Read Karang Mbete Galaɗri 6 Bible Online

Mbete Galaɗri 6 - Karang bible

Mbete Galaɗri 6

¹Yi̧n biri, gelke i ndukru nzuk mbew ké sakra woiri ƴo tul mbá nzak Ŋgerzah le, a woiri ké kerɓay Tempuki ƴo law woiri ra, í si ke kusol a voh-u kandɔk ké Tempuki sɔk wuri, í lek hi̧ nzuku-aw ɓá el ƴo gelu, í si ke kerɓay ké na ger rɔkɔ fe-leh law ɓá rah wuri hi̧ í toh ɓilu pi.

²Suya nzuku na ɓa sukna a yih-u, í ya̧ wuri sukna-aw ké tul hani. Kaŋ mí i ɓay ƴo tul bolkusol Ŋgermbay ke gelu.

³Mí gelke nzuk ko mun ye ɓa nzuk dale, ke ɓa fe a garu, ke ƴo rɔk mun ye ke mun kaŋ.

⁴A ge ge le ɓá ko munɓay fe laɓna ye fe laɓna ye dale, ke ɓay vba̧ haŋ tul suki ye suki ye. Mgbá fe laɓna nzuk mbaŋ ye tuh ke fe laɓna ye ba, ɓay ta mba.

⁵Ɓayu ké a ge ge le ɓay suk sukna nunu a ye, nunu a ye.

⁶Nzuk ké ƴo firma ɓay Ŋgerzah ɓá mgba in ziŋ nzuk ké ƴo firma ni ɓay Ŋgerzah ra pi.

⁷Í rɔk mun woiri ya. Ŋgerzah ra nzuk ta yi̧-yi̧hna ziŋ ni ya. Gelke nzuk ruh mi̧hri fe le, fe-u gaŋ mí ke ziŋ.

⁸Ɓay fe le nzuk ruh mi̧hri ké haymun ye le, mun hay ye ɓay hi̧ fe-u leh ɓa fe ké ka-kal. Nzuk ruh mi̧hri ké Tempuki bale, Tempuki mí ɓay hi̧ fe-u leh ɓa fe ké ka-kaɓ sew ke sew ɓa ŋgɔh.

⁹Law nzuk ké ƴo tul laɓ suki ɓá voh ke laɓu ya. Ɓayu ké nzuku ta̧h ra ya le, ke ɓay ziŋ fe-u ke fewu gaŋ.

¹⁰Mí-aw bale náh laɓ wuri suki hi̧ nzukri riw, nda ka̧w ke zaŋu. Wara le náh laɓ suki hi̧ gun puh-uri a woyri nzuk-kan law tul Ŋgermbayri ɓá kal tul suki ké nah laɓ ziŋ nzuk a ɓoruri.

¹¹Í ko wuri fe vbehna ké hu̧h gukuku-ay, a bi Pɔl mí-i ik ri ndɔk bi.

¹²Nzukri ké yih ɓay sɔk mun woyri ɓa nzukri ké ƴo tul bolkusol-kuŋ ndi̧w ké Ŋgerzah hi̧ Moyiz vbeh ɓil mbete bolkusol ra, ku ƴo law woiri ɓay í kuŋ ndi̧w kaŋ pi. Kerɓay woyri mbew yaŋ. Ku sa hi̧ yi̧n woyri nzuk-kuŋ ndi̧w a ɓoruri ɓá laɓ niri koseh ya.

¹³A woyri ra, ku ƴo tul bolkusol Ŋgerzah ya. Wara le ku yih ɓay í kuŋ ndi̧w woiri ɓay vba̧ keni haŋ woyri tul pihna ɓil haymun woiri.

¹⁴A bi ba, fe-vba̧ haŋ bi ɓá ta-a. Sa ɓa hul a tul kpuh vbatay ké Gaŋ tul feri riw a ye Ŋgermbay Zezu ke hu, mí ɓa fe-vba̧ haŋ bi. Hul ye ké tul kpuh vbatay ra hi̧ mi sɔɓ fal hi̧ tukala. Tukala kara ko mi mba.

¹⁵Vbá̧ haŋ ɓay tul fe a ɓoru ta-a, ɓayu ké kúŋ ndi̧w ɓa fe ya, sí ɓa ndi̧w ɓɔl ɓa fe ya. Wara le na ɓa nzuk pirmatul ké Ŋgerzah laɓ ke pa̧ymun a foyu, mí ɓa fe a ŋgeru.

¹⁶Nzuk a a̧yri ké hi̧ tul woyri ɓay ƴo tul sa̧wɓayay, ɗeŋ ke law in ye na tul woyri, ku ɓa gun Izarayel a sa̧w Ŋgerzah.

¹⁷Ɔ́h tɔr ɓay bi mí na-ay, nzuk ɓá ta̧h mi ndikpo ya ɓayu ké koro no̧ko Zezu na ké mun bi.

¹⁸Mi vah wuri yi̧n biri ke lawsuki Gaŋ wah a ye Ŋgermbay Zezu ké ƴo tem woiri. Gelu munu.