Read Karang Mbete 2 Kɔrenteri 9 Bible Online

Mbete 2 Kɔrenteri 9 - Karang bible

Mbete 2 Kɔrenteri 9

¹Ɓay mí vbeh ɓay pihna-so sa̧w nzuk Ŋgerzahri ké Zude hi̧ wuri le ɓa ŋgi̧ ɓay ké ta̧w bi,

²ɓayu ké mi tu kerɓay-so nzukri ké na law woiri tu-tu, mí-i ƴo vba̧ haŋ ɓay tul woiri ké ta̧w nzuk tusiɓa Maseduwanri ɓahri, nzuk tusiɓa Akayri lek mun woyri ke sew hani sa̧ ɓay so sa̧w nzuk Ŋgerzahri. Mí rí̧h si̧w woiri-aw laŋ law daɓa nzukri.

³Sa̧wu mí-i pih yi̧n ɓil Ŋgermbayri-aw ma ta̧w woiri ɓay sona nzuku a woiri ra rɔkɔ vbá̧ haŋ wah ké tul woiri ɓá kal ɓa kuna. Le í ƴo tul bɔk woiri kandɔk ké mi ɓah-aw.

⁴Ko ya mí nzuk Maseduwanri ɓaŋ mi ka̧h ta̧w woiri, mí ku ziŋ wuri i lek mun ya ba wa, ɓay na ɓa su̧hru ké nun wah ya le ? Mí ani ke su̧hru nzuku a woiri ɓáy le ?

⁵Kaŋ le mi ko su-su, ɓayu mí-i hew yi̧n wah ɓil Ŋgermbayri-aw ɓahri, kú si ta̧w woiri. Ku ka̧h pol le, kú lek ɓay fe hi̧na in ké i wahɓayu ra. Fe hi̧na-aw ɓá na ɓa mgbɔkɔ, ta ɓa fe ké nzuk nah ke ŋgere ya.

⁶Kandɔkaw mí nzuk ké ruh fe ndi̧ le, ke zíŋ fe-u ndi̧ gaŋ ba, nzuk ké ruh fe ke kerɓay ké si tul mgbɔkɔ Ŋgerzah le, ke zíŋ fe-u ke mgbɔkɔ gaŋ ba.

⁷A ge ge le ɓá hi̧ kandɔk ké-e lek ɓil law ye, ké hi̧ dan kerɓay tulu, dan law sena, ɓayu ké Ŋgerzah sa nzuk ké hi̧ fe ke law rihna.

⁸Fe laɓna lawsukiri gbam, Ŋgerzah hi̧ ƴo ŋger ke huhrumun. Ke hi̧ wuri fe lawsuki-uri ŋgi̧ ɓay hi̧ ndɔk woiri ɓá ah ɓil feri ɓoɗ ɓoɗ, ɓil fe laɓnari gbam ɓay í laɓ suki keni si wɔrɔk

⁹kandɔk kú-u vbeh ɓil mbete Ŋgerzah lewsa̧ ɓahri, ke mi̧h mi̧hri par par hi̧ nzuk sehri ziŋ fe. Sal in ye na sal sal ɓa ŋgɔh[13].

¹⁰A ye ké-e hi̧ mi̧hri hi̧ nzuk-ruh fe, ke hi̧ peŋ ɓa fe su̧na pi ra wa, ke ta hi̧ mi̧hri ké na ndɔk woiri ɓá seh ya le ? Ke ta hi̧ suki sal in ké Ŋgerzah ŋga̧h ziŋ wuri ŋger ma pol pol ya le[14] ?

¹¹Ke ƴo fer sam sukiri ɓoɗ ɓoɗ gbam ku̧ tul woiri hi̧ í laɓ sam law in a suŋ suŋ gbam ziŋ nzukri. Ku ƴo el ke tumbɔl hi̧ Ŋgerzah ɓay fe hi̧na law in woiri ké i ƴo pih na keni.

¹²Ɓay fe le pihna-dim Ŋgerzah-ay so sa̧w nzuk Ŋgerzahri kaŋto ya. Wara le sam fe puhna-aw hi̧ tumbɔl mgbe ké nzak nzukri goɗi goɗi hi̧ Ŋgerzah pi.

¹³Pihna-aw sɔk tehɓay law woiri ké ƴo tul ɓaysuki hul Ŋgermbay, sɔk tehɓay law woiri ké mgba in ziŋ niri ke nzuk a ɓoruri gbam pi mí hi̧ riŋ Ŋgerzah mgbe keni

¹⁴dara mí ɓil góŋ Ŋgerzah nzukri-aw ku tasa̧y woiri ɓay lawsuki a luki ké Ŋgerzah laɓ ziŋ wuri.

¹⁵Tumbɔl hi̧ Ŋgerzah nzuk sa̧w lawsuki ɓay suki ye ké-e hi̧ ké mba ɓahna.