Read Karang Mbete 2 Kɔrenteri 12 Bible Online

Mbete 2 Kɔrenteri 12 - Karang bible

Mbete 2 Kɔrenteri 12

¹Vbá̧ haŋ ti̧h nzuk suk ya. Keni-aw kara mi sí keni ma pol. Mi ɓáh ɓay fe saŋ ké ti̧h nun nzuk mbew ɓa sa̧w fe ké Gaŋ tul feri riw ten hi̧ nzuku ko.

²Nzuk ra mi tu ni tu. Ke ƴo ziŋ Ŋgermbay. Lewsa̧ ku to nzuku nzem si ka̧h nunmbam ké ta̧w Ŋgerzah sa̧, mí ke el. Fe-u kal laɓ mbihmbam boh falu niŋ da. Ke mun ye gbam, mi tu ya, ɓa tem ye, mi tu ya. Ŋgerzah le, tu-tu.

³Nzuk a kandɔkaw ra, mi tu ɓahri se, ku to ni si ka̧h gel ƴona Ŋgerzah. Ke ƴo ke mun ye mini ɓa tem ye kara mi tu ya, Ŋgerzah mí tu. Mí ke lah ɓayri ké mah ndazi ya, ɓayuri ra ku hah nzuk pirmatulri ɓah-u.

⁵Ɓay tul nzuk a kandɔkaw mi vbá̧ haŋ, mí ɓay tul bi, mi vba̧ haŋ ya. Mi vba̧ haŋ dale, mi vba̧ haŋ ɓay ŋgerna bi ké ta-a.

⁶Mi yih ra vbá̧ haŋ le, mi ta laɓ mun bi ɓa kɔk nzuk ya ɓayu ké mi ƴo ɓah ketina, mí-i mgba nzak bi ɓay rɔkɔ nzukri ɓá ko mi ɓa nzuk ké kal tul nzuk a ɓoruri, ɓay tul feri kú-u ko mi gel laɓu, ɓay tul sa̧wɓayri kú-u lah mi gel ɓah-u.

⁷Ɓa sa̧wɓay a ŋgeruri ɓoɗ ɓoɗ ké Ŋgermbay ten hi̧ mi ko ɓa fe saŋ. Sa̧wu mí-i mgba nzak bi ɓay rɔkɔ mí nda giri. Ɓay hi̧ mí nda giri ya le, Ŋgerzah poŋ ful hi̧ mbay záh tukala pih gun nzak pihna ye ƴo tuŋ mun bi ke ŋgatukru.

⁸Mi goŋ Gaŋ tul feri riw bɔk say ɓay hi̧ nzukbaa ra ɓá poŋ mi.

⁹Ke yih nzak bi ɓahri : « Lawsuki bi ké mi hi̧ mu ma-mah. Huhrumun bi ƴo mbar ŋgerna ké ta-a. » Ke ɓah kaŋ. Kaŋ dale law rihna bi ƴo ri ɓay mí vba̧ haŋ ɓay ŋgerna bi ké ta-a ɓay poŋ hi̧ huhrumun Ŋgermbay ɓá na ɓa vul ké pɔr mi.

¹⁰Sa̧wu mí-i zay mun bi ɓil ŋgerna bi ké ta-a, ɓil farnari, ɓil fe zɔklɔri ké kal tul, ɓil koseh ké ndɔk nzuk a ɓoruri, ɓil fe-mbaŋ lawri. Ɓilu-aw gbam mi zay mun bi ɓay tul Ŋgermbay ɓayu ké ŋgerna bi ta-a dale, huhrumun ye ƴo ri gaŋ.

¹¹Mi ti̧h ɓa kɔk nzuk ɓay vbá̧ haŋ ra gaŋ kara a woiri mí i sɔkrɔ mi ti̧h kaŋ ɓayu ké i mah ɓay yih tul bi mí i yih tul bi ya. Mi ta ɓa gun toŋnafal nzukri-aw ké ɗi mun woyri ɓa gun nzak pihna a ŋgeruri ra ya, a bi mi ɓa fe ya gaŋ.

