Read Karang Mbete Efezeri 3 Bible Online

Mbete Efezeri 3 - Karang bible

Mbete Efezeri 3

¹Ɓay tul lawsuki ké Ŋgerzah laɓ ziŋ na ra, a bi Pɔl mi ɓa mgbal Mbay Zezu ɓay tul woiri ké sa̧w woiri na ɓoɗ, mí nzukri mbih mi vul mgbal ɓayu.

²Ɓay pihna ké Ŋgerzah hi̧ mi ɓay mí ko tul lawsuki ye ké ta̧w woiri le, i lah ɓayu lah.

³Pihna-aw mah ke kerɓay ké Ŋgerzah mu̧h ké law ye, mí ke ten sa̧wɓayu hi̧ mi, mi ko. Mi vbeh ɓayu ndi̧ hi̧ wuri pol da.

⁴Mbete ké i ki̧ ra hi̧ i tu sa̧w goso fe tuna bi ɓay ten sa̧wɓay Ŋgermbay hi̧ wuri, i ko pi.

⁵Ŋgerzah hi̧ nzuk a lewsa̧ri ko ya. Mí aŋay, Tempuki ten sa̧wɓayu hi̧ nzukri ké Ŋgerzah lu niri ku̧ ɓoɗ ɓa gun nzak pihna ye ke gun nzak pihna Ŋgermbayri. A woyri ku ten sa̧wɓay Ŋgermbay ma kala hi̧ nzukri lah.

⁶Sa̧wɓay ké ten ma kala ɓahri, ɓaysuki hul Ŋgermbay hi̧ nzukri ké ƴo mbew ziŋ Ŋgermbay Zezu ɓa gun-ya̧ fe baah ke haniri, ɓa ra gun Izarayelri, ɓa ra sa̧wnzuk a ɓoruri[7]. Ku ɓa nzuk ké mbew ke haniri. Ku ɓa gunri ké ziŋ wahɓay ké Ŋgerzah wah ziŋ gun Izarayelri pi.

⁷Ɓaysuki hul Ŋgermbay ra, Ŋgerzah laɓ lawsuki ziŋ mi. Ke ŋger mi ke ŋgerna ye hi̧ mi ti̧h ɓa gun-laɓ pihna ɓaysuki ye.

⁸A bi gun a mah gelu ndi̧ ké sakra gun yeri, mí ke laɓ lawsuki ziŋ mi. Ke pih mi si ka-kah ɓaysuki hul Ŋgermbay hi̧ nzukri ké sa̧w woyri na ɓoɗ hi̧ ku mbu̧h ɓa sa̧w mbew, ɓa sa̧w in Ŋgermbay. Ɓaysuki ra na ndɔk Ŋgermbay ké na ɓa ah-u, ɓa fe ziŋna a luki ké nzuk mah tu gbu̧h-u ya.

⁹Ke pih mi si ten ɓayu ɓa teh-u hi̧ niri kú ko ani mí Ŋgerzah a ye nzuk-laɓ feri gbam lek ɓay hi̧ sa̧wɓay ké mu̧h ké law ye ke titilu da̧y ɓá ti̧h.

¹⁰Kaŋ dale ke hi̧ sa̧w in Ŋgermbay mí ɓa goso fe sɔkna ye hi̧ záhri ɓoɗ ɓoɗ gbam ko goso ru̧na ye, ɓa ra záh mbayri, ɓa ra záh-lak mbayri mí ku ko.

¹¹Fe-u kal kandɔk ké-e lek ɓay laɓu ke sewu-aw sa̧. Ke laɓ pihna-aw ké tul Gaŋ wah a ye Mbay Zezu.

¹²Law ye Ŋgermbay ké ƴo mbew ziŋ Ŋgerzah mí hi̧ na, a wah ké nah ƴo mbew ziŋ ni ra mahful-si pol Ŋgerzah dan su̧hru na ŋgah hi̧ na.

¹³Sa̧wu mí-i ƴo goŋ wuri, koseh ké mi ko ɓay tul woiri ɓá ta̧h wuri ya. Koseh-ay ɓa fe ké hi̧ riŋ ɗina Ŋgerzah mgbe ké haŋsekle woiri.

¹⁴Ɓay tul lawsuki ké Ŋgerzah laɓ ziŋ na ra, mi huk ké pol ye bah feri gbam, a ye mí ke tu riŋ hi̧ feri gbam, ɓa ra feri ké nunmbam, ɓa ra sa̧wnzukri ké tusiɓa.

¹⁶Mi goŋ bah wah, a ye ké riŋ ɗina ye ɓa fe ziŋna a luki, ké hi̧ Tempuki ɓá ŋger tem woiri ke ŋgerna ye hi̧ Ŋgermbay ɓá kaɓ ɓil law woiri ke law sana ɓay kanlaw.

¹⁸Law sana ra ɓa fe ké ɓar sa̧w ɓa ɗih-u, ɓa mah sa̧w fe woiri. Mi goŋ ni kaŋ ɓay í ƴo ke huhrumun ɓay hi̧ ahna law sana-u, pehna-u, ɗihna-u, gaŋna-u gbamaw í mah mgba ma law woiri ziŋ sa̧w nzuk yeri hi̧ í tu law sana Ŋgermbay ké mba tul fe tuna nzukri mba-mba dale, feri gbam ké mun Ŋgerzah ɓá ya̧ mun woiri ɔh gbam pi.

²⁰Riŋ ɗina ɓa a ye Ŋgerzah nzuk huhrumun a luki ké fe laɓna ye kal tul ɓayri gbam ké nah vbi ni, ké nah ker ka-kal. Ke ƴo laɓ mah ke ŋgerna ye. Ŋgerna-u, ke ƴo ŋger na keni.

²¹Riŋ ye mgbe le, mgbe ɓáy ké haŋsekle sa̧w in Ŋgermbay Zezu ziŋ ni. Riŋ ye mgbe sew ke sew. Gelu munu !