Read Karang Mbete 2 Kɔrenteri 7 Bible Online

Mbete 2 Kɔrenteri 7 - Karang bible

Mbete 2 Kɔrenteri 7

¹Kandɔk ké Ŋgerzah hi̧ na a wah gun sanari fe wahɓayri ra, náh lu fe-sih mun ke fe-sih tem ma fal hi̧ law wah ɓá pu ɓa nunu a Ŋgerzah ɗeɗ ke hȩ́k ni.

²Í ya̧ na ma law woiri. Nah laɓ suya ziŋ nzuk mbew ya, nah ɓeɓ nzuk mbew ya, nah gɔɓrɔ fe nzuk mbew ya pi.

³Mi ɓah kaŋaw ɓay laɓ ɓay kan tul woiri ya. Ɓayu ké mi ɓah pol sa̧ ɓahri se, kerɓay tul woiri na law wah. Nah ƴo mbu̧h wuri hani mbew ɓil hul pi, ɓil ɔkna pi.

⁴Law bi teh ké tul woiri mbamba. Mi vba̧ haŋ bi ɓa ŋgi̧-u ɓay tul woiri. Law bi voh lɔm. Law rihna mbah ɓil law bi mí el zɔk gbɔh gbɔh ɓil kosehri gbam ké ziŋ na.

⁵Ɓayu ké ka̧hna wah ké Maseduwan ra, nah ziŋ ful ɓay ɔk mun wah ndi̧ ya. Fe zɔklɔri ɗoŋ na gbuk, ké fál haymun ɓa ŋgermu, ké fál ɓil law ba, ɓa hȩkme[10].

⁶Mí Ŋgerzah a ye nzuk ké ƴo hew ko̧hkori ra, ke voh law wah ke gina Tiɗ.

⁷Mí ta ɓa ɓay gina ye kaŋto ya. Wara le kerɓay ké ziŋ ni ɓay tul woiri ra voh da. Mí ke el ndazi ɓay tasa̧y laɓ suki woiri, vúh mun woiri, rí̧h si̧w woiri ɓay tul bi bale, law rihna bi el ŋgi̧ kal ŋgɔŋ.

⁸Ɓay fe le mi tu-tu, mbete ké mi vbeh hi̧ wuri ra hi̧ law woiri sa̧h ke kerɓay, mí keni-aw kara law bi poŋ hewna mbete bi ra ya. Law bi zɔklɔ mi le, zɔklɔ mi ké mi hi̧ law woiri sa̧h wuri nam ndi̧-aw.

⁹Aŋay mi zay mun bi. Mi zay mun ɓay law woiri ké sa̧h ra ya. Wara le law sa̧hna woiri-aw ra hi̧ i mbi law woiri ké tul fe laɓna suya woiri ma fal. Sa̧wu mí-i zay mun ɓay mbilaw tul suya woiri-aw. Law sa̧hna woiri ra si kandɔk ké Ŋgerzah yih ɓay rɔkɔ hewna wah ɓá ti̧h ɓa vba̧na.

¹⁰Ɓayu ké law sa̧hna ké si kandɔk ké Ŋgerzah yih ra, hi̧ nzuk ti̧h ke ndɔk hul dan ker ɓay tulu. Mí law sa̧hna a tukala ba, hi̧ nzuk ziŋ hul.

¹¹Í ko, law sa̧hna-u ké si kandɔk ké Ŋgerzah yih ra hi̧ law woiri ŋgerna-ƴo tul láɓ suki, ŋgerna-te-teh ɓayri, ŋgerna-ko suya ɓa fe ȩm, ŋgerna-ndar suya. Law sa̧hna-u hi̧ law woiri hȩkna, tása̧y, rí̧h si̧w. Mí ɓilu-aw gbam i sɔk mun woiri ɓahri, ɓay woiri te-teh.

¹²Mí mbete ké mi vbeh hi̧ wuri ra mi vbeh ɓay tul nzuk ké laɓ suya ra ya, mi vbeh ɓay tul nzukri ké nzuku laɓ niri suya ra ya pi. Le mi vbeh mbete ra ɓay hi̧ suki ké i tasa̧y laɓu ɓay tul wah ɓá ten mun ɓa teh-u. Mí aŋay i tu suki ra ke mun woiri ké pol Ŋgerzah.

¹³Sa̧wu mí kerɓay wah voh. Dara mí law wah rih keɗ keɗ ɓay law rihna ké ziŋ Tiɗ ɓay fe le, law ye voh lɔm ɓay tul woiri gbam.

¹⁴Ɓay fe le vbá̧ haŋ bi ké pol Tiɗ ɓay tul woiri ra su̧hru se mi ya. Le vbá̧ haŋ bi si ke ketina woiri ké nah ɓah hi̧ ni, mí ke tu ke mun ye ɓahri, ɓay wah ƴo gelu gaŋ.

¹⁵Mí gelke law ye el ker ɓay si tul suk-lah ɓay woiri gbam le, law sana ye ɓay tul woiri ŋgi̧ kal ŋgɔŋ. Ke ƴo ko ani mí hȩkna ke law tona ké pol Ŋgerzah hi̧ i mgba ni ɓa suki.

¹⁶Mi zay mun bi ɓay fe le, á̧h ka̧w bi ɓay tul woiri ɓil feri gbam si ke gelu gaŋ.