¹²Mí feri ké sɔk ɓay gun nzak pihna Ŋgermbay a ketinari ra mi laɓ ké sakra woiri. Fe-uri ra mi laɓ ke su̧hlaw. Fe-uri gi ke fe saŋri ké sɔk munɓay pi ke fe-se hȩkmeri pi.

¹³A fe mí hi̧ wuri i ker ɓahri, ké sakra sa̧w in Ŋgermbay ké gelri gbam, mi mgba wuri ɓa toŋnafal le ? I ker ɓahri, mi mgba wuri ɓa toŋnafal woyri ɓayu ké mi ta ɓa sukna ké tul woiri ya. Law woiri ɓá voh tul fe laɓna suya bi-aw ge.

¹⁴Mi lek mun bi ɓay si ma ta̧w woiri a bɔk sayu mí na-ay. Mi ɓay na ɓa sukna ké tul woiri ya. Mi ƴah fe ziŋna woiri ya, wara le a woiri gaŋ mí-i ƴah wuri. Ɓayu ké ta ɓa gunri mí ƴo mbu̧h fe ziŋna ɓay mgba sa̧w bah woyri ya, wara le ɓa bah gunri mí ƴo mbu̧h fe ziŋna ɓay mgba sa̧w gun woyri.

¹⁵A bi ra, mi ɔ́h ŋgerna bi ɓay tul woiri ke law rihna, mi tá̧h mun bi gbam gbam kara pi. A bi ké mi sa wuri ŋgi̧ kal ŋgɔŋ ra wa, a woiri ba, law sana woiri ké tul bi el po-poh le ?

¹⁶Ɓa ra kaŋ kara mi ɓa sukna ké tul woiri ya. Ku ƴo ɓahri se, mi mgba wuri ke law ru̧na bi.

¹⁷Nzukri ké mi pih si ta̧w woiri ra wa, nzuk a suŋ mí-i pih ni si gɔɓrɔ fe ziŋna woiri le ?

¹⁸Mi goŋ Tiɗ ɓay ké si ta̧w woiri. Mi pih ni ke yi̧n wahri a mbewu ra. Tiɗ ra gɔɓrɔ wuri le wo ? Siŋ sina wah ɓa Tempuki mbew, kaŋ ya le ? Mahful wah mbew yaŋ, ya le ?

¹⁹Lewsa̧ kaŋ i ƴo ker ɓahri, nah ƴo sɔk tehɓay wah ké pol woiri. Kaŋ ya, nah ƴo ɓah ɓay ké pol Ŋgerzah ke riŋ Ŋgermbay. Gun sanari, ké ɓil siŋ sina wah-aw gbam, nah laɓ kaŋ ɓay hi̧ í hu̧h ɓil kanlaw woiri keni.

²⁰Ɓayu ké hȩkme ƴo laɓ mi ɓahri se, ko ya le ka̧hna bi ké ta̧w woiri, mi ta ziŋ wuri kandɔk ké law bi ker ya. A woiri ba, i ta ziŋ mi kandɔk ké i ker ya pi. Mi sa ziŋ ɓala, sere, law sena, ík tul hani ɓay ƴah riŋ ɗina, mbí riŋ hani, ŋgu̧hru ɓay, hú̧h tul, ɓéɓ maŋna, sam fe-awri gbam mi sa ziŋ ké sakra woiri ya.

²¹Hȩkme laɓ mi ɓahri, ko ya le ka̧hna bi ra Ŋgerzah bi ɓay hi̧ mi su̧hru ɓay tul woiri, mí rew ɓay mbaŋ law bi ɓay tul daɓari ké laɓ suya lewsa̧, mí ku mbi law ké tul fe laɓna a pipiri-u ya, ké tul láɓ nunpuki ya, ké tul suya woyri kú-u laɓ wɔrɔk ya, mí ku ƴo tul laɓ fe-uri ɓáy.