Read Karang Mbete 1 Kɔrenteri 9 Bible Online

Mbete 1 Kɔrenteri 9 - Karang bible

Mbete 1 Kɔrenteri 9

¹Mi ɓa mgbal ké sal ŋga̧h sol bi lo ? Mi ɓa gun nzak pihna Ŋgermbay ya le ? Zezu Gaŋ wah ti̧h nun bi ya le[18] ? I ti̧h wuri ɓa nunu a Gaŋ tul feri riw ɓay pihna bi ya le ?

²Ŋgermbay pih mi ɓa gun nzak pihna ye ké ta̧w nzuk a ɓoruri ya kara ké ta̧w woiri le, ke pih mi ɓa gun nzak pihna ye gaŋ. I ɓa nunu a Ŋgermbay, sɔk ɓahri, i ɓa zezele nzak pihna bi.

³Ɓay nzukri ké ƴo vbi ɓay lakna ɓay bi ra mí-i ƴo ɓah nzak bi hi̧ niri.

⁴A wah ké nah ɓa gun nzak pihna ké ta̧w woiri nah ta ke ful-ziŋ fe su̧na ke mbih nzona ké ta̧w woiri ya le ?

⁵A wah ké nah ɓa iw, nah ta ke ful-ya̧ wu̧y ké kan law tul Ŋgermbay ya le ? Nah ta ke ful-maŋ wu̧y ké nah ya̧ si ziŋ na kandɔk gun nzak pihna a ɓoruri pi ya le ? Kandɔk nzuk yi̧nri ké nah ƴo ke Gaŋ tul feri riw eŋ Sefas ké ƴo ke wu̧y ye pi ya le ?

⁶Nah ta ke ful zíŋ fe ké ta̧w woiri ɓay hɔl mun wah pi ya le ? Mini a wah ke Barnabas seɗe yaŋ mí náh laɓ pihna ke ndɔk dara mí náh ziŋ fe ɓáy le wo ?

⁷Uwa. A ge mí si ŋgermu dan kú-u puh ni le ? A ge mí ma̧ kpuh viyȩh dan hal lehna-u le ? A ge mí kɔr nday dan nzo pamu le ?

⁸Mi ɓah ɓayay kandɔk nzuk pirmatul kaŋto ya. Le bolkusol Ŋgerzah kara ɓah ɓayu pi.

⁹Ke ɓah kandɔk ké Moyiz vbeh ra ɓahri : Mu ta ŋga̧h nzak nday ké ƴo pa-pay ya. [19] Uwa, ɓa nday ke hȩk mí kerɓay Ŋgerzah na sa tulu le ?

¹⁰A wah gaŋ kara nah mba nday mba-mba. Ku vbeh ɓay tul wah ɓahri se, nzuk pay ɓaŋ law ye te tul zíŋ fe pay. Nzuk-vba̧ naŋ ɓaŋ law ye te tul zíŋ kpaŋndɔk ye.

¹¹Kandɔk ké nah ruh mi̧hri Tempuki ké ɓil law woiri ra, nah ɓay hal lehna fe ziŋna ké ta̧w woiri ɓay hɔl mun wah keni pi ya le ?

¹²Ŋgernzuk a ɓoruri gi vbi sona ké ndɔk woiri, mí a wah ba, nah mba niri mba ya le ? Nah mbi ful-su̧ fe ké ta̧w woiri-aw ya. Wara le nah poŋ ful ké nah mah mbi-u gbam ké ta̧w woiri ma fal rɔkɔ náh ɓaŋ kpuh tik mahful ɓaysuki hul Ŋgermbay.

¹³I tu wuri ya lo ? Ké vul kani Ŋgerzah nzuk kaniri ké mgba sa̧w vul kani ra ƴo ziŋ fe su̧na woyri keni. Mí nzuk kaniri ké ƴo puh fe, ku ƴo su̧ fe puhna-u pi, ya le ?

¹⁴Kaŋ pi mí Gaŋ tul feri riw kara ɓahri, nzukri ké ƴo ka-kah ɓaysuki-aw le, kú hɔl mun woyri ké ɓilu[20].

