Read Karang Mbete Filipiri 2 Bible Online

Mbete Filipiri 2 - Karang bible

Mbete Filipiri 2

¹Kandɔk ké sa̧w láh hani woiri ɓa ƴona woiri ziŋ Ŋgermbay, ké law sana Ŋgerzah hi̧ law woiri na ɗeŋ, ké mbu̧hna woiri ɓa mbew ɓay Tem, ké law in ke law sa̧hna ɓay tul haniri ƴo ri ra,

²í hi̧ law rihna bi ké tul woiri ɓá mbah tuɓ tuɓ. Í mbi kerɓay ké mbeway ɓa nzuk mbew ke haniri ke law sana ke law mbew.

³Kerɓay sere ɓá ta-a. Hú̧h tul ɓá ta-a. Wara le ɗíŋ tul hi̧ haniri ɓá ƴo ri. Í mgba mbaŋ woiri gunri mah ke ŋgereri, gbamaw ɓa nzukri ké mba wuri mba.

⁴A ge ge le ɓá lu kerɓay tul ye ma fal, ké ker si tul nzuk a ɓoruri ma.

⁵Kandɔkaw, ké sakra woiri í hi̧ kerɓay woiri ɓá mah ke kerɓay Mbay Zezu.

⁶A ye ke ɓa mun Ŋgerzah. Ke ɓa Ŋgerzah kara ke ko gel ƴona ye ta ɓa gel-lak mbay ke ŋgerna ya. Mí ke poŋ riŋ ɗina ye ma fal, ke el mbi gel ƴona mgbal, ke ba hani ke nzuk pirmatulri. Ké-e ti̧h ɓa nzuk pirmatul ba, ke ɗiŋ tul ye. Láh nzak Ŋgerzah si ziŋ ni ka̧h hul. Dale ke poŋ mun ye hu hul mgbal ké tul kpuh vbatay.

⁹Sa̧wu mí Ŋgerzah ɔr tul ye ma síɓa, ke el ɗi ni ke riŋ ye Gaŋ tul feri riw, riŋu kal tul riŋ ɗina a ɓoruri gbam ka-kal ɓay hi̧ nzukri, záhri, fe a ɓoruri gbam ké nunmbam, ké tusiɓa, ké puh záhri, gbam ɓay huk siɓa gburuk ɓay riŋ Zezu. Ku ɓáh ke nzak woyri ɓahri, Ŋgermbay Zezu mí ɓa Miƴori hi̧ riŋ ɗina baah Ŋgerzah mgbe[5].

¹²Dale gun sana biri, sew ké mi ƴo ziŋ wuri ra, i ƴo hȩk Ŋgerzah kpatara, aŋay ké mi ta-a kara i ƴo hȩk ni ma pol ɓáy. Mí ke hȩkna ke mun tona í hi̧ ɔkna woiri ké i ziŋ ké ta̧w Ŋgermbay ra ɓá laɓ pihna ka̧h gbu̧h,

¹³ɓayu ké Ŋgerzah ƴo hi̧ wuri kerɓay-laɓ suki, ke ƴo hi̧ wuri huhrumun laɓu pi ɓa fe law sana ye.

¹⁴Í su̧h ɓay ya, í ɓal hani ya ɓay hi̧ í ƴo dan ɓay, hi̧ í tu suya ya, hi̧ í ɓa gun Ŋgerzahri ké suya rɔɓlɔ wuri ké sakra nzuk tukalari ya. Kerɓay nzuk tukalari ra̧-ra̧h, tul woyri ƴo gelu ya. Mí a woiri ba, i na ɓa gel tehna woyri kandɔk fe-teh gelri ké nunmbam. I mgba ɓay ké hi̧ ɔkna. Ɓay tul woiri, mi ɓay vba̧ haŋ kpu̧ru ka̧h nam gina Ŋgermbay ɓay fe le, rúh mun bi ɓay tul woiri ke ta̧hma bi kal ndikpo ya.

¹⁷Wara le i poŋ mun woiri yɔɗ dim Ŋgerzah keni ɓa fe puhna. A bi mi ɓa yim dɔɓ tul fe puhna woiri hi̧ Ŋgerzah bale, law bi rih mi rih, mí law rihna bi mbu̧h ziŋ law rihna woiri gbam.

¹⁸Kaŋ pi mí a woiri kara í ƴo ke law rihna, í mbu̧h law rihna woiri ziŋ law rihna bi.

¹⁹Mi ɓaŋ kerɓay bi te tul Zezu Gaŋ tul feri riw. Zah le, ke hí̧ mi ful-pih Timote si ta̧w woiri. Elna ye ke ɓay sɔk mi ɓay woiri. Le mi zíŋ ŋgerna.

²⁰Nzuk a ɓoru ké soh gel Timote, ké law ye mah hani ke law bi ta-a. Kerɓay Timote a ketina na sa tul woiri.

²¹Nzuk a ɓoruri ba, ƴah ɓil woyri. Ku ruh mun ɓay Ŋgermbay Zezu ya.

²²I tu wuri siŋ sina ye tu. Ke poŋ mun ye ɓa mgbal ɓay tul ɓaysuki hul Ŋgermbay ziŋ mi kandɔk gun ké ƴo ɓel bah ye kaŋ.

²³Sa̧wu mí-i ker ɓay pih ni. Seh ké mi tu ɓay feri ké ko mi ɓa teh-u le, mi píh ni ɓáy.

²⁴Gaŋ tul feri riw sɔk mi, mí-i tu-tu, zah le, mi sí ta̧w woiri ke mun bi gaŋ.

²⁵Keni-aw kara mi ko su-su ɓay mí hi̧ yi̧n wahri Epofodi, bɔh pihna bi, bɔh ŋgermu bi ɓá el si ta̧w woiri ɓa gah-u. A ye ke ɓa gun nzak pihna woiri ké a woiri gaŋ mí i pih ni gi so mi ke feri ké mah hɔl mun bi.

²⁶Ke ƴo ke ɗaka el si kó wuri gbam. Kerɓay ƴo zɔklɔ ni ger ɓay fe le, i lah ɓay ŋger sena ye lah.

²⁷Ketina, ke na sena gaŋ, toŋ ndi̧ ɓay ké hu, mí Ŋgerzah ker seh ye. Ke ker seh bi pi ɓay rɔkɔ mí zi ni hi̧ law sena bi ɓá ŋgi̧ ma pol.

²⁸Sa̧wu mí-i hi̧ ni ké el ɓa gah-u. I ko ni le, law woiri ɓay rih wuri. A bi kara kerɓay bi ɓay na ɗeŋ.

²⁹Kandɔkaw mí í ya̧ wuri ni ndɔk seɗe ke riŋ Gaŋ tul feri riw. Sam nzuk a kandɔkawri ra mah pirna. Ɓay fe le ke toŋ ɗih ya ke hul ɓay pihna Ŋgermbay. Ke poŋ kerɓay tul ye ɓay laɓ suki hi̧ mi ke riŋ woiri kandɔk ké i ziŋ ful laɓ ke mun woiri ɔh ya.