Read Karang Mbete 2 Kɔrenteri 13 Bible Online

Mbete 2 Kɔrenteri 13 - Karang bible

Mbete 2 Kɔrenteri 13

¹Bɔk a sayu wara mí-i ƴo sina ma ta̧w woiri-ay, mí salɓayri gbam ɓay kuŋu ke nzak nzukri seɗe ya le, say ké ɓa nzuk-lu lakna ɓay[18].

²Gahru bi ké sakra woiri a bɔk seɗe-u, mi bak wuri ke ɓayu pol da, mi el ƴo bak wuri ke ɓay ra dara mí ka̧h ɓáy. Nzukri ké toŋ laɓ suya lewsa̧ ka̧h aŋay dara mí tɔr nzuk a ɓoruri gbam, mi ƴo ɓah hi̧ niri ɓahri, mi ka̧h le, nzuk mbew ta ya̧m mun ye ya.

³I ƴo ƴah ɓay tu ke mun woiri ɓahri, Ŋgermbay ƴo ɓah ɓay ké mun bi gaŋ le ? A ye ra ke hi̧ i tu ni ɓa nzuk-ta̧h mun ya. Wara le ke ten huhrumun ye ké sakra woiri,

⁴ɓayu ké-e hu ké tul kpuh vbatay ɓa nzuk pirmatul a a̧y ké ta ke ŋgerna ya kara sa̧w káɓ ke nun ye ɓa huhrumun Ŋgerzah, ɓayu ké a wah ké nah ƴo mbew ziŋ ni ŋgerna wah ta-a kara nah ɓay el kaɓ ke nun ziŋ ni pi. Sa̧w kaɓna-u ɓa huhrumun Ŋgerzah. Ke huhrumun ra mí nah ko tul woiri keni.

⁵Í leh law woiri ke mun, í hekre, ɓay í tu kanlaw woiri ke mun woiri. Uwa. I tu ya lo ? Ŋgermbay Zezu ƴo ziŋ wuri wa, ani mí i tu le ? Í leh, í hekre. Ko ya le, ɓay ta ti̧h ɓa teh-u ya.

⁶Ɓay kanlaw wah tul Ŋgermbay le, mi ker ɓahri, i tú ke mun woiri ɓahri, ɓay wah ti̧h ɓa teh-u da.

⁷Nah ƴo goŋ Ŋgerzah ɓay í laɓ suya mbew ya. Nah goŋ ni ɓay ké sɔk ketina wah hi̧ wuri ya, wara le ɓay í laɓ suki. Mí i ko na eŋ nzukri ké ketina woyri ti̧h gel a teh-u ya kara nah ƴo goŋ ni ɓay í laɓ suki,

⁸ɓayu ké ŋgerna wah mah laɓ fe a hani ɓoɗ ke ketina Ŋgerzah ya. Wara le ɓay ketina mí nah ƴo ke ŋgerna-u,

⁹kaŋ mí zaymun wah ƴo ri. Gelke ŋgerna wah ta-a mí a woiri i el ziŋ ŋgerna ɓayu le, nah ƴo zay mun ɓilu. Goŋna wah-ay ɓay í ŋge-ŋger.

¹⁰Sa̧wu mí-i ta-a kara mi vbeh ɓayawri hi̧ wuri rɔkɔ mí ka̧h le, mí ndar wuri ke ŋgere. Gaŋ tul feri riw hi̧ mi huhrumun ɓay hi̧ í hu̧h, ta ɓa ɓay ik tul woiri ma siɓa ya.

¹¹Yi̧n biri, ɓay bi ɔh da. Í zay mun woiri, í ruh mun woiri ɓay í ɔh ɓa suki, í hew haniri, í lek ɓay mbew, í kaɓ ke ɗeŋ, mí Ŋgerzah nzuk law sana a ye ké-e hi̧ ɗeŋ, ke ɓay ƴo ziŋ wuri.

¹²Í vah haniri ke law in a teh-u. Sa̧w nzuk Ŋgerzahri gbam vah wuri.

¹³Lawsuki Gaŋ tul feri riw, a ye Ŋgermbay Zezu, law sana Ŋgerzah, law mbew a Tempuki ké mbu̧h wuri ɓa nzuk mbew, gbam ƴo ziŋ wuri gbam.