Le náh su̧ wuri peŋ ti̧hmbih ke peŋ dan is ɓa law a teh-u ke ketina.

⁹Mi vbeh mbete hi̧ wuri pol ɓahri, í mgba ma̧ra ke nzuk-laɓ nunpukiri ya.

¹⁰Mí nzuk a kalari ké laɓ nunpuki, ké na ɗaka feri, ké gɔɓrɔ feri, ké dim záhri, mi ɓah ɓay ké tul woyri ya. Mi ɓah ɓay si tul woyri le, i ta kaɓ sakra nzuk tukalari ya.

¹¹Aŋay ɓay mgbá ma̧ra ra mi vbeh ɓahri se, mi ɓah ɓay si tul nzukri ké riŋ misoŋ ɗi ké tul woyri, mí ku ƴo laɓ nunpuki, na ɗaka feri, dim záh, láɓ nani, hí̧ tul hi̧ yim, gɔɓrɔ fe. Le sam nzuk a kandɔkawri í mgba ma̧ra ziŋ niri ya, í mbu̧h ndɔk gel fe su̧na[12] ziŋ niri ya pi.

¹²Kúŋ salɓay ku̧ tul nzuk a kalari ko mi lo ? Kúŋ salɓay kan tul nzuk ké mbu̧h ziŋ wuri, ɓayu ko wuri ko.

¹³Nzuk a kalari ra Ŋgerzah mí ɓay kuŋ salɓay ku̧ tul woyri. A woiri ba, í ni̧h nzuk-laɓ sam fe a pipiri-u ra ké sakra woiri ma kala.