Read Karang Mbete Filipiri 1 Bible Online

Mbete Filipiri 1 - Karang bible

Mbete Filipiri 1

¹A wah Pɔl ke Timote, mgbal Mbay Zezu, nah vah wuri sa̧wnzuk Ŋgerzah ké i ƴo ke Mbay Zezu, a woiri ké i kaɓ tusiɓa Filipi[1] ke nzuk-mgba sa̧w nzuk misoŋri[2] ke nzuk-so nzukri[3] ké i dih fal Ŋgermbay Zezu.

²Nah vah wuri ke lawsuki ke ɗeŋ ké ur ké ta̧w Bah wah Ŋgerzah, ké ur ké ta̧w Gaŋ tul feri riw, a ye Ŋgermbay Zezu.

³Kerɓay bi ké tul woiri ƴo hi̧ mi él ke tumbɔl hi̧ Ŋgerzah bi kpatara.

⁴Ɓil góŋ Ŋgerzah biri gbam ké mi goŋ ni ɓay tul woiri, mi ƴo goŋ ni ke law rihna ɓay mun woiri ké i ɓaŋ kan ɓil ɓaysuki hul Mbay ur ke nam a titilu da̧y ké i lah ɓayu ka̧h aŋay.

⁶Mí mi tu-tu, a ye ké-e titil fe laɓna a suki ziŋ wuri ra, ke hí̧ í ŋger keni kpu̧ru kpu̧ru ka̧h nam elna Mbay Zezu.

⁷Kerɓay bi ké tul woiri-aw ƴo gelu ɓayu ké law bi te sa tul woiri kpatara. A woiri ké Ŋgerzah poŋ lawsuki ye ku̧ ndɔk woiri ziŋ mi. Sew ké mi na vul mgbal, i ƴo fal bi. Seh ké mi ƴo ndiseŋe ƴo lu lakna ɓay ketina ɓaysuki, i ƴo ziŋ mi pi.

⁸Mi tasa̧y ɓay mbu̧hna woiri, mí kerɓayu ur ke law sana Mbay Zezu. Ŋgerzah tu-tu, mi ƴo ɓah ketina.

⁹Góŋ Ŋgerzah bi ra mí na-ay : Mi ƴo goŋ ni ɓay ké hi̧ law sana woiri ɓá ŋgi̧ si wɔrɔk ké ɓil tuna pi ɓil kerɓay a teh-u pi.

¹⁰Dale i ɓay tu kehr suki a a̧yri ké kal suki a ɓoruri gbam hi̧ ketina woiri ɓay ndu̧y, ɓéɓ law hani ɓay ta ké haŋsekle woiri ya kpu̧ru ka̧h nam gina Ŋgermbay kandɔk ké Ŋgermbay Zezu ƴo ŋger wuri ɓa mi̧hri ké leh lehna a ketina ké hi̧ riŋ ɗina Ŋgerzah mgbe.

¹²Yi̧n biri, mi yih ɓay í tu wuri : Kosehri ké ziŋ mi-ay hi̧ ɓaysuki hul Mbay seh ma pol pol hi̧ soze-kɔr kerpuh guvener-ri ke tɔr nzuk a ɓoruri gbam tu ɓa teh-u ɓahri, ku mgba mi kan vul mgbal ɓayu ké mi ƴo ke Ŋgermbay.

¹⁴Kosehri ké ziŋ mi-ay hi̧ ŋgi̧na nzuk yi̧n ɓil Ŋgermbayri poŋ mun woyri kan ndɔk Ŋgermbay yɔɗ, mí ku ka-kah ɓay ye ɓa teh-u ke huhrumun.

¹⁵Mí nzuk a haniri yih pahra mi. Ku ri̧h siw ƴo ka-kah ɓay Ŋgermbay, law woyri si̧h ké tul bi. Nzuk a ɓoruri ba, ka-kah-u ke law rihna.

