Read Karang Mbete 2 Kɔrenteri 6 Bible Online

Mbete 2 Kɔrenteri 6 - Karang bible

Mbete 2 Kɔrenteri 6

¹Kandɔk ké nah ɓa bɔh pihnari ra, nah ƴo hew wuri, í mgba lawsuki Ŋgerzah ké i ya̧ ra ɓa fe ndikpo ya.

²Ɓayu ké lewsa̧ Ŋgerzah ɓahri, ké ɓil sew law rihna bi, mi láh mu ké mu ɗi mi, ké ɓil nam-ya̧ nzukri-aw mi tén mu ke ɓil hul[6]. Mú ko, aŋay nah ƴo ɓil sew law rihna ra. Mú ko, guri nah ƴo ɓil nam-ya̧ nzukri ra.

³Nah sa laɓ suya mbew hi̧ law nzukri ɓá ɓeɓ ya rɔkɔ pihna-mgba nzak nzaw ɓá ziŋ zɔmna.

⁴Wara le nah sɔk mun wah ɓa gun-laɓ pihna hi̧ Ŋgerzah ɓil sam feri ɓoɗ ɓoɗ gbam, ɓil su̧hlawri, ɓil kosehri, ɓil fe zɔklɔri ké kal tul, ɓil fe-mbaŋ lawri,

⁵ɓil vba̧nari, ɓil vul mgbalri, ɓil urna ké nzukri ur ku̧ tul wah, ɓil ta̧hma pihnari, ɓil káɓ ke nun suŋri ɓa ŋgi̧-u, ɓil káɓ ɓa ɗaka,

⁶ɓil lawpuki, ɓil fe tuna, ɓil iklaw, ɓil láɓ lawsuki, ɓil ƴona wah ke Tempuki, ɓil law sana ké mu̧h ɓay ya,

⁷ɓil ɓay a ketina, ɓil huhrumun Ŋgerzah. Nah sɔk mun wah ɓa gun-laɓ pihna hi̧ Ŋgerzah. Nah ƴo ke fe remri ké ndɔk lakna wah ke ndɔk kperu wah pi. Fe remuri ɓa sal in Ŋgerzah.

⁸Nah ƴo ke riŋ ɗina ke riŋ-se su̧hru, nah ƴo ke riŋ farna ke riŋ pirna. Nzukri ko na ɓa nzuk nzak rɔkna, mí nah ƴo ɓah ketina.

⁹Ku ko na ɓa nzukri kú-u tu niri ya, mí ku tu na te-teh. Ku ko na ɓa hulri, mí í ko, nah ƴo ke ɔkna. Ku ko na ɓa gun-ya̧ vba̧nari, mí nah hu ya.

¹⁰Ku ko na ɓa nzuk law senari, mí nah ƴo ke law rihna kpatara. Ku ko na ɓa ko̧hkori, mí daɓa nzukri ƴo ziŋ suki ké ta̧w wah. Ku ko na ndɔk ndikpo, mí feri gbam ɓa fe wah.

¹¹A woiri Kɔrenteri, nah ɓah ɓay ɓa teh-u hi̧ wuri. Law wah kara mgbur ŋgah ɓay tul woiri pi.

¹²Nah mu̧h wuri law sana wah ya. A woiri gaŋ mí i mu̧h na law sana woiri.

¹³Mi ƴo ɓah ɓay hi̧ wuri kandɔk gun biri. Í mgbur law woiri ɓa ah-u hi̧ na kandɔk a wah ké nah mgbur law sana wah hi̧ wuri kaŋ.

¹⁴Nzukri ké saŋ Ŋgermbay, í mgba ma̧ra ziŋ niri ya. A fe mí ɓay mbu̧h nzukri ké ƴo mbew ke Ŋgerzah ɓa záh woyri ke nzukri ké poŋ Ŋgerzah le ? A fe mí ɓay mbu̧h gel tehna ke tirima le ?

¹⁵Láh hani fe mí ɓay ƴo ké sakra Ŋgermbay ke nzukbaa ye le ? A fe mí ɓa fe-mbu̧h nzuk ké ƴo ke Ŋgermbay ke nzuk ké saŋ Ŋgermbay le ?

¹⁶A fe mí ɓay mbu̧h gel kani Ŋgerzah ke gel kani záhri le ? A wah nah mbu̧h ɓa gel kani Ŋgerzah ké ɓa Ŋgɔhnzuk kandɔk ké-e ɓah lewsa̧ ɓahri : « Mi ɗéh puh ké law woyri, mi há̧rma ziŋ niri. Mi ná ɓa záh woyri, a woyri ba, ku ná ɓa sa̧w bi[7]. »

¹⁷Kaŋ le í ti̧h ké sakra woyri, í kehr siŋ sina woiri ɓoɗ. Gaŋ tul feri riw wahɓay ɓahri se : Fe ké mah nun bi ya le, í za ya. A bi gaŋ mí-i yá̧ wuri ndɔk seɗe[8].

¹⁸Mi ná ɓa bah woiri. A woiri ba, i ná ɓa gun biri[9]. Gaŋ tul feri riw Nzuk huhrumun a luki ɓah kaŋ.