¹⁵Mí a bi ba, ful-su̧ fe ké ta̧w woiri ra mi mbi ya. Mi vbeh ɓayay ɓay goŋ fe ké ta̧w woiri ya pi, ɓay mí lih ɗaka su mba fá̧h fe su̧na ké ta̧w woiri rɔkɔ nzuk ɓá sɔɓ vbá̧ haŋ bi-ay ɓa fe ndikpo.

¹⁶Mí gelke mi ka-kah ɓaysuki hul Ŋgermbay ra le, ndá giri keni ta-a. Ɓa pihna ké na tul bi munu. Mi ka-kah ɓaysuki ya le, koseh ɓa nzuku a bi gaŋ.

¹⁷Kandɔk ké Ŋgerzah poŋ pihna-aw ké ndɔk bi ɓay laɓu, mí mi el laɓ pihna-aw dan mbí ful-su̧ fe keni le, kpaŋndɔk bi ƴo ri. Mí mi mbi ful-su̧ fe keni ɓa fe law rihna bi le, ɔh-u munu, kpaŋndɔk a ɓoru ta-a.

¹⁸Kandɔkaw wa, kpaŋndɔk bi na suŋ ? Mi ka-kah ɓaysuki ndikpo hi̧ nzukri lah, mi mbi ful-su̧ fe ké ta̧w woyri ya, kpaŋndɔk bi munu.

¹⁹Kandɔk ké mi ɓa mgbal ya ra, mi hi̧ tul bi ɓa mgbal nzukri gbam ɓay mí fa̧h ŋgi̧na woyri ɓa nunu a Ŋgermbay.

²⁰Mi ƴo ké ta̧w yi̧n bi ziɓri le, mi el mbi fe laɓna ziɓri ɓay mí fa̧h niri hi̧ Ŋgermbay. Sa̧w fe laɓna ziɓri si ke bolkusol Ŋgerzah ké Moyiz vbeh, mi mbi fe laɓna bolkusolu. Mí a bi ra bolkusol fe vbehna Moyiz lak mbay tul bi ya. Mí-i ƴo mbi fe laɓna woyri ɓay fa̧h niri keni.

²¹Ké ta̧w sa̧wnzuk a ɓoruri kara mi ndɔl fe laɓna woyri pi. Ku ta ke bolkusol Ŋgerzah ké Moyiz vbeh ra ya, mí bolkusol Ŋgerzah ké lak mbay tul bi ɓa bolkusol Ŋgermbay. Mi ndɔl fe laɓna woyri ɓay fa̧h niri hi̧ ni.

²²Ké ta̧w nzukri ké kanlaw woyri ŋger ya, mi ɗiŋ tul bi rah niri ɓay fa̧h niri. Mi laɓ mun bi mah ke ŋgerna nzukri gbam ɓay mí ya̧ nzuk a haniri.

²³Mi laɓ feri-aw gbam ɓay tul ɓaysuki hul Ŋgermbay, ɓay mí ƴo ɓil ɓayu mbew ziŋ ni pi.

²⁴I tu wuri ya lo ? Nzukri ké ƴo kpak ɗukna, gbam woyri ku ƴo ɗu-ɗukna, mí nzuk mbew ti̧h pol ya̧ kpaŋndɔk. Dale í ɗuk wuri ɗukna ɓay í ziŋ kpaŋndɔk.

²⁵Nzukri gbam ké ƴo kpak hani ra ku ruh mun woyri ke ŋgerna ɓay kú ziŋ fe ké ɓay ɔ-ɔh. Mí a wah nah ruh mun ɓay ziŋ fe ké ɓay ƴo kpatara.

²⁶Kandɔkaw mí-i ƴo ɗu-ɗukna le, mi ɗuk va̧h ya. Ké gel-su mbɔre, mi su nzaw gɔɓ gɔɓ ya[21].

²⁷Mi su̧h law ke ŋgerna, mi mgba tul bi ɓa mgbal ke mun bi ɓay hi̧ fal ka-kah ɓaysuki hi̧ nzuk a ɓoruri le, kú ten mi ke ɓil ɓaysuki-u ma fal ya.