Read Karang Mbete 1 Kɔrenteri 6 Bible Online

Mbete 1 Kɔrenteri 6 - Karang bible

Mbete 1 Kɔrenteri 6

¹Mí gelke nzuk a hani ké sakra woiri ƴo ke ɓay ziŋ mbaŋ ye le, ani mí ke mbi tul ye ƴo sek mbaŋ ye ma ta̧w nzukri ké sa̧w woyri ta ɓa Ŋgerzah ya le ? Ke sa gi ke ɓayu ma ta̧w sa̧w gun Ŋgerzahri ya lo ?

²Uwa ! I tu wuri ya le wo ? Sa̧w gun Ŋgerzahri mí ɓa nzukri ké ɓay kuŋ salɓay ku̧ tul tukala gaŋ. A woiri ké i ɓa nzukri ké ƴo kuŋ salɓay ku̧ tul tukala ra wa, salɓay a mah gelu ndi̧ ké haŋsekle woiri, i mah kuŋu ya ley ?

³I tu wuri ya le ? A wah nah ɓay kuŋ salɓay ku̧ tul tem nzak pihnari gaŋ. Ani ɓay fe zɔklɔ gel kaɓna a tusiɓa-ay mí nah mah ya le ?

⁴Gelke i ƴo ke ɓay ziŋ mbaŋ woiri ké ɓayu ko fe zɔklɔ gel kaɓna a tusiɓa-ay le, nzuk a kalari-aw ké ta ke nzak-ɓah ɓay ké haŋsekle sa̧w in Ŋgermbay ya i ƴo mbi niri ɓa nzuk-kuŋ salɓay woiri.

⁵Mi ɓah kaŋ ɓa su̧hru hi̧ wuri. Ké sakra woiri yi̧nri ɓil Ŋgermbayaw ra wa nzuk ru̧na a hani mbew ké mah gɔl ɓay haŋsekle woiri ta-a le wo ?

⁶Ani mí nzuk yi̧n ɓil Ŋgermbay ƴo sek haniri ké pol nzukri ké saŋ Ŋgerzah le ?

⁷Sí ke ɓay ma ndiseŋe ɓa zina hi̧ wuri da. Su mbamba ɓay ik law tul suya ké mbaŋ wo laɓ ziŋ mu ma. Su mbamba ɓay poŋ mbaŋ wo ɓá gɔɓrɔ mu nah fe wo poŋ mu ndɔk zolom ma.

⁸Mí i ƴo laɓ haniri suya, i ƴo gɔɓrɔ haniri le, ɓa yi̧n woiri ɓil Ŋgermbay gaŋ mí i laɓ niri-aw.

⁹Uwa. I tu wuri ya lo ? Nzukri ké Ŋgerzah ɓa záh woyri ya ra ta ya̧ puh lakna ye ya. Í rɔk tul woiri ya. Nzuk-laɓ nunpukiri, nzuk-dim záhri, nzuk-mbi wu̧y mbaŋ woyri, nzuk-laɓ mun woyri ɓa wu̧ynzuk, wo̧ronzuk ké hil mbaŋ ye wo̧ronzuk, nzukri ké ri-riɓa, nzukri ké na ɗaka feri, nzukri ké hi̧ tul hi̧ yim, nzukri ké laɓ nani, nzukri ké gɔɓrɔ mbaŋ woyri, ku ta ya̧ puh lakna Ŋgerzah ya.

¹¹Mí nzuk a haniri ké sakra woiri lewsa̧ na kandɔkaw pi, wara mí fe-uri mbɔhlɔ wuri mba, Ŋgerzah lu suya woiri da, law woiri pu ɓa fe ye da, ke ɓa záh woiri ké riŋ Ŋgermbay Zezu Gaŋ tul feri riw kan tul woiri, ké Tem Ŋgerzah wah ɓa Tem woiri da.

¹²Nzuk a haniri ɓahri, fe laɓnari gbam mi mah laɓu. Gelu munu, mí fe laɓnari gbam ɔh ɓa suki ya. Fe laɓnari gbam, mi mah laɓu, mí a bi ra mi ta poŋ mun bi ɓa mgbal fe laɓna mbew ya.

¹³Ku ɓahri se : « Fe su̧na ɓa a ɓil. Ɓil ba, ɓa gel mbah ke fe su̧na. » Mí a bi mi sɔk wuri ɓahri, Ŋgerzah ɓay ɓeɓ fe-uri seɗe mbɔk dale, mun ta ɓa fe-laɓ nunpuki ya. Le mun ɓa nunu a Gaŋ tul feri riw. Gaŋ tul feri riw ba, ɓa nunu a mun[13].

¹⁴Ŋgerzah ten Gaŋ tul feri riw ké puh záh ke pa̧ymun a foyu, ke tén na ke huhrumun ye pi.

¹⁵I tu wuri ya lo ? Mun woiri mbew mbew gbam mbu̧h ɓa mun Ŋgermbay mbew gaŋ. Mbí mun Ŋgermbay ɓay mbu̧h mbew ke mun wu̧y nunpuki, fe-u ta laɓ ya.

¹⁶I tu wuri ya lo ? Nzuk ké na ke wu̧y nunpuki le, mbu̧h ziŋ ni ɓa nzuk mbew da, kandɔk ké Ŋgerzah ɓah lewsa̧ ɓahri, wu̧y ke wo̧ro seɗe mbɔk, ku ɓa nzuk ké mbew. [14]

¹⁷Mí nzuk ké mbu̧h ziŋ Gaŋ tul feri riw ba, Tem woyri ƴo mbew pi.

¹⁸Í ɗih wuri ɗih ke nunpuki. I ɓahri, gelke nzuk laɓ suya a ɓoruri gbam le, na kala mun ye, nzuk ké laɓ nunpuki le, ke laɓ mun ye suya munu.

¹⁹Uwa, i tu wuri ya lo ? Mbu̧hna mun woiri-aw, ɓa vul kani Tempuki ké-e ƴo ziŋ wuri. Tempuki ké ƴo tem woiri ra ur ké ta̧w Ŋgerzah. Kandɔkaw mí i ɓa mbay tul woiri ke mun ya,

²⁰ɓayu ké mbɔl a ŋgeru ké tul woiri puh da mí ten wuri ɓil mgbal le, í hi̧ riŋ Ŋgerzah mgbe ké mun woiri ma.