Read Karang Mbete Galaɗri 1 Bible Online

Mbete Galaɗri 1 - Karang bible

Mbete Galaɗri 1

¹A bi Pɔl ke yi̧n wahri ɓil Ŋgermbay ké ƴo ziŋ mi, nah vah wuri sa̧w in Ŋgermbay ké mbu̧h hani ke gelri ɓoɗ ɓoɗ ké tusiɓa Galaɗ. Nzuk pirmatul pih mi ɓa gun nzak pihna ye ya. Mi ya̧ nzak pihna ké ta̧w nzuk pirmatul ya pi. Wara le mi ya̧ nzak pihna ké ta̧w Ŋgermbay Zezu ke baah Ŋgerzah ké hi̧ ni ti̧h ke puh záh ke pa̧ymun a foyu.

³Nah vah wuri ke lawsuki ke ɗeŋ ké ur ké ta̧w bah wah Ŋgerzah, ké ur ké ta̧w Gaŋ tul feri riw a ye Ŋgermbay Zezu.

⁴Ke poŋ mun ye ɓa fe puhna ɓay tul suya wah mí ten na ke ɓil ndɔk záh law a pipiri-u ké ƴo lak mbay aŋay ké tukala. Ke ya̧ na kandɔk ké bah wah Ŋgerzah yih.

⁵Riŋ ɗina ɓa nzuku a ye sew ke sew ɓa ŋgɔh. Gelu munu.

⁶Fe laɓna woiri nah mi yer ɓay fe le, i poŋ wuri fal ye Ŋgerzah yak, a ye ké ɗi wuri ke lawsuki Ŋgermbay, mí i el so lawsuki ra ke ɓay suki ké na ɓoɗ.

⁷Mí ɓaysuki a ɓoru ba, ta-a. Nzukri ké ƴo zukru kerɓay woiri-aw yih ɓay sɔɓ tul ɓaysuki hul Ŋgermbay ɓoɗ.

⁸Ɓa ra a wah, ɓa ra tem nzak pihna Ŋgerzah ké gi ka-kah ɓaysuki ra̧h keni ɓaysuki hul Ŋgermbay ké nah ka-kah-u hi̧ wuri ra dale, haɓna ɓá mgba tul ye.

⁹Ɓayay ké nah ɓah hi̧ wuri ra, mí-i el ƴo ɓah ra ɓáy ɓahri se, nzuk ka-kah ɓaysuki hi̧ wuri ra̧h keni ɓaysuki ké i ya̧ pol ra le, haɓna ɓá mgba tul ye.

¹⁰Uwa. Sam ɓay ɓahna biri-ay wa, mi ƴah law rihna ge mí ɓá ƴo fal bi le ? Law rihna nzuk pirmatul mini law rihna Ŋgerzah mí-i ƴah le wo ? Mi ɓah nzak pa̧na hi̧ nzukri ɓá sa mi keni lo ? Mi ɓah ra nzak pa̧na hi̧ nzuk pirmatulri ɓá sa mi keni bale, mi ɓa gun-laɓ pihna hi̧ Ŋgermbay ya.

¹¹Ɓaysuki ra mi ƴo ɓah ɓa teh-u hi̧ wuri yi̧n biri ɓil Ŋgermbay. Ɓaysuki ké mi ka-kah hi̧ wuri, i lah ra, i tu ɓahri se, si ke kerɓay nzuk pirmatulri ya,

¹²ɓayu ké mi ya̧ ké ta̧w nzuk pirmatul ya. Nzuk pirmatul kara firma mi ɓaysuki ra ya pi. Wara le Ŋgermbay Zezu ten mun ye hi̧ mi ko ni, mí mi ya̧ keni ɓaysuki hul ye.

¹³I lah ɓay siŋ sina bi a lewsa̧ ɓil fe laɓna sa̧w zih bi ziɓri la-lah. I tu ɓahri se, mi laɓ sa̧w nzuk Ŋgerzahri koseh kal ŋgɔŋ. Mi ƴah ful ɓay duh mi̧hri woyri.

¹⁴Mi ri̧h si̧w ɓay sa̧w ziihri kal bɔh mbuŋna biri gbam ka-kal. Law bi zaŋ ŋgi̧ mbamba ɓay tul sa̧w fe laɓna zih biri[1].

¹⁵Keni-aw gbam mí Ŋgerzah ko su-su ɓay hi̧ mi ko gun ye, ɓay mí si ka-kah ɓaysuki hul gun ye hi̧ sa̧wnzuk a ɓoruri ɓá lah. Dara mah bi ɓá mbuŋ mi le, ke lu mi ɓa gun-laɓ pihna ye. Ke ɗi mi ke lawsuki ye hi̧ mi ko gun ye. Mi el vbi ɓayu ké ta̧w nzuk pirmatul ya.

¹⁷Mi si ta̧w gun nzak pihna Ŋgermbay a polri ké Zurusalem ya pi. Wara le mi ur ke tusiɓa Damas si Arabi dara mí-i el gi Damas ra ɓáy.

¹⁸Mi laɓ mbihmbam say dara mí-i hil si Zurusalem ɓay mí ko Piyer[2]. Mi kaɓ ziŋ ni nam boh falu ndiɓi ƴo lu mberemu.

¹⁹Gun nzak pihna Ŋgermbay a ɓoru le, mi ko ya. Sa ɓa Zak, yi̧n Ŋgermbay ke Piyer mí-i ko niri.

²⁰(Í ko ɓayay ké mi vbeh hi̧ wuri-ay ɓa ketina ké nun Ŋgerzah, sɔk ɓahri se, mi kuŋ ɓay ya.)

²¹Bol falu mi si tusiɓa Siri ke tusiɓa Silisi.

²²Sa̧w in Ŋgermbay, a woyri sa̧w bi ziɓri ké ƴo mbu̧h hani ké tusiɓa Zude ra tu mi ya.

²³Mí ku lah ɓay bi ké nzak nzukri ɓahri, a ye nzuk-laɓ niri koseh, ké-e yih duh mi̧hri woyri ra mí aŋay ke ƴo ka-kah ɓay kanlaw tul Ŋgermbay wara.

²⁴Mí ku loŋ riŋ Ŋgerzah ɓay tul ɓay bi.