¹⁶Sa̧w ka-kah woyri-ay ɓa law sana. Ku tu-tu, káɓ tukala bi-ay na ɓay lu lakna ɓay ketina ɓaysuki hul Ŋgermbay.

¹⁷Sa̧w ka-kah ɓaysuki Ŋgermbay nzuk a ɓoruri ba, ɓa foh. Ku ƴah riŋ ɗina nunu a woyri. Ku ker ɓahri, aŋay ké mi na vul mgbal da, ku ɓéɓ law bi keni.

¹⁸Mí a a̧w ba, mi ɓáh ani ? Gbam woyri ku ƴo ka-kah ɓaysuki Ŋgermbay ɓa ra nzuk foh mini nzuk law a teh-u kara law bi rih mi rih, mí ɓay rih mi kpatara.

¹⁹Mi tu ɓahri se, ɓaysuki kú-u ka-kah-u ɓay el lu lakna ɓay bi[4] ɓay tumbɔl góŋ Ŋgerzah woiri ke sona Tem Ŋgermbay Zezu.

²⁰Law bi ké mi ɓaŋ te tul lakna ɓaysuki-aw na ɗeŋ ɓay fe le, su̧hru ta se mi ya, mí riŋ Ŋgermbay ƴo mgbe ké tul bi ɓa teh-u kpatara. Mi kaɓ tukala mini mi hu kara riŋ ye ɓay mgbe-u.

²¹Kaɓna bi ɓa Ŋgermbay, hul ba, ɓa fe ziŋna bi.

²²Káɓ tukala le hi̧ mi laɓ pihna ké ti̧h suk. Káɓ tukala mini hul, a suŋ mí-i lu-u le ? Mi ta ke nzak ɓah-u ya.

²³Kerɓay seɗe ƴo tehre mi. Ɗaka-ko Ŋgermbay ke nun na law bi. A a̧w mí su mbamba. Ku i mi kara ɓay ta-a.

²⁴Mí ɓay tul woiri, mah ɓay mí kaɓ tukala.

²⁵Mi tu-tu, mi kaɓu, mi ƴó ziŋ wuri gbam ɓay hi̧ ɓo law woiri ké i kan tul Ŋgermbay ra ɓá ru̧ ma pol pol ke law rihna.

²⁶Seh-u ké mi él gi ta̧w woiri le, mbu̧hna woiri mbew ke Mbay Zezu ra ɓay hi̧ wuri zay mun si wɔrɔk ɓay tul gina bi.

²⁷Mí fe mbew yaŋ ké na-ay : I ti̧h ɓa sa̧wnzuk puh lakna Ŋgermbay ɓay hi̧ siŋ sina woiri ɓá mah ke ɓaysuki hul Ŋgermbay ra. Gelke mi el gi le, mi kó ke nun bi, mí-i gi ya kara ku sɔ́k mi ɓay woiri ɓahri, i ƴo ruh mun ɓa nzuk mbew, i ƴo wuri mbew ɓay Tem ké mbew, mí i ƴo tul ketina ɓaysuki ɓa kpuh-u.

²⁸Hȩkme ndi̧ ɓá se wuri ɓay nzukbaa woiri ya, mí ketina-u sɔk nzukbaa woiri ɓeɓna woyri. Mí a woiri le, ɓa ɔkna ké ta̧w woiri. A a̧w ur ké ta̧w Ŋgerzah ɓay fe le, Ŋgerzah laɓ law suki ziŋ wuri hi̧ i mbi fe laɓna Ŋgermbay. Ke laɓ law suki ɓay í kan law tul ye kaŋto ya. Le ɓay í ko seh ɓay tul ye pi.

³⁰Ŋgermu ké i ƴo ruh ra ɓa sam ŋgermu ké i ko mi ɓilu pol, ɓa ŋgermu ké aŋay kara i lah ɓahri, mi ƴo ɓilu pi.