Read Karang Mbete Efezeri 6 Bible Online

Mbete Efezeri 6 - Karang bible

Mbete Efezeri 6

¹Gunri le, kú lah nzak nzuk-mbuŋ niri, ɓayu ké láh nzak woyri ƴo gelu ke ketina Ŋgerzah.

²Mú hȩk bah wo ke mah wo, ɓa bolkusol a titilu ké Ŋgerzah wahɓay keni ɓay hi̧

³mú kaɓ ɓa suki. Nam wo ɓay ŋgi̧ ké tusiɓa[14].

⁴Bah gunri le, kú tur nun gun woyri ke ɓay ya. Wara le í kɔklɔ suk woyri, í ndar niri ɓa ndarna Gaŋ tul feri riw, mí í mgba sa̧w woyri keni.

⁵Mgbalri le, ke law a teh-u kú lah nzak bahgaŋ woiri ke hȩkme ke mun tona ké falu kandɔk ku ƴo lah nzak Ŋgermbay.

⁶Kú yih nzak bahgaŋ woyri ke nzak kandɔk nzukri ké nzah law rihna nzukri kaŋto ya. Wara le kú hi̧ tul woyri ɓa mgbal Ŋgermbay ké laɓ pihna ké Ŋgerzah yih.

⁷Pihna kú-u ƴo laɓ hi̧ bahgaŋ woyri ra, kú laɓ ke law suki kandɔk pihna kú-u laɓ hi̧ Gaŋ tul feri riw.

⁸I tu ɓahri se, nzuk a suŋ suŋ, ɓa ra mgbal, ɓa ra nzuk a garu, ke ɓay ziŋ kpaŋndɔk ké mah pihna suki ye suki ye ké ta̧w Gaŋ tul feri riw.

⁹Bahgaŋ mgbalri le, kú ƴo ke mgbal woyri mbew ɓil kerɓay ra. Kú bak niri ke ɓay ya. Kú tu ɓahri se, a woyri ke mgbal woyri ra, bahgaŋ woyri mbew yaŋ mí ƴo tul woyri mbɔk ké nunmbam. Ke lu nun nzukri ya.

¹⁰Tɔr ɓay a ɓoruri mí-i ɓah-ay. Í hi̧ ŋgerna Gaŋ tul feri riw ɓá na ɓa ŋgerna ké fal woiri, huhrumun ye ɓá na ɓa ŋgerna ké ndɔk woiri.

¹¹Í ndoh fe rem Ŋgerzah riw ɓa gar ndohna woiri ɓay í ɓer gi̧w ɓa kpuh-u ɓay ndaw mbay záh tukala ké-e lek ɓay ndih nzukri keni

¹²ɓay fe le, nah ruh ŋgermu ziŋ nzuk pirmatul ya. Wara le nah ruh ziŋ záh mbayri ke záh-lak mbayri ke záh a ŋgeruri ké tukala. Nah ruh ziŋ záh law a pipiri-uri ké ƴo ruh ŋgermu ké nunmbam[15], gbamaw mí nah ƴo ruh ziŋ niri-aw.

¹³Sa̧wu mí í fa̧h fe rem Ŋgerzah riw ku̧ mun woiri ɓay hi̧ í ƴo ke ŋgerna-ƴo ɓa kpuh-u ké pol nzukbaari ke nam a a̧y ké záhri ƴo ndoh kerɓay a pipiri-uri ɓil law nzukri. Kandɔk ké i ndih niri ke ŋgerna Gaŋ tul feri riw ra i ƴo ɓa kpuh-u.

¹⁴Kaŋ dale í ƴo ɓa kpuh-u kandɔk ké i ŋga̧h si̧h woiri ke sal ké ɓa ketina, kandɔk ké i ndoh ŋgaŋ-pɔr haŋ woiri ké ɓa sal in ké ŋga̧h wuri ziŋ Ŋgerzah ɓa záh woiri,

¹⁵kandɔk ké i ndoh ɓaysuki hul Ŋgermbay ké gi ke ɗeŋ ɓa sabɔk ké bɔk woiri.

¹⁶Ŋgaŋ ké i mbi wuri ke fe remri-aw gbam ɓa law mbew woiri ke Ŋgerzah le, i rím keni sam hɔrɔri gbam ké záh law a pipiri-u ndoh goh yeri keni ku̧ tul woiri.

¹⁷Í guɓ tul woiri ke guɓatul Ŋgerzah ké ɓa sa̧w-ya̧ wuri[16], í ya̧ mahwu̧y Tempuki ké ɓa ɓay ké Ŋgerzah ɓaŋ ndoh ɓil law woiri.

¹⁸Ɓay ra i ziŋ ké nzak Tempuki ke seh ké i ƴo ɓah ɓay ziŋ Ŋgerzah ke sam goŋnari ɓoɗ ɓoɗ ɓil sa̧wsehri gbam. Í ƴo tul bɔk ke seh-u-aw ɓay ƴo law Ŋgerzah ke sam goŋnari ɓoɗ ɓoɗ tul sa̧w nzuk yeri.

¹⁹Ɓay tul bi ba, í goŋ ni ɓay ké ɓaŋ ɓay ké-e yih ɓay mí ɓah ku̧ nzak bi hi̧ mí ten sa̧w ɓaysuki hul Ŋgermbay ɓa teh-u hi̧ nzukri kú lah.

²⁰Ɓay tulu mí-i ɓa ŋgernzuk ké sal lari ŋga̧h mí ké vul mgbal, mí mi ziŋ ful-ɓah ɓaysuki-u dan fe zɔklɔ[17] kandɔk mi mah ɓah-u.

²¹Tikus yi̧n wahri ɓil Gaŋ tul feri riw ɓay hi̧ í tu ɓay bi ra. A ye ra ke ɓa maŋlaw wah. Ke ƴo tul pihna-so nzukri, ke ƴo ke Gaŋ tul feri riw. Ke ɓay lu mberem gel kaɓna bi ke feri ké mi ƴo laɓu hi̧ wuri í lah.

²²Mi pih ni ma ta̧w woiri. Sa̧wɓay pihna-ay ɓa sɔ́k wuri ɓay wah dara mí ke hí̧ wuri nzak hewna ɓay í ziŋ keni ŋgerna pi.

²³Mi vah wuri ke ɗeŋ ké ur ké ta̧w baah Ŋgerzah, ké ur ké ta̧w Gaŋ wah Ŋgermbay Zezu ke law sana ké gi ke law mbew pi.

²⁴Lawsuki ra ké ɓe-ɓeɓna ya, mi vah wuri keni[18] a woiri nzukri riw ké i sa Gaŋ wah Ŋgermbay Zezu.