Read Karang Mbete Efezeri 2 Bible Online

Mbete Efezeri 2 - Karang bible

Mbete Efezeri 2

¹Lewsa̧ ra, i ɓa hul, siŋ sina woiri ɓa mbá nzak Ŋgerzah, pihna woiri ɓa láɓ suya. Siŋ sina woiri ra si sina ke siŋ sina a sew tukala. Mbay ké lak mbay tukala, a ye mbay záh tukala[4] mí ƴo ŋger nzukri ké mba nzak Ŋgerzah hi̧ ku laɓ fe laɓna tukala hi̧ ni.

³A wah gun Izarayelri kara lewsa̧ siŋ sina wah ɓa ɗaka haymun. Nah laɓ fe ké haymun yih, kerɓay ké ziŋ na ra, nah laɓ. Haŋ fa̧hna Ŋgerzah ku̧ tul wah kandɔk sa̧wnzuk a ɓoruri gbam pi.

⁴Mí Ŋgerzah ɓa nzuk vana, law in ɓa fe ziŋna ké ah ké ndɔk ye. Ɓay tul law sana ye ké ŋgi̧ mbamba, ké-e sa na keni,

⁵a wah ké nah ƴo ke Ŋgermbay, ke hi̧ na nah ɔ-ɔkna ziŋ ni, a wah nzukri ké lewsa̧ nah ɓa hul, ké siŋ sina wah ɓa mbá nzak Ŋgerzah. Lawsuki ye mí ya̧ nari ké ndɔk hul.

⁶Ke hi̧ nah ti̧h ke ɓilu ziŋ Ŋgermbay ɓa nzuk a ɔknari, mí ke el hi̧ nah kaɓ ké nunmbam mbew ziŋ Mbay Zezu.

⁷Ke mbu̧h na ziŋ Ŋgermbay Zezu hi̧ lawsuki ye ten mun sew ke sew. Lawsuki ye ra ɓa fe ziŋna ké kal tul fe ziŋnari gbam ka-kal, mí ke hi̧ lawsuki ye ti̧h na suk, a wah ké nah ƴo ke Mbay Zezu,

⁸ɓayu ké lawsuki ye ra mí ɓa fe ké ya̧ nari ké ndɔk hul, a wahri ké nah kan law sa tul ye. Sa̧wu ta ɓa nzukri ya, sa̧wu ɓa Ŋgerzah ké hi̧ ndikpo.

⁹Sa̧wu ti̧h ke fe laɓna nzukri ya rɔkɔ nzuk ɓá vba̧ haŋ keni,

¹⁰ɓayu ké nah ɓa fe goso Ŋgerzah. Ke laɓ na ɓa nzuk pirmatul mbew ke Mbay Zezu ɓay náh laɓ suki ké-e lek pol hi̧ na, náh si siŋ sina ɓilu.

¹¹Sa̧wu mí í ker ɓay kaɓna woiri a lewsa̧. Ke sewu-aw, sa̧w woiri ɓa sa̧w a fál haymun. Gun Izarayelri ɗi sa̧w woiri ɓa dem, sa̧w gun Izarayelri ba, kuŋ ndi̧w kandɔk ké bolkusol Ŋgerzah sɔk. (Pihna-kuŋ ndi̧w ke bolkusol Ŋgerzah kara ɓa fe a haymun kú-u laɓ ke ndɔk pi.)

¹²Ke sewu-aw, ɓay Ŋgermbay ko wuri ya, i ɓa gun a kalari, riŋ woiri ta sakra riŋ gun Izarayelri ya. Sal in ké ŋga̧h gun Izarayelri ziŋ Ŋgerzah ké-e wahɓayu ra, tu wuri ya[5]. Hȩkme hul ƴo law woiri, law woiri tu ɔkna ya, Ŋgerzah ɓa záh woiri ya.

¹³Mí aŋay ba, i ƴo ke Mbay Zezu, a woiri ké lewsa̧ i ƴo ɓa ɗih-u ké ta̧w ye, sem ye hi̧ riŋ woiri ti̧h ɓa gun puh mbu̧h mbew ke gun Izarayelri,

¹⁴ɓayu ké Ŋgermbay ra ɓa ɗeŋ wahri. Ke mbu̧h sa̧wnzuk a ɓoruri ke gun Izarayelri ɓa sa̧w ké mbew. Ke hul ké i mun ye mí ke dir keni ila ké ɗoŋ puh gun Izarayelri ké kehr niri ke sa̧wnzuk a ɓoruri hi̧ ku ɓa nzukbaari. Ila ra ɓa ɓayri ké na ɓil mbete bolkusol Ŋgerzah ke fe laɓna-uri ké Ŋgerzah hi̧ gun Izarayelri, mí ɓa fe baa ké hi̧ gun Izarayelri kehr ɓoɗ ke sa̧wnzuk a ɓoruri. Kandɔkaw mí Ŋgermbay mbi bolkusolu laɓ ɔh ke gelu gelu ka̧h gbu̧h-u, ke dir ila ra ke hul ké i mun ye, mí ke i keni ŋgerna baa-aw mí poŋ ful hi̧ Ŋgermbay mbu̧h sa̧wnzukri ké seɗe ra ti̧h ɓa nzuk pirmatul a foyu ké sa̧wu ɓa mbew yaŋ ziŋ ni. Kaŋaw mí ke hi̧ ɗeŋ gi.

¹⁶Ila ké-e dir ké tul kpuh vbatay ra poŋ ful hi̧ ni ke i ŋgerna baa ké sakra gun Izarayelri ke sa̧wnzuk a ɓoruri, ke hi̧ ku mgba nzak nzaw, ke mbu̧h sa̧wnzukri seɗe-ay ɓa sa̧w ké mbew hi̧ Ŋgerzah.

¹⁷Ŋgermbay hu, ke ti̧h ke pa̧ymun a foyu, ke ka-kah ɓaysuki[6] ɗeŋ hi̧ wuri sa̧wnzukri ké ɗi-ɗih ké ta̧w Ŋgerzah pi, ke ka-kah ɗeŋ hi̧ na gun Izarayelri ké ɗih ya ke Ŋgerzah pi

¹⁸ɓay fe le, ke ɓa mahful-si pol baah Ŋgerzah hi̧ nari ɓa sa̧wnzuk ké mbew, Tem mbew yaŋ.

¹⁹Mí-aw dale i ɓa gun a kala mba, sa̧w puh woiri na ɓoɗ ya. Wara le riŋ sa̧w Ŋgerzah kan tul woiri. Sa̧wpuh woiri ɓa puh Ŋgerzah gaŋ.

²⁰Ke laɓ wuri ɓa vul ye. A ye Ŋgermbay Zezu, ke ɓa mah kasaw-mboh diŋ vulu. Gun nzak pihna Ŋgerzahri ke gun nzak pihna Ŋgermbayri ɓa kasaw-mboh diŋ vul ye a toŋri, a woiri mí i ɓa mol ké-e mboh keni vulu.

²¹A ye ké-e ɓa mah kasaw-mboh diŋ vul ra, ke hi̧ molri mbew mbew gbam kaɓ tul ye ɓa suki. Mol vul kani-uri ka̧y tul hani tul hani gaŋ ma pol pol ɓa vul kaɓna ké su ɓay Gaŋ tul feri riw.

²²A ye, ke hi̧ wuri a woiri kara i na ɓa mol ké-e mboh ka̧y tul ye mí Tem Ŋgerzah kaɓ mbew ziŋ wuri hi̧ i ɓa vul kaɓna Ŋgerzah.