Read Karang Mbete 2 Kɔrenteri 4 Bible Online

Mbete 2 Kɔrenteri 4 - Karang bible

Mbete 2 Kɔrenteri 4

¹Sa̧wu mí pihna ké Ŋgerzah ndoh ndɔk wah ra nah ta̧h tulu ya. Pihna sal in a foyu ra si ke law in ké-e laɓ ziŋ na.

²Wara le nah ƴo to ɓay a mu̧h-uri ɓa ɗih-u mak ké ta̧w wah, fe laɓna-uri ɓa fe-se su̧hru. Nah mbi siŋ sina ru̧na a tukala ya, nah ra̧h ɓay Ŋgerzah ya. Wara le ketina mí nah ten ma gel a teh-u. Ké nun Ŋgerzah nah ƴo sɔk mun wah ké nun nzuk pirmatulri gbam hi̧ law woyri tu ɓayu.

³Mí gelke ɓaysuki hul Ŋgermbay ké nah ka-kah-u ra mu̧-mu̧h le, mu̧-mu̧h ké ta̧w nzukri ké ƴo zina. Gar pɔr nun woyri.

⁴Záh tukala ra̧h kerɓay nzukri ké deh nzak pihna Ŋgerzah rɔkɔ ku ko ndu̧yna ɓaysuki. Ɓaysuki ra ɓa riŋ ɗina Ŋgermbay a ye ké-e ba Ŋgerzah ɓa fe tem mun ye.

⁵Nah ka-kah ɓay riŋ wah ya. Wara le nah ka-kah ɓay riŋ ɗina Ŋgermbay Zezu Gaŋ tul feri riw. Mí nah ɓa mgbal woiri ɓay ye Zezu.

⁶Ɓay fe le a ye Ŋgerzah ke ɓahri se, gel tehna ɓá teh ké ɓil tirim[4]. Ŋgerzah mí hi̧ gel teh ké ɓil law wah hi̧ nah tu gel tehna ye ké ndu̧y ké nun Ŋgermbay tu-tu.

⁷Mun wah mah hani ke iri mí mbah ke fe ziŋna-aw ɓay hi̧ huhrumun ké ŋgi̧ kal ŋgoŋaw, sa̧wu ɓa Ŋgerzah, ta ɓa fe ké ur ké ta̧w wah ya.

⁸Nzukri ƴo o̧kro na, mí ku vbar na ya. Kerɓay wah zi mí law wah to ya.

⁹Ku faŋ bol wah si laɓ na koseh, mí nah ƴo ke hȩk wah ya. Ku ndih na ɓu siɓa, mí nah ziŋ ɓeɓna ya.

¹⁰Nah ƴo ya̧ hul Zezu ké mun wah kpatara ɓay hi̧ ɔkna ye kara ɓá ten mun ké mun wah pi.

¹¹A wah ké nah ɓa nzukri ké ƴo ke ɔkna, ku ɓaŋ na ndoh ndɔk hul kpatara ɓay tul Zezu ɓay hi̧ ɔkna ye ɓá ten mun ké pa̧ymun wah a puŋu-ay.

¹²Kaŋ mí hul ké ƴo laɓ mun wah a puŋu ko seh ra ɓa ɔkna ké ta̧w woiri.

¹³Mí nah ƴo ke Tem mbew ké ƴo fal kanlaw tul Ŋgermbay kandɔk kú-u vbeh lewsa̧ ɓahri, mi ya̧ ɓayu kan law bi da, sa̧wu mí-i ƴo ɓah-ay[5]. A wah kara nah ya̧ ɓayu kan law wah da. Sa̧wu mí nah ƴo ɓah-ay.

¹⁴Nah tu ɓahri se, a ye Ŋgerzah ké-e ten Gaŋ tul feri riw a ye Zezu ke pa̧ymun a foyu ra, ke tén na ziŋ Zezu ke pa̧ymun a foyu pi, ke hí̧ na wuri, nah gi ƴo ndiseŋe ziŋ ni.

¹⁵Ɓayu ké kosehri gbam ké ziŋ na ra, ziŋ na ɓay tul woiri mí hi̧ daɓa nzukri el ke tumbɔl ɓay lawsuki Ŋgerzah. Tumbɔl ra mgbe goɗi goɗi ké nzak nzukri mí seh ma pol pol hi̧ riŋ ye mgbe keni.

¹⁶Sa̧wu mí nah ta̧h ya. Mun hay wah ɓe-ɓeɓ kara tem wah na ɓa a foyu nam ke nam.

¹⁷Ɓayu ké koseh ké nah ƴo ɓilu-ay ra yih ya tafalaw ta mgba tuh ke baw riŋ ɗina ké na ɓa ŋgɔh ya. Koseh-awri mí ƴo laɓ hi̧ na nah hu̧h ɓil riŋ ɗina ké ŋgi̧-ŋgi̧ ra mí ƴo laɓ hi̧ fe ké nun nzukri ko-ko ra nah ɓaŋ nun kan tulu ya. Le fe ké nun nzukri ko ya mí nah ɓaŋ nun kan tulu. Fe ké nun nzukri ko-ko ra ƴo ɓay sa̧wseh ndi̧ kaŋto, mí fe ké nun nzuk ko ya ba, ƴo ɓa ŋgɔh.