Read Karang Mbete 2 Kɔrenteri 8 Bible Online

Mbete 2 Kɔrenteri 8 - Karang bible

Mbete 2 Kɔrenteri 8

¹Yi̧n biri, nah yih ɓay í tu lawsuki ké Ŋgerzah hi̧ sa̧w in Ŋgermbay kú-u mbu̧h hani ké gelri ɓoɗ ɓoɗ ké tusiɓa Maseduwan.

²Ɓay fe le koseh a luki ké ziŋ niri ra ɓa fe-leh law woyri, mí law rihna woyri mbah zɔk gbɔh gbɔh. Ké ɓil ko̧hko woyri kara law rihna woyri ŋgi̧ kal ko̧hko woyri ka-kal, mí fe ké mah hɔl mun woyri, ku hi̧ ke law mbew mí ŋgi̧ kal ŋgɔŋ.

³Mi ƴo te-teh ɓay nzuk Maseduwanri hi̧ wuri. Ku hi̧ fe kú-u yih mah gel ŋgerna woyri, mí ku hi̧ kal gel ŋgerna woyri ka-kal pi.

⁴Ku goŋ na ke kɔkrɔya ɓay kú mbu̧h ndɔk ziŋ na ɓil pihna-laɓ lawsuki hi̧ sa̧w nzuk Ŋgerzahri ké Zurusalem.

⁵Wara le fe ké Maseduwanri laɓ kal fe ké nah ker ka-kal pi. Ku hi̧ tul woyri hi̧ Gaŋ tul feri riw pol dara mí ku el hi̧ tul woyri hi̧ na kandɔk ké Ŋgerzah yih.

⁶Kaŋ mí nah hew Tiɗ, pihna-suk fe lawsuki ké-e titilu ra, ké ɔh keni ké ta̧w woiri pi.

⁷A woiri ba, law woiri ŋgi̧ ɓil goso feri gbam kandɔk kanlaw, ɓay ɓahna, fe tuna, tasa̧y laɓ suki, law sana ké i ziŋ ké ta̧w wah ra, ɓay í laɓ lawsuki-u si wɔrɔk ma pol pol.

⁸Mi ɓah ɓayu ɓay mgba wuri ke ŋgerna ya. Wara le fe laɓna lawsuki ké nzuk a ɓoruri laɓ ke law mbewaw mí-i ki̧ ɓayu hi̧ wuri i lah, ɓay mí ko law sana woiri ɓa law sana a ketina gaŋ le.

⁹Ɓayu ké i tu lawsuki Gaŋ wah Ŋgermbay Zezu tu-tu. Ke ɓa nzuk a luki, mí ke hi̧ tul ye ti̧h ɓa ko̧hko ɓay tul woiri hi̧ i ti̧h ɓa nzuk a luki ɓay ɗíŋ tul ye[11].

¹⁰Mi ten kerɓay bi ké tul ɓayaw ɓayu ké kerɓay bi ƴo ti̧h wuri suk. A woiri ra i ɓa nzukri ké láɓ lawsuki-aw titilu ke tul woiri ke sew hani da. Ta ɓa laɓu kaŋto ya wara le, ɓa law woiri gaŋ mí yih laɓu.

¹¹Kaŋ le í ɔh laɓ lawsuki ra kandɔk ké law yihna woiri tasa̧y laɓu, í laɓ ɔh ge, mí laɓu ɓá mah ke ŋgerna woiri,

¹²ɓayu ké ɗaka-laɓ lawsuki ra na law woiri dale, ŋgerna ké na ɓil ndɔk nzuku mí Ŋgerzah ya̧ ɓa suki. Ŋgerna ké nzuk ta keni ya kara Ŋgerzah ko pi.

¹³Fe laɓna lawsuki woiri ra sa̧wu ɓá na ɓa láɓ mun woiri koseh ɓay hi̧ nzuk a ɓoruri ɓá kaɓ kaŋ ya. Wara le sa̧wu ɓa láɓ lawsuki ziŋ hani.

¹⁴Aŋay i ƴo ke fe hɔtɔk hɔtɔk, i mah so nzuk a ɓoruri ké koseh ziŋ niri. Sew ké a woyri ku kaɓ ɓil bela mí koseh ziŋ wuri le, ku só wuri kaŋ pi.

¹⁵Kaŋaw mí a ge ge le ɓá ziŋ fe mah ni kandɔk kú-u vbeh lewsa̧ ɓil mbete Ŋgerzah si tul fe su̧na ké riŋu ɓa man ɓahri, nzuk ké fa̧h man ɓa ŋgi̧-u le, ke ƴo keni mbamba ya, mí nzuk ké fa̧h ndi̧ kara fe su̧na poh ni ya pi[12].

¹⁶Tumbɔl hi̧ Ŋgerzah nzuk sa̧w lawsuki ké-e hi̧ kerɓay Tiɗ na hoy ké tul woiri kandɔk a wah ké kerɓay wah na hoy ké tul woiri kaŋ pi

¹⁷ɓay fe le, nzak hewna ké nah hi̧ ni ɓay ké si ta̧w woiri ra, ke ya̧-ya̧, mí ke takra ur si ta̧w woiri ke law rihna.

¹⁸Nah pih yi̧n wah ɓil Ŋgermbayay si ziŋ ni pi, a ye ra sa̧w in Ŋgermbay ké ku mbu̧h ké gelri ɓoɗ ɓoɗ pir riŋ ye ɓay tul ɓaysuki hul Ŋgermbay.

¹⁹Mí nah pih ni ɓay pirna ké sa̧w in Ŋgermbay pir ni kaŋto ya. Le a woyri ku lu ni ɓay ké na ɓa bɔh gahru wah ɓay suk fe hi̧na in kú-u hi̧ ke lawsuki ra pi. Suki-aw kú-u ɓaŋ ku̧ ndɔk wah ra na ɓay so nzukri-aw ɓay riŋ ɗina Gaŋ tul feri riw, mí ƴo hi̧ kerɓay-so nzukri-aw ké na law wahri laɓ pi.

²⁰Baw fe ziŋna-aw ra nah mbi mahful a ndaru keni, mí nah laɓ fe ké gel a teh-u rɔkɔ nzuk mbew ɓá zɔm na tul pihna-so nzukri ra,

²¹ɓayu mí kpatara nah lek mun ɓay laɓ suki ké nun Gaŋ tul feri riw dara mí ké nun nzuk pirmatulri pi.

²²Nah pih yi̧n wah ɓil Ŋgermbay a ɓoru ziŋ Tiɗri. A ye ra nah leh law ye bɔk ŋgi̧-ŋgi̧, mí nah ko law ye tasa̧y laɓ sukiri ɓoɗ ɓoɗ. Aŋay kara law ye te tul woiri mí tasa̧y ye-aw ŋgi̧ ma pol pol keni.

²³Tiɗ le, ɓa bɔh sina bi. A bi ke Tiɗ, nah ɓa bɔh pihna ɓay tul woiri. Yi̧n wahri ɓil Ŋgermbay ba, ku ɓa gun nzak pihna sa̧w in Ŋgermbay kú-u mbu̧h ké gelri ɓoɗ ɓoɗ, ku ɓa riŋ ɗina Ŋgermbay.

²⁴Kaŋ le law sana woiri ké nun sa̧w in Ŋgermbay kú-u mbu̧h ké gelri ɓoɗ ɓoɗ ten mun ɓa teh-u. Vbá̧ haŋ wah ké nah vba̧ ɓay tul woiri ké pol Tiɗri te-teh ké nun woyri pi.