Read Karang Mbete 1 Kɔrenteri 8 Bible Online

Mbete 1 Kɔrenteri 8 - Karang bible

Mbete 1 Kɔrenteri 8

¹Mí ɓay su̧ fe su̧na kú-u puh hi̧ záhri ɓoɗ ɓoɗ ra le, nah tu wuri ɓayu tu. Mí law sana[16] hi̧ sa̧w in Ŋgermbay ŋger ma pol pol, fe tuna ba, hu̧h tul ndikpo.

²Gelke nzuk ker ɓahri, ke tu fe tu le, ke tu fe mah fe tuna ya dih.

³Mí nzuk ké sa Ŋgerzah le Ŋgerzah tu ni tu.

⁴Kaŋ le ɓay su̧ fe puhna kú-u hi̧ záhri ra, nah tu wuri tu ɓahri se, záhri ɓa fe ya. Ŋgerzah mbew yaŋ mí ɓa záh a kpakpaŋu[17].

⁵Nzuk tukalari ker ɓahri, záhri ɓoɗ ɓoɗ ɓa ŋgi̧-u ƴo nunmbam ke tusiɓa, ku ƴo ɗi záhri-aw ɓa záh woyri pi, ɓa gaŋ woyri pi.

⁶Mí a wah nzuk-kan law tul Ŋgermbayri le, Bah wah Ŋgerzah mbew yaŋ mí ɓa záh a kpakpaŋu. Sa̧w feri gbam ur ké ta̧w ye, nah ƴo el si ta̧w ye. Gaŋ tul feri riw mbew yaŋ mí ɓa a ye Ŋgermbay Zezu. Ɓay tul ye mí feri riw ƴo. A wah kara nah ƴo ɓay tul ye pi.

⁷Keni-aw kara fe tuna nzuk-kan law tul Ŋgermbayri gbam mah hani ya. Nzuk a hani-uri tih ke sú̧ fe su̧na kú-u puh hi̧ záhri. Ku su̧ fe puhna ra le, kerɓay woyri na sa tul záhri-aw. Mí kerɓay woyri ké ŋgi̧ ya ra, ƴo ruklu law woyri.

⁸Fe su̧na ta ɓah ɓay a hani-u tul wah ké nun Ŋgerzah ya. Nah su̧ ya le, nah zi fe ya. Mí nah su̧ kara nah ziŋ fe a hani-u ya pi.

⁹Í ko tul woiri ger rɔkɔ sú̧ fe puhna-aw ɓá ti̧h ɓa kasaw-ɓe bɔk hi̧ nzuk a ɓoruri ké kerɓay woyri ŋgi̧ ya.

¹⁰Gelke yi̧n wo ɓil Ŋgermbay a hani ko mu a wo nzuk fe tuna-u, mu kaɓ nzak fe su̧na gel fe puhna záhri dale, a ye ké kerɓay ye ŋgi̧ ya ɓáy ra, ke mbí mun ye ɓay su̧ fe puhna hi̧ záhri ra ya le wo ?

¹¹Ɓay fe tuna wo-aw mí ke zi keni, a ye ké kanlaw ye ŋger ya ra Ŋgermbay hu ɓay tul ye.

¹²Kandɔkaw mí i ƴo laɓ nzuk yi̧n ɓil Ŋgermbayri su ya, i el ɓeɓ law woyri ké kerɓay woyri ŋgi̧ ya ra le, i ƴo laɓ Ŋgermbay su ya munu.

¹³Sa̧wu mí hay fe puhna ɓa ndaw ké pol yi̧n bi le, mi ta su̧ hay mba wu̧m rɔkɔ yi̧n bi ɓá lih.