Read Karang Mbete 2 Kɔrenteri 10 Bible Online

Mbete 2 Kɔrenteri 10 - Karang bible

Mbete 2 Kɔrenteri 10

¹A bi Pɔl mi ƴo hew wuri ke law ɗeŋ pi ke suk-lah ɓay ké ur ké ta̧w Ŋgermbay pi. A bi kú-u ɓahri, ké nun woiri le mi ɓah ɓay ke kusol a voh-u. Mí-i ta haŋsekle woiri ya le, mi vbeh ɓay ke ŋgere ŋgere mí hi̧ wuri.

²Kɔkrɔya, mi ƴo goŋ wuri, ka̧hna bi ké ta̧w woiri mi sa ɓay í hi̧ mi ɓah ɓay ke ŋgere ziŋ wuri ya. Mi lek law bi ɓay ɓah ɓay ke ŋgere ziŋ nzukri ké ker ɓahri, siŋ sina wah ɓa nunu a haymun.

³Ketina, mun hay wah ɓa nunu a som siɓa gaŋ, mí nah ruh ŋgermu ke ŋgerna haymun ya.

⁴Fe rem-ruh ŋgermu wah ɓa fe a haymun ya. Le ŋgerna fe remu ɓa nunu a Ŋgerzah ɓay dir kuŋɓayri ké gaŋ ndururu.

⁵Kaŋ mí nah ƴo ɓeɓ kerɓay a ra̧h-uri, nah ƴo ɓeɓ hú̧h tulri gbam. Fe-uri leh tul ke fe tuna ké ƴo hi̧ nzuk tu Ŋgerzah. Nah ƴo mgba kɔk kerɓayri gbam mbih ɓa mgbal ɓay hi̧ kerɓayri-aw ɓá hȩk Ŋgermbay.

⁶Nah ƴo tul bɔk ɓay i ŋgerna sam mbá nzak Ŋgermbayri gbam ke sa̧wseh ké suk-lah ɓay woiri ten mun ke gelu gbam.

⁷Í ko ketina ké ƴo pol woiri. Gelke law nzuk tu ɓahri, ke ɓa nunu a Ŋgermbay le, ké el ko kerɓay ye ɓa teh-u ɓahri se, a ye ké-e ɓa nunu a Ŋgermbay ra, a wah kara nah ɓa nunu a Ŋgermbay pi.

⁸Mí gelke mi vba̧ haŋ bi ɓay ŋgerna ké Gaŋ tul feri riw kan tul bi kara su̧hru ta se mi ya. Riŋ ɗina-aw na ɓay hi̧ sa̧w nzuk yeri ɓá hu̧h, ta ɓa ɓay ik tul woiri ma siɓa ya.

⁹Ɓay mbete vbehna biri-aw ɓá tokro tem mun woiri ra le, ta ɓa kerɓay bi ya.

¹⁰Ɓay fe le nzuk a ɓoruri ƴo ɓahri, mbeteri ké a bi Pɔl mi vbeh-aw kpuh mbamba, ŋger mbamba pi, mí-i gi ka̧h sakra woiri ke mun bi le, mi na gɔɓ kaŋ. Ɓay ɓahna bi ké pol nzukri kara rih lahna ya pi. Ku ɓah kaŋ.

¹¹Mí sam nzuk ké ɓah ɓay kandɔkaw, ké tu te-teh ɓahri, gelke nah ka̧h sakra woiri le, ŋgerna fe laɓna wah ɓay ŋger kandɔk ŋgerna mbete vbehna wah ké nah ta-a-aw ra kaŋ pi.

¹²Sam nzuk a haniri ké sɔk mun woyri ke mun ra, a wah nah ta mgba ma̧ra ziŋ niri ya, nah ta mgba ŋgerna wah tuh ke ŋgerna woyri ya. Fe laɓna woyri ɓa nunu a haymun. A woyri-aw ku leh tul woyri ke haniri, ku mgba ŋgerna woyri tuh ke haniri. Kerɓay woyri ta-a.

¹³A wah ra nah ta a̧h ka̧w ya. Le vbá̧ haŋ wah na tul pihna waka ké Ŋgerzah kuŋ hi̧ na, kaŋ mí i ɓa waka-u pi,

¹⁴ɓayu ké nah ka̧h ta̧w woiri ke ɓaysuki hul Ŋgermbay hi̧ i lah ke titilu da̧y. Nah zo tul mahful sekle waka wah ya.

¹⁵Ka̧hna wah ké ta̧w woiri ra, nah mbi pihna nzuk a ɓoru vba̧ haŋ wah keni ya. Nah ɓaŋ law wah te tul suki ɓahri, kanlaw woiri ƴo hu̧h ma pol pol dale, waka kú-u kuŋ hi̧ na ƴo ahna.

¹⁶Le náh si ka-kah ɓaysuki-u ma pol ké puh a ɓoruri, mí pihna waka nzuk a ɓoru ba, nah ta mbi ɓa fe-vba̧ haŋ wah ya.

¹⁷Mí nzuk vba̧ haŋ le, ké vba̧ haŋ ɓay tul Gaŋ tul feri riw ma[15].

¹⁸Nzuk ké sɔk mun ye ke mun ta ɓa nzuk ya wara le, nzuk a a̧y ké Gaŋ tul feri riw sɔk ni mí ɓa nzuk.