Read Karang Mbete 2 Kɔrenteri 3 Bible Online

Mbete 2 Kɔrenteri 3 - Karang bible

Mbete 2 Kɔrenteri 3

¹A a̧w wa, nah el ƴo sɔk mun wah hi̧ wuri ɓa nzuk a foyuri ɓáy le wo ? Mah ɓay náh gi ke mbete-sɔk mun wah kandɔk nzuk a ɓoruri ké gi ke mbete ƴo sɔk mun woyri hi̧ wuri le ? Mini náh vbi wuri mbete-sɔk mun kandɔk nzuk a ɓoruri ké vbi wuri mbete ra le wo ?

²A woiri gaŋ mí i ɓa mbete ké vbeh kan law wah. Nzukri gbam tu-tu, nzukri gbam ki̧-ki̧.

³Ɓay woiri te-teh, i ɓa mbete vbehna Ŋgermbay gaŋ, i ɓa pihna laɓna wah. Mbete-u vbeh ke bik ya. Le mbete-u vbeh ke Tem Ŋgerzah a ye Ŋgɔhnzuk. Fe vbehna-u vbeh kan tul kasaw a felu ya[1]. Le fe vbehna-u vbeh kan law nzuk pirmatulri.

⁴Kandɔkaw mí law wah te tulu ké pol Ŋgerzah ɓay Ŋgermbay.

⁵Ɓay fe le ta ɓa a wah ke mun wah mí nah ɓa fe ya. Ɓa Ŋgerzah mí hi̧ na, nah ma-mah.

⁶A ye mí ke hi̧ na ɓa fe ké mah na ɓa gun-laɓ pihna sal in a foyu ké-e ŋga̧h ziŋ nzukri ɓa záh woyri. Ta ɓa sal in ké-e ŋga̧h ke fe vbehna bolkusol ké kan tul kasaw a felu ya. Le ke ŋga̧h ke Tem, ɓayu ké fe vbehna bolkusol ra laɓ ɓay hul kan tul nzukri, mí Tem ba, ƴo hi̧ ɔkna[2].

⁷Lewsa̧ fe vbehna bolkusol ké kan tul kasaw a felu laɓ ɓay hul kan tul nzukri kara fe riŋ ɗina bolkusolu ƴo ri. Riŋ ɗina bolkusol Ŋgerzah ké Moyiz ziŋ ra mí gun Izarayelri mah ko kona ma nun Moyiz ya ɓay tul ndu̧yna fe riŋ ɗina bolkusolu. Fe riŋ ɗina bolkusol ra ɔ-ɔh[3].

⁸Riŋ ɗina a ɓoru ké ɓa riŋ ɗina pihna Tem mí ƴo hi̧ ɔkna ra wa, ani mí pihna Tem ɓay mba tul fe riŋ ɗina mbete vbehna bolkusol ya le ?

⁹Gelke pihna fe vbehna bolkusol ké hi̧ salɓay hul mgba tul nzukri ra ƴo ke fe riŋ ɗina ba, ani wara mí riŋ ɗina pihna Tem ké ŋga̧h sal in Ŋgerzah ziŋ nzukri ɓa záh woyri ɓay mba tul fe riŋ ɗina-u, ya le wo ?

¹⁰Kandɔkaw mí fe riŋ ɗina fe vbehna ké ndu̧-ndu̧y ra zi ké pol riŋ ɗina Tem ké kal tul fe riŋ ɗina-u ka-kal.

¹¹Fe vbehna bolkusol ɔh laɓ pihna ɓil riŋ ɗina ra ba, ani wara mí Tem ké ƴo ri, riŋ ɗina ye ɓay kaɓ ɓa ŋgɔh, ya le wo ?

¹²Kaŋ dale sam suki ké law wah te sa tulu mí nah ƴo ɓah ɓayu ɓa teh-u dan su̧hru.

¹³Mí nah ƴo laɓ kandɔk Moyiz ya. Ke pɔr nun ye ke gar ké pol gun Izarayelri hi̧ ku ko mahsa̧w fe riŋ ɗina bolkusolu ya.

¹⁴Ka̧h guri kara law woyri na nduŋ. Ku ki̧ mbete bolkusol ké Ŋgerzah ŋga̧h sal in a pol kara garu pɔr law woyri kɔɓ ɓáy. Nzuk ƴo mbew ke Ŋgermbay dara mí garu lu ɓáy.

¹⁵Ka̧h guri gaŋ kara, gelku-u ki̧ mbete vbehna Moyiz le, gar ra ƴo pɔr law woyri.

¹⁶Ku sɔɓ nun woyri ma ta̧w Gaŋ tul feri riw le, gar-pɔr law ra lu.

¹⁷Gaŋ tul feri riw ɓa Tempuki. Mí gel a a̧y ké Tem Gaŋ tul feri riw ƴo ri le, sél law ƴo ri pi.

¹⁸A wah gbam ké gar-pɔr law lu da, nah ƴo ko riŋ ɗina Gaŋ tul feri riw ké nun haniri kandɔk ké nah ko nun wah ɓil fe-ko tem. Nah ƴo sɔɓ eŋ ni ke riŋ ɗina ké-e ƴo hi̧ na kpu̧ru si ka̧h riŋ ɗina Gaŋ tul feri riw, a ye Tempuki.