Read Karang Mbete Galaɗri 5 Bible Online

Mbete Galaɗri 5 - Karang bible

Mbete Galaɗri 5

¹Ŋgermbay sel na ke ɓil mgbal hi̧ na, náh kaɓ ɓa gun puh. Kaŋ dale í ɓer gi̧w. Í hi̧ nzuk ɓá ŋga̧h bɔk woiri ɓa mgbal ɓa a foyu ya.

²Í lah, a bi Pɔl mi ƴo ɓah hi̧ wuri ɓahri se, gelke i hi̧ nzuk kuŋ ndi̧w woiri ɓay ƴo tul bolkusol-kuŋ ndi̧w ké Ŋgerzah hi̧ Moyiz vbeh ɓil mbete bolkusol ra le, ɓay woiri ko Ŋgermbay ya.

³A bi mi ƴo te-teh ɓay hi̧ nzuk a suŋ suŋ gbam ɓahri se, nzuk hi̧ ku kuŋ ndi̧w ye ɓay ƴo tul bolkusol-kuŋ ndi̧w ké na ɓil mbete Ŋgerzah le, mbɔl Ŋgerzah mgba tul ye, nzuku ɓá ƴo tul bolkusol Ŋgerzah gbam ké na ɓil mbete vbehna Moyiz.

⁴Sal in ké Ŋgermbay ŋga̧h ziŋ wuri ra i sel da, a woiri ké i ƴo tul bolkusol-kuŋ ndi̧w ɓa fe-ŋga̧h wuri ziŋ Ŋgerzah ɓa záh woiri ra. Lawsuki ye saŋ wuri.

⁵A wah ké Tempuki ƴo ziŋ na ɓay law wah ké te sa tul Nzuk sa̧w kanlaw ba, ke hi̧ na, nah ƴo geŋ ke law rihna ɓay ko sal in ké Ŋgerzah ŋga̧h ziŋ na.

⁶Nah ƴo geŋ ke law rihna ɓayu ké, ké ta̧w Ŋgermbay Zezu, kúŋ ndi̧w ɓa fe ya, sí ɓa ndi̧w ɓɔl kara ɓa fe ya pi. Wara le law ké nzuk te sa tul Ŋgermbay mí hi̧ mun law sana ti̧h. A a̧w mí ɓa fe a ŋgeru.

⁷Ke titilu i ƴo kpak ɗukna ɓa suki wa, a ge mí kuŋ ɗukna woiri hi̧ kerɓay woiri tehre tul ketina le ?

⁸Ɓay ké hi̧ kerɓay woiri tehre ra ur ké ta̧w Ŋgerzah nzuk-ɗi wuri ya.

⁹Is ndi̧ zukri ɓil farin le, ur farinu gbam.

¹⁰Mi tu wuri tu, a woiri ké i ƴo mbew ke Ŋgermbay ra, i ta ke kerɓay a ɓoru ya. Mí nzukri ké ƴo zukru kerɓay woiri ra, ɓa sam nzuk a suŋ kara salɓay a kpuh-u ɓay ku̧ tul woyri ku̧.

¹¹Yi̧n biri ɓil Ŋgermbay, mi kah ra kah ɓay bolkusol ké Ŋgerzah hi̧ gun Izarayelri kuŋ ndi̧w ɓáy ba, ɓay tul fe mí ku ƴo laɓ mi ko seh-ay le ? Ɓay fe le kahɓay hul Ŋgermbay ké tul kpuh ɓa ndaw lihna hi̧ nzukri-aw.

¹²Nzukri ké ƴo gbur wuri ke bolkusol-kuŋ ndi̧w ra, mah ɓay kú el lu fo̧hro woyri ma fal poŋ wuri ɗeŋ.

¹³Ɓayu ké ɗina woiri ra Ŋgerzah ɗi wuri ɓa gun puh, a woiri yi̧n ɓil Ŋgermbay. Riŋ ɗina gun puh na ɓay laɓ fe ɗaka haymun ya, wara le riŋ ɗina-u na ɓay hi̧ í na ɓa mgbal law sana-u ƴo ɗiŋ tul hi̧ haniri,

¹⁴ɓayu ké ɓayri riw ké ɓil mbete bolkusol Ŋgerzah mbu̧h ɓa ɓay ké mbew yaŋ ké na-ay : Mu sá nzuk mbaŋ wo eŋ mun wo kaŋ.

¹⁵I laɓ hani se-se kandɔk fe kpahri ké ƴo nuŋ hani le, i ɓay ɔh ziŋ haniri. Í ko tul woiri ger.

¹⁶Mi ƴo ɓah hi̧ wuri ɓahri se, í si bɔh sina ke Tempuki dale, i ta hi̧ ɗaka haymun mbi tul woiri ya.

¹⁷Ɓayu ké haymun nzuk tasa̧y fe ké ɓay ka-kal le ƴo ruh ŋgermu ziŋ Tempuki. Tempuki ba, tasa̧y fe ké ƴo ɓa ŋgɔh mí ƴo ruh ŋgermu ziŋ haymun nzuk. Seɗe mbɔk woyri ku ruh ŋgermu ke haniri ɓay hi̧ í laɓ fe ké haymun woiri yih laɓu ya.

¹⁸Tempuki nda pol woiri le, i káɓ huh tem bolkusol Ŋgerzah ké ɓil mbete vbehna Moyiz ya.

¹⁹Fe laɓna haymun nzukri ten mun ɓa teh-u kandɔkay : láɓ nunpuki, láɓ fe laɓna a pipiri-u, láɓ fe si wɔrɔk,

²⁰dím záh, láɓ sa̧wkpuh, láɓ zeŋ, ɓál nzuk, láɓ sere, láɓ law sena, nzék law ɓay tul fe, gbúr nzukri, láɓ nani ƴo kehr nzukri ɓoɗ ɓoɗ,

²¹láɓ law si̧hna, tá yim, mbu̧h hani gel yim nday ba, sam fe a kandɔkawri. Ɓay ké mi ɓah hi̧ wuri le mi el ɓah ra ɓáy ɓahri se, nzukri ké mbi mun woyri ndoh ɓil sam fe laɓna-awri-aw ra, ku ta ké sakra gun-ya̧ fe baah Ŋgerzah ya, fe baah ra ɓa puh lakna ye.

²²Tempuki ba, leh lehna ké ndɔk nzuk ye kandɔk kpuh ké lehna-u na ké gun ndɔk kpuh-u kaŋ. Lehna-u mí na-ay : law sana, law rihna, law ɗeŋ, iklaw, gama law, law-laɓ suki, law mbew,

²³sí siŋ sina law a voh-u, mgbá mun. Bolkusol Ŋgerzah gboh sam fe a kandɔkayri ya.

²⁴Nzukri ké ɓa nunu a Ŋgermbay ɓar law sena tul feri ke sa̧y feri ké haymun woyri ké tul kpuh vbatay.

²⁵Ké kaɓna wah ɓa Tempuki le, náh ndar wuri siŋ sina wahri mbew ke Tempuki.

²⁶Garɓay tul fe a ti̧h suk yari ɓá ta-a ké haŋsekle woiri hi̧ í tuŋ haniri ya, hi̧ law woiri ɓá si̧h ké tul haniri